Published:Updated:

கோவளம்: வெளிநாட்டுப் பெண் வன்கொடுமை செய்யப்பட்ட வழக்கு; `கைதான இருவரும் குற்றவாளிகள்’ - நீதிமன்றம்

குற்றவாளிகள்

சுற்றுலா வழிகாட்டி என அறிமுகமான உமேஷ், உதயகுமார் ஆகியோர் ஆட்டோவில் அழைத்துச் சென்று, வெளிநாட்டுப் பெண்ணுக்கு போதைப்பொருள் கொடுத்து புதர்க் காட்டில் வைத்து பாலியல் வன்கொடுமை செய்துள்ளனர்.

கோவளம்: வெளிநாட்டுப் பெண் வன்கொடுமை செய்யப்பட்ட வழக்கு; `கைதான இருவரும் குற்றவாளிகள்’ - நீதிமன்றம்

சுற்றுலா வழிகாட்டி என அறிமுகமான உமேஷ், உதயகுமார் ஆகியோர் ஆட்டோவில் அழைத்துச் சென்று, வெளிநாட்டுப் பெண்ணுக்கு போதைப்பொருள் கொடுத்து புதர்க் காட்டில் வைத்து பாலியல் வன்கொடுமை செய்துள்ளனர்.

Published:Updated:
குற்றவாளிகள்

லாட்வியா (Latvia) நாட்டைச் சேர்ந்த 40 வயது பெண் மன அழுத்த நோய்க்காக கேரள மாநிலம், திருவனந்தபுரத்தை அடுத்த போத்தன்கோட்டில் ஆயுர்வேத சிகிச்சை பெற்றுவந்தார். ஆயுர்வேத மையத்தில் தங்கி சிகிச்சை எடுத்துவந்த அந்தப் பெண் 2018-ம் ஆண்டு, மார்ச் மாதம் 14-ம் தேதி வாக்கிங் சென்ற சமயத்தில் காணாமல் போனார். இது குறித்து அவரின் சகோதரி இலீஸ், போலீஸில் புகார் கொடுத்தார். மேலும், அந்தப் பெண்ணின் கணவர் ஆண்ட்ரூஸ் கேரள டி.ஜி.பி-யைச் சந்தித்து புகார் அளித்தார். ஆரம்பத்தில் போலீஸ் விசாரணையில் சுணக்கம் ஏற்பட்டதாகச் சொல்லப்பட்டது. இதையடுத்து அந்தப் பெண்ணின் சகோதரி மீடியாக்களைச் சந்தித்தார். அதன் பின்னர் போலீஸ் விசாரணை வேகம்பெற்றது. இதையடுத்து 38 நாள்களுக்குப் பிறகு வாழமுட்டம் மாங்குரோவ் காட்டுக்குள் காணாமல்போன பெண்ணின் உடல் அழுகிய நிலையில் கண்டெடுக்கப்பட்டது. டி.என்.ஏ பரிசோதனை மூலம் அது லாட்வியா நாட்டுப் பெண்ணின் உடல் என்று உறுதிசெய்யப்பட்டது.

குற்றவாழியாக அறிவிக்கப்பட்ட உமேஷ்
குற்றவாழியாக அறிவிக்கப்பட்ட உமேஷ்

போலீஸார் விசாரணை நடத்தியதில் நடைபயிற்சிக்காகச் சென்ற அந்தப் பெண்ணிடம், `சுற்றுலா வழிகாட்டி’ என அறிமுகமான உமேஷ், உதயகுமார் ஆகியோர் ஆட்டோவில் அழைத்துச்சென்றிருக்கின்றனர். பின்னர், அவருக்கு போதைப்பொருள் கொடுத்து புதர்க் காட்டுக்குள் கொண்டு சென்று பாலியல் வன்கொடுமை செய்துள்ளனர். இதை அவர் வெளியில் சொல்லிவிடுவார் என நினைத்து கழுத்தை நெரித்துக் கொலை செய்ததும் போலீஸ் விசாரணையில் தெரியவந்தது. உமேஷ், உதயகுமார் ஆகியோர் சுற்றுலா வழிகாட்டிகள் என்ற போர்வையில் போலியாகச் சுற்றிவந்து பல குற்றங்கள் செய்திருப்பது தெரியவந்தது.

குற்றவாளியாக அறிவிக்கப்பட்ட உதயகுமார்
குற்றவாளியாக அறிவிக்கப்பட்ட உதயகுமார்

கொலையைக் கண்ணால் கண்ட சாட்சிகள் இல்லாத நிலையில் அறிவியல்பூர்வமான பல ஆதாரங்களை போலீஸார் திரட்டினர். இந்த வழக்கு அந்தச் சமயத்தில் பெரும் பரபரப்பை ஏற்படுத்தியிருந்தது. இந்த வழக்கு திருவனந்தபுரம் பிரின்ஸ்பல் செஷன்ஸ் கோர்ட்டில் நடந்துவந்தது. சுமார் நான்கரை ஆண்டுகளாக நடந்த இந்த வழக்கில் நேற்று தீர்ப்பு கூறப்பட்டது. அதில் உமேஷ், உதயகுமார் ஆகியோர் குற்றவாளிகள் என கோர்ட் அறிவித்தது. அவர்களுக்கான தண்டனை வரும் திங்கள்கிழமை அறிவிக்கப்படும் எனவும் கோர்ட் தெரிவித்திருக்கிறது. தனது சகோதரிக்கு நீதி கிடைத்திருப்பதாக இலீஸ் தெரிவித்திருக்கிறார்.