Published:Updated:

`உடும்பு, மலைப்பாம்பு, மரநாய் வேட்டை!’ - ஆரல்வாய்மொழியில் போட்டோ, வீடியோவால் சிக்கிய 2 பேர்

மலைப்பாம்பு வேட்டையாடியபோது
மலைப்பாம்பு வேட்டையாடியபோது

தொடர்ச்சியாக இவர்கள் மலைப்பாம்பு, மரநாய், உடும்பு, ஆமை உளிட்டவற்றைச் சமைத்து சாப்பிட்டுள்ளனர். வனவிலங்கு சட்டம் 1972, ஷெட்யுல் ஒன் அடிப்படையில் இந்தக் குற்றத்துக்குத் தண்டனை அதிகம்.

கன்னியாகுமரியை அடுத்த அச்சங்குளம் பகுதி பறவைகள் சரணாலயமாகக் கண்டறியப்பட்டுள்ளது. அங்குள்ள குளத்தின் கரையில் வசிக்கும் பறவைகளுக்கோ, நீர் வாழ் உயிரினங்களுக்கோ யாரும் இடையூறு செய்யக்கூடாது எனவும் அறிவிக்கப்பட்டுள்ளது. இந்தநிலையில் அச்சன்குளம் குளத்தில் வலையைப் பயன்படுத்தி மீன் பிடிப்பதாக வனத்துறையினருக்கு தகவல் கிடைத்தது. வனத்துறையினர் அங்கு சென்றபோது ஒருவர் மீன்பிடிக்க வலை போட்டிருந்ததைக் கண்டுபிடித்தனர். அவரை பிடித்து விசாரணை நடத்தியதில் அவரது பெயர் மாணிக்க ராஜ் எனத் தெரியவந்தது. வனத்துறை சட்டப்படி அவர் மீன் பிடித்தது தவறு எனக்கூறி அவருக்கு அதிகாரிகள் 25,000 ரூபாய் அபராதம் விதித்தார்கள். பின்னர் அவர் விடுவிக்கப்பட்டார். மேலும், அதேபகுதியில் சந்தேகத்துக்கு இடமாக நின்றுகொண்டிருந்த இன்னொருவரை பிடித்து ஆரல்வாய்மொழி வனத்துறை அலுவலகத்தில் வைத்து விசாரணை நடத்தினர்.

வனத்துறை அதிகாரிகளால் கைது செய்யப்பட்ட சிவக்குமார், தினேஷ்தாவீது
வனத்துறை அதிகாரிகளால் கைது செய்யப்பட்ட சிவக்குமார், தினேஷ்தாவீது

விசாரணையில் அவரது பெயர் சிவக்குமார் எனத் தெரியவந்தது. மேலும், அவரிடம் தொடர்ந்து விசாரணை நடத்தியபோது முன்னுக்குபின் முரணாகத் தகவல் கூறினார். வனத்துறையினர் சிவக்குமாரின் மொபைல் போனை வாங்கி சோதித்தனர். அதில் வனத்துறைச் சட்டம் 1972-ன்படி அட்டவணைப்படுத்தப்பட்ட மலைப்பாம்பு, மரநாய், உடும்பு போன்ற விலங்குகளை வேட்டையாடிய புகைப்படங்களும். அவற்றை சமைத்த புகைப்படங்கள், வீடியோக்கள் இருந்தன.

புகைப்படங்கள் மற்றும் வீடியோக்கள் அடிப்படையில் சிவக்குமாரிடம் கிடுக்கிப்பிடி விசாரணை நடத்தினர் வனத்துறை அதிகாரிகள். அப்போது அவர் வேட்டையாடியது உண்மை எனவும், ஆமை உள்ளிட்டவற்றைப் பிடித்து சமைத்து சாப்பிட்டதையும் ஒப்புக்கொண்டிருக்கிறார். மேலும், அவர் சொன்ன தகவல் அடிப்படையில் அவருடன் சேர்ந்து வேட்டையில் ஈடுபட்ட தினேஷ் தாவீது என்பவரையும் வனத்துறையினர் கைது செய்தனர்.

வேட்டையாடப்பட்ட உடும்பு
வேட்டையாடப்பட்ட உடும்பு

இதுகுறித்து வனத்துறை அதிகாரிகள் கூறுகையில்,``சிவக்குமார் மற்றும் தினேஷ் தாவீது ஆகியோர் கன்னியாகுமரியை அடுத்த மருத்துவாழ்மலை பகுதியில் வசித்துவருகின்றனர். தொடர்ச்சியாக இவர்கள் மலைப்பாம்பு, மரநாய், உடும்பு, ஆமை உளிட்டவற்றைச் சமைத்து சாப்பிட்டுள்ளனர். வனவிலங்கு சட்டம் 1972, ஷெட்யுல் ஒன் அடிப்படையில் இந்தக் குற்றத்துக்கு தண்டனை அதிகம். அவர்களை கோர்ட்டில் ஆஜர்படுத்தி சிறையில் அடைத்துள்ளோம்" என்றனர்.

அடுத்த கட்டுரைக்கு