ரெய்டு வந்த நேரத்தில் குத்தகைதாரர் அருணாச்சலம், தோட்டத்தில் இல்லை. அங்கு வேலைபார்க்கும் முருகன், அருணாச்சலத்தின் மாமனார் தங்கவேல் ஆகியோர் மட்டுமே இருந்தனர். அவர்களை போலீஸார் கைதுசெய்தனர். ‘பயிரிடப்பட்டுள்ள மொத்த கஞ்சா செடியில், 250 கிலோ அளவுக்கு கஞ்சா இருக்கும். அதன் சந்தைமதிப்பு 12.5 லட்சம் ரூபாய்!’ என்று காவல்துறை வட்டாரத்தில் தெரிவிக்கப்பட்டது. நிலத்தை அருணாச்சலத்திடம் குத்தகைக்குவிட்ட நிஜாமுதீனிடம் போதைப்பொருள் தடுப்புப் பிரிவு போலீஸார் விசாரணை நடத்திவிட்டு, அவரை அனுப்பி விட்டனர்.

இந்த விவகாரம்குறித்து நம்மிடம் பேசிய அந்தப் பகுதியைச் சேர்ந்த இளைஞர்கள் சிலர், ‘‘அருணாச்சலம், காங்கிரஸ் கட்சியின் கடவூர் வடக்கு வட்டாரத் தலைவர். நிஜாமுதீன், அ.தி.மு.க பிரமுகர். அருணாச்சலம் குத்தகைக்கு எடுத்து வெள்ளாமை செய்துவரும் தோட்டத்துக்குள் உள்ளூர் ஆட்கள் எவரையும் அனுமதிக்க மாட்டார்கள். ஆனால், வெளியாட்கள் புழக்கம் மட்டும் அதிகளவில் இருக்கும். அரசல்புரசலாகச் சந்தேகம் எழுந்ததால், அவ்வப்போது உள்ளே எட்டிப் பார்ப்போம். அப்போது, ‘இப்படி ஏன் உத்து உத்துப் பாக்கிறீங்க? நவீனரக துவரைச்செடி போட்டிருக்கிறேன்’ என்று சொல்லி மழுப்புவார் அருணாச்சலம். இப்படி, முழுப்பூசணிக்காயைச் சோற்றில் மறைத்திருக்கிறார்.

அந்தத் தோட்டத்தில் இரண்டு முறை கஞ்சா பயிரிட்டு அறுவடை செய்து, இது மூன்றாவது வெள்ளாமை என்கிறார்கள். இந்தக் கஞ்சாவை தேனி மாவட்டத்தில்தான் விற்பனை செய்வார்களாம். சிறு வியாபாரிகளுக்குள் ஏற்பட்ட தகராறில், இந்தக் கஞ்சா தோட்டம் பற்றிய தகவல் போலீஸ் காதுகள் வரை சென்றுள்ளது.

இப்போதுகூட கஞ்சா அளவை காவல் துறையினர் குறைவாகச் சொல்கின்றனர். அருணாச்சலத்தைக் கைப்பாவையாக வைத்துக்கொண்டு நிஜாமுதீன்தான் கஞ்சா வளர்த்ததாகச் சொல்கிறார்கள். பிரச்னை வந்ததும், அருணாச்சலத்தை வழக்கில் கோத்துவிட்டு எஸ்கேப்பாகப் பார்ப்பதாகவும் பேசிக்கொள்கிறார்கள். நிஜாமுதீனுக்கு எங்கள் ஊரில் நல்லபெயர் இல்லை. நிஜாமுதீனை விசாரணைக்கு அழைத்த போலீஸார், என்ன காரணத்தாலோ அவர்மீது வழக்குப்பதிவு செய்யாமல் விட்டுவிட்டனர்’’ என்றனர்.

நிஜாமுதீனிடம் விளக்கம் கேட்பதற்காக அவரைத் தேடிச் சென்றோம். ஆனால், அவர் எங்கு இருக்கிறார் என்றே தெரியவில்லை. போனும் சுவிட்ச் ஆஃப் செய்யப்பட்டிருந்தது.

கரூர் மாவட்ட எஸ்.பி-யான பாண்டிய ராஜனிடம் பேசினோம். ‘‘கஞ்சா பயிரிட்டதற்காக இரண்டு பேரை கைதுசெய்துள்ளோம். அருணாச்சலத்தைத் தேடிவருகிறோம். இந்த வழக்கை, போதைத் தடுப்புப் பிரிவு போலீஸாரிடம் ஒப்படைத்துவிட்டோம். நிஜாமுதீனுக்கு இந்த வழக்கில் சம்பந்தம் இருப்பதாகத் தெரியவில்லை. இருந்தாலும், விசாரணையின்போது அவர்மீது தவறு இருந்தால், தகுந்த நடவடிக்கை மேற்கொள்ளப்படும். கஞ்சா அளவை சரியாகத்தான் சொல்லியுள்ளோம். ஒன்றரை ஏக்கரில் கஞ்சா பயிரிடப்பட்டாலும், 250 கிலோதான் வருமாம்’’ என்றார்.

இந்த நிலையில், காங்கிரஸ் கட்சியின் கடவூர் வடக்கு வட்டாரத் தலைவராக இருக்கும் அருணாச்சலத்தை, அனைத்து பொறுப்புகளிலிருந்தும் நீக்கி, கரூர் மாவட்ட காங்கிரஸ் கமிட்டித் தலைவர் சின்னசாமி அறிவிப்பு வெளியிட்டுள்ளார்.