Published:Updated:

10 நிமிடங்களில் ரூ.200; ஒரு நாளைக்கு ரூ.8,000; மோசடிக் கும்பலின் வலையில் சிக்கிய நடிகர்!

மோசடி
மோசடி ( Representational Image )

சின்ன மீனைப் போட்டு பெரிய மீன்களைப் பிடிப்பதைப்போல வேலை தேடிக்கொண்டிருக்கும் இளைஞர்களை பெரிய நிறுவனங்களின் பெயரில் மோசடி செய்வதை ஒரு நெட்வொர்க் கும்பல் வழக்கமாக வைத்திருக்கிறது.

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

சென்னை வடபழனியைச் சேர்ந்தவர் சீனிவாசன். இவர் சில திரைப்படங்களில் சிறு, சிறு வேடங்களில் நடித்திருக்கிறார். இது தவிர யூடியூப் மூலம் திருமண நிகழ்ச்சிகளை ஒளிபரப்பும் வேலையைச் செய்துவந்தார். இந்தநிலையில் சீனிவாசனின் செல்போனுக்கு எஸ்.எம்.எஸ் ஒன்று வந்தது. அதில், `பத்து நிமிடங்களில் 200 ரூபாயும், ஒரு நாளைக்கு 8,000 ரூபாய் வரையிலும் சம்பாதிக்க ஆசையா... உடனே தொடர்பு கொள்ளுங்கள்’ என்று ஒரு செல்போன் நம்பர் குறிப்பிடப்பட்டிருந்தது. அந்த நம்பருக்கு சீனிவாசன் தொடர்புகொண்டார். அப்போது சீனிவாசனின் வாட்ஸ்அப் நம்பருக்கு பிரபல ஆன்லைன் வர்த்தகத்தின் பெயரைக் குறிப்பிட்டு அந்த நிறுவனத்தில் வேலைவாய்ப்பு இருப்பதாகத் தகவல் தெரிவிக்கப்பட்டது. அதோடு ஒரு வலைதளத்தின் லிங்க்கும் அனுப்பிவைக்கப்பட்டது.

மும்பை: ரூ.350-க்கு உணவு ஆர்டர் செய்து ரூ.75,000 இழந்த நபர்! - ஓ.டி.பி இல்லாமலே ஆன்லைன் மோசடி
ஆன்லைன் மோசடி
ஆன்லைன் மோசடி

அதை நம்பிய சீனிவாசனும் அந்த லிங்க்குக்குள் சென்றார். அப்போது 500 ரூபாய் மதிப்பிலுள்ள பொருளை முதலீடு செய்து வாங்கி அந்த ஆன்லைன் வர்த்தக நிறுவனத்திடம் கொடுத்தால் அந்தப் பொருளை அவர்கள் கூடுதல் விலைக்கு விற்றுக் கொடுப்பார்கள் என்று லிங்க்கில் குறிப்பிடப்பட்டிருந்தது. அதனால் 500 ரூபாய் மதிப்புள்ள பொருளில் சீனிவாசன் முதலீடு செய்தார். அடுத்த சில நிமிடத்தில் சீனிவாசனின் வங்கிக் கணக்குக்கு 850 ரூபாய் வரவு வைக்கப்பட்டது. அதனால் மகிழ்ச்சியடைந்த சீனிவாசன், 1,000 ரூபாய் மதிப்புள்ள பொருள் மீது முதலீடு செய்தார். அதற்கும் 1,500 ரூபாய் அவருக்குக் கிடைத்தது. அதனால் பெரிய தொகையில் முதலீடு செய்தால் கூடுதல் லாபம் கிடைக்கும் எனக் கருதிய சீனிவாசன் 4,000 ரூபாய் மதிப்புள்ள பொருளில் முதலீடு செய்தார். ஆனால் அதற்குப் பணம் வரவில்லை. அதற்கு பதிலாக `இன்னும் சில பொருள்களின் மீது முதலீடு செய்தால் மட்டுமே லாபத்தை உங்கள் வங்கி கணக்கில் வரவு வைக்க முடியும்’ என குறுஞ்செய்தி வந்தது. அதனால் 10,000 ரூபாய் மதிப்புள்ள பொருளில் சீனிவாசன் முதலீடு செய்தார். அதற்குரிய லாபத் தொகையும் அவருக்குக் கிடைக்கவில்லை. ஏமாற்றம் மட்டுமே மிஞ்சியது.

அதனால் அதிர்ச்சியடைந்த சீனிவாசன், சம்பந்தப்பட்ட செல்போன் நம்பரில் தொடர்புகொண்டு பேசினார். எதிர்முனையில் பேசியவர்கள், "இந்த முதலீட்டில் எட்டு நிலைகள் உள்ளன. அதனால் எட்டு நிலைகள் வரை முதலீடு செய்தால்தான் உங்களுக்கு முழு லாபம் கிடைக்கும்" என்று பதிலளித்திருக்கின்றனர். அதனால் சீனிவாசனும் 97,500 ரூபாய் வரை முதலீடு செய்தார். ஆனால் பணம் வரவில்லை. அதன் பிறகே தான் ஏமாற்றப்பட்டதை உணர்ந்த சீனிவாசன், ஆதாரங்களுடன் வடபழனி காவல் நிலையத்தில் புகாரளித்தார். இது சைபர் குற்றம் என்பதால் தி.நகர் காவல் மாவட்ட துணை கமிஷனர் அலுவலகத்தில் செயல்படும் சைபர் க்ரைம் குற்றப்பிரிவுக்கு மாற்றப்பட்டது. சீனிவாசனை நம்பவைத்து ஏமாற்றியது யாரென்று சைபர் க்ரைம் போலீஸார் விசாரணை நடத்திவருகின்றனர்.

ஆன்லைன்
ஆன்லைன்

இது குறித்து சைபர் க்ரைம் போலீஸார் கூறுகையில், ``சைபர் க்ரைம் மோசடியில் இது புது டெக்னிக். வேலைக்காக இணையதளங்களில் பதிவுசெய்பவர்களைக் குறிவைத்து இந்த மோசடிக் கும்பல் கைவரிசை காட்டிவருகிறது. சம்பந்தப்பட்டவர்களின் செல்போன் நம்பருக்கு பிரபல ஆன்லைன் வர்த்தக நிறுவனங்களில் பெயரில் குறுஞ்செய்திகளை முதலில் அனுப்பிவைக்கும் இந்த மோசடிக் கும்பல், அதன் பிறகு 500 ரூபாயில் தொடங்கி லட்சக்கணக்கான ரூபாய் மதிப்புள்ள பொருள்களில் முதலீடு செய்யும்படி ஆசையைத் தூண்டி மோசடியில் ஈடுபட்டுவருகிறது. 1,000 ரூபாய் வரையில் உடனடியாக லாபத்தொகையை சம்பந்தப்பட்டவர்களின் வங்கிக் கணக்கில் வரவுவைத்து நம்பிக்கையை ஏற்படுத்திவிட்டு, பெரிய தொகையில் முதலீடு செய்யும்போது ஏமாற்றிவிடுவார்கள். எனவே, இது போன்ற மோசடிக் கும்பலின் வலையில் யாரும் சிக்க வேண்டாம்" என்றனர்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு