Published:Updated:

சென்னை: `டாடி என்னைக் கடத்தியது நம்ம ஹரிகரன்தான்!' - புத்திசாலி மாணவனால் சிக்கிய கும்பல்

கடத்தல் வழக்கில் சிக்கிய ஹரிகரன், விக்னேஷ், சரத்குமார்
News
கடத்தல் வழக்கில் சிக்கிய ஹரிகரன், விக்னேஷ், சரத்குமார்

சென்னை தாம்பரத்தில் ஹோட்டல் உரிமையாளரின் மகனைக் கடத்தி பணம் கேட்டு மிரட்டிய கடத்தல் கும்பல், தொழிலுக்குப் புதியவர்கள் என்பதால் வசமாக போலீஸாரிடம் சிக்கிக்கொண்டது.

மாணவன் கடத்தல்

தாம்பரத்தை அடுத்த முடிச்சூர் ரோடு, மதனபுரத்தைச் சேர்ந்தவர் தங்கராஜ். இவர் முடிச்சூர் சாலையில் ஹோட்டல் நடத்திவருகிறார். இவரின் மகன் நவஜீவன் (15) தனியார் பள்ளியில் 11-ம் வகுப்பு படித்துவருகிறார். 28-ம் தேதி நவஜீவன், பைக்கில் மதனபுரம் சாலையில் சென்றிருக்கிறார். அப்போது அவரை வழிமறித்த மூன்று பேர் அவர காரில் கடத்தினர். பின்னர் தங்கராஜைத் தொடர்புகொண்டு, `உன் மகன் உயிரோடு வேண்டுமென்றால், 5 லட்சம் ரூபாய் கொடு’ என மிரட்டினர்.

கடத்தல்
கடத்தல்
representational image

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

அதைக் கேட்டு அதிர்ச்சியடைந்த தங்கராஜ் பீர்க்கன்காரணை காவல் நிலையத்தில் புகாரளித்தார். அதன்பேரில் தாம்பரம் கூடுதல் உதவி கமிஷனர் அசோகன் மேற்பார்வையில் உதவி கமிஷனர் சகாதேவன், இன்ஸ்பெக்டர் விவேகானந்தன் தலைமையில் போலீஸார் சிசிடிவி கேமரா பதிவுகளை ஆய்வு செய்தனர். அப்போது காரின் பதிவு நம்பரைக் கண்டுபிடித்த போலீஸார் அது தொடர்பாக விசாரித்தனர். மேலும், செல்போன் டவர் மூலம் மிரட்டல் விடுத்தவர்களின் செல்போன் நம்பர்களை ட்ரேஸ் செய்தனர்.

களமிறங்கிய போலீஸ் டீம்

போலீஸாரின் துரிதமான நடவடிக்கையால் நவஜீவனைக் கடத்திய கார், செங்கல்பட்டு நோக்கிச் செல்வதை போலீஸார் கண்டறிந்தனர். உடனடியாக செங்கல்பட்டு எஸ்.பி கண்ணனுக்கு தகவல் தெரிவிக்கப்பட்டது. எஸ்.பி அலுவலகத்திலிருந்து மறைமலைநகர் இன்ஸ்பெக்டர் நந்தகுமாருக்கு மாணவன் கடத்தல் குறித்த தகவல் கூறப்பட்டது. உடனடியாக மறைமலைநகர் போலீஸார் காரை எதிர்பார்த்துக் காத்திருந்தனர். மறைமலைநகர் அருகே கார் வந்ததும், அதை போலீஸார் மடக்கினர். காரிலிருந்த நவஜீவன் மற்றும் அவரைக் கடத்தியவர்களை போலீஸார் காவல் நிலையத்துக்கு அழைத்துச் சென்று விசாரித்தனர். விசாரணையில் திடுக்கிடும் தகவல்கள் வெளியாகின.

கடத்தல்
கடத்தல்
representational image

இது குறித்து பீர்க்கன்காரணை போலீஸார் கூறுகையில், ``தங்கராஜின் உணவகத்தில் ஹரிகரன் (21) என்பவர் வேலைபார்த்தார். அப்போது அவர் ஒரு பெண்ணை ஒருதலையாகக் காதலித்திருக்கிறார். இது தொடர்பான ஒரு பிரச்னையில் தங்கராஜ், ஊழியர் ஹரிகரனை வேலையைவிட்டு நிறுத்திவிட்டார். அதனால் கோபமடைந்த ஹரிகரன், தங்கராஜைப் பழிவாங்கத்தான் அவரின் மகன் நவஜீவனை நண்பர்களோடு சேர்ந்து கடத்தியிருக்கிறார். இந்த வழக்கில் விக்னேஷ் (20), கார் டிரைவர் சரத்குமார் (29) ஆகியோரை போலீஸார் கைது செய்தனர். கடத்தலுக்குப் பயன்படுத்தப்பட்ட காரையும் போலீஸார் பறிமுதல் செய்தனர். தற்போது ஹரிகரன் உளுந்தூர்பேட்டையிலுள்ள ஹோட்டலில் வேலை பார்த்துவருகிறார். மாணவன் கடத்தப்பட்ட ஐந்து மணி நேரத்துக்குள் மீட்டிருக்கிறோம்" என்றனர்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பொய் சொல்றீங்க!

தங்கராஜ் கொடுத்த புகாரில், `` நான் ஹோட்டலில் இருந்தபோது 28-ம் தேதி காலை 11 மணியளவில் என்னுடைய செல்போன் நம்பருக்கு ஒருவர் போன் செய்தார். அதில் பேசியவர், `உங்கள் மகனை முடிச்சூர் மதனபுரம் மெயின் ரோட்டில் பைக்கில் வரும்போது நாங்கள் வழிமறித்து கடத்தியிருக்கிறோம். 5 லட்சம் ரூபாய் கொடுத்தால், உங்கள் மகனை உயிரோடு விட்டுவிடுகிறோம். சீக்கிரம் பணத்தை ரெடி பண்ணி தாம்பரம் பஸ் ஸ்டாண்டு வந்து போன் செய்யுங்கள். போலீஸுக்குப் போனால் உங்கள் மகனைக் கொன்று விடுவோம்’ என்று மிரட்டினார். நான் உடனே, `நீங்க பொய் சொல்றீங்க, என் பையன் வீட்டில்தான் இருக்கான்’ என்று கூறினேன். அதற்கு அவன், `உங்கள் மகனிடமே பேசுங்கள்’ என்று செல்போனை நவஜீவனிடம் கொடுத்தார். நான் என் மகனின் குரல் கேட்டவுடன் அதிர்ச்சியடைந்து அவனிடம், `என்ன நடந்தது?’ என்று கேட்டேன். அப்போது அவன், `நான் கடைக்கு வரும்போது என்னை மூன்று பேர் வழிமறித்து டிஎன் 31 bb 6363 என்ற வெள்ளை நிற காரில் ஏற்றி வண்டலூர் கொண்டு சென்றார்கள். அந்த மூன்று பேரில் ஒருவர் நம்மிடம் வேலை பார்த்த ஹரிகரன். நான் பயந்து `என்னை வீட்டில் கொண்டு போய் விடுங்கள். இல்லையென்றால், சத்தம் போடுவேன்’ என்றேன். உடனே ஹரிகரன் கத்தியைக் காட்டி சத்தம் போட்டால் கொன்று விடுவதாக மிரட்டினான்.

எப்ஐஆர்
எப்ஐஆர்

எனக்கு மிகவும் பயமாக இருக்கிறது’ என்று கூறும்போதே செல்போன் இணைப்பு துண்டிக்கப்பட்டது. ஹரிகரன் என்பவர், ஏற்கெனவே இரண்டு ஆண்டுகளுக்கு முன்னர் சுமார் ஆறு மாதங்கள் கடையில் வேலை பார்த்தவர். நெல்லை மாவட்டம், அம்பாசமுத்திரம், விக்கிரமசிங்கபுரத்தைச் சேர்ந்த ஜெயம் என்பவரின் மகன். ஹரிகரனின் பழக்க வழக்கம் சரியில்லாமல் இருந்ததால் அவரை வேலையைவிட்டு நிறுத்திவிட்டேன். எனவே, என் மகனைக் கடத்தி, கொலை மிரட்டல் விடுத்து, பணம் கேட்டு மிரட்டும் ஹரிகரன் மற்றும் அவருடைய கூட்டாளிகள்மீது நடவடிக்கை எடுத்து என் மகனை மீட்டுத் தருமாறு கேட்டுக்கொள்கிறேன’’ என்று குறிப்பிட்டிருந்தார். புகாரின்பேரில் இன்ஸ்பெக்டர் விவேகானந்தன், இந்திய தண்டனைச் சட்டம் 341, 364 A, 506 (2) ஆகிய பிரிவுகளின்கீழ் வழக்கு பதிவு செய்து ஹரிகரன், விக்னேஷ், சரத்குமார் ஆகிய மூன்று பேரையும் சிறையிலடைத்தார்.

மகனை மீட்டதும் தங்கராஜும், அவரின் மனைவி ராஜகுமாரியும் நவஜீவனைக் கட்டிப்பிடித்து காவல் நிலையத்திலேயே முத்தம் கொடுத்தனர். பின்னர் மகனை மீட்டுக்கொடுத்த போலீஸாருக்கு தங்கராஜ் கண்ணீர்மல்க நன்றி தெரிவித்தார்.

பள்ளி மாணவன், காரில் கடத்தப்பட்டபோது பதற்றப்படாமல் புத்திச்சாலித்தனமாக காரின் பதிவு நம்பர், கடத்தியவர்கள் குறித்த விவரங்களை செல்போனில் தந்தையிடம் பகிர்ந்ததாக எஃப்.ஐ.ஆரில் பதிவு செய்யப்பட்டுள்ளது. இந்தச் சம்பவம் தாம்பரத்தில் பரபரப்பை ஏற்படுத்தியது.