Published:Updated:

``ஐ.எஃப்.எஸ் நிதி நிறுவன நிர்வாகிகளுக்கு லுக்-அவுட் நோட்டீஸ்!" - எஸ்.பி ஜெயசந்திரன் தகவல்

ஐ.எஃப்.எஸ் நிதி நிறுவனம்

மோசடி வழக்கில் தொடர்புடைய ஐ.எஃப்.எஸ் நிதி நிறுவனத்தைச் சேர்ந்தவர்கள் வெளிநாட்டுக்கு தப்பிச் செல்லாமலிருக்க லுக்-அவுட் நோட்டீஸ் கொடுக்கப்பட்டிருப்பதாக பொருளாதார குற்றப்பிரிவின் எஸ்.பி ஜெயசந்திரன் தகவல் தெரிவித்திருக்கிறார்.

``ஐ.எஃப்.எஸ் நிதி நிறுவன நிர்வாகிகளுக்கு லுக்-அவுட் நோட்டீஸ்!" - எஸ்.பி ஜெயசந்திரன் தகவல்

மோசடி வழக்கில் தொடர்புடைய ஐ.எஃப்.எஸ் நிதி நிறுவனத்தைச் சேர்ந்தவர்கள் வெளிநாட்டுக்கு தப்பிச் செல்லாமலிருக்க லுக்-அவுட் நோட்டீஸ் கொடுக்கப்பட்டிருப்பதாக பொருளாதார குற்றப்பிரிவின் எஸ்.பி ஜெயசந்திரன் தகவல் தெரிவித்திருக்கிறார்.

Published:Updated:
ஐ.எஃப்.எஸ் நிதி நிறுவனம்

வேலூரைத் தலைமையிடமாகக் கொண்டு செயல்பட்ட எல்.என்.எஸ் ஐ.எஃப்.எஸ் நிதி நிறுவனத்தின் மோசடி குறித்து தொடர்ந்து ஜூனியர் விகடன், விகடன் டாட் காமில் எழுதி வருகிறோம். சம்பந்தப்பட்ட நிதி நிறுவனத்தின்மீது எஃப்.ஐ.ஆர் பதிவுசெய்த பொருளாதார குற்றப்பிரிவு போலீஸார், அதிரடி சோதனை நடத்தி தங்கம், பணம், ஆவணங்களைப் பறிமுதல் செய்தனர். இந்த நிலையில் சென்னை அசோக் நகரில் பொருளாதார குற்றப்பிரிவின் எஸ்.பி ஜெயசந்திரன், பத்திரிகையாளர்களுக்கு பேட்டி அளித்தார்.

அப்போது பேசிய அவர், ``மத்திய அரசின் முறைப்படுத்தப்படாத முதலீடு தடுப்புச் சட்டம் 2019-ன் அடிப்படையில் மோசடியாக செயல்படும் நிதி நிறுவனங்கள்மீது வழக்கு பதிவுசெய்யப்பட்டு வருகிறது. அதனால் அதிக வட்டி தருவதாகக் கூறி ஏமாற்றும் நிதி நிறுவனங்களில் பொதுமக்கள் முதலீடு செய்யவேண்டாம். மேலும் மோசடியில் ஈடுபடும் நிதி நிறுவனங்களில் பொருளாதார குற்றப்பிரிவு போலீஸார் அதிரடியாக சோதனை நடத்திவருகிறார்கள். ஆருத்ரா கோல்டு ட்ரேடிங் நிறுவனம் ஒரு லட்சம் ரூபாய் முதலீடு செய்தால் மாதம் 30 ஆயிரம் ரூபாய் தருவதாகக்கூறி சுமார் 90 ஆயிரம் பேரிடம் முதலீடுகளைப் பெற்று மோசடி செய்தது தெரியவந்திருக்கிறது.

எஸ்.பி - ஜெயசந்திரன்
எஸ்.பி - ஜெயசந்திரன்

ஆருத்ரா கோல்டு ட்ரேடிங் நிறுவனம் தொடர்புடைய எட்டு நிர்வாகிகள்மீது வழக்கு பதிவுசெய்யப்பட்டிருக்கிறது. விசாரணையில் அந்த நிறுவனம் எவ்வளவு மோசடி செய்தது என்பது கண்டுபிடிக்கப்பட்டிருக்கிறது. இதையடுத்து வேலூரை தலைமையிடமாகக் கொண்டு செயல்பட்ட இன்டர்நேஷனல் பைனான்ஸ் சர்விஸ் (ஐ.எஃப்.எஸ்) என்ற நிதி நிறுவனம் ஒரு லட்சம் ரூபாய் முதலீடு செய்தால் மாதம் 8,000 ரூபாய் தருவதாகக்கூறி சுமார் ஒரு லட்சம் பேரிடம் 6,000 கோடி அளவுக்கு முதலீடுகளைப் பெற்று மோசடி செய்தது விசாரணையில் தெரியவந்திருக்கிறது. சம்பந்தப்பட்ட நிறுவனத்தின் ஐந்து நிர்வாகிகள்மீது வழக்கு பதிவுசெய்யப்பட்டிருக்கிறது.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

திருச்சியை தலைமை இடமாகக் கொண்டு செயல்பட்ட எல்பின் என்ற நிறுவனம் 5,000 பேரிடம் முதலீடுகளைப் பெற்று சுமார் 400 கோடி ரூபாய் அளவில் மோசடி செய்த புகாரில் வழக்கு பதிவுசெய்து விசாரணை நடந்து வருகிறது. இந்த மூன்று நிறுவனங்களும் மொத்தமாக 8,265 கோடி ரூபாய் அளவில் பொதுமக்களிடம் பணத்தை வசூல் செய்து மோசடி செய்திருக்கின்றன. பாதிக்கப்பட்டவர்களுக்கு பணத்தை திருப்பிக் கொடுக்கும் நடவடிக்கையில் பொருளாதார குற்றப்பிரிவு அதிகாரிகள் ஈடுபட்டு வருகின்றனர், அதன்படி ஆருத்ரா கோல்ட் ட்ரேடிங் நிறுவனத்துக்குச் சொந்தமான 85 கோடி ரூபாய் பணத்தை முடக்கி... 150 கோடி ரூபாய் அளவிலான சொத்துகள் அடையாளம் கண்டிருப்பதாகவும் தெரிவித்திருக்கின்றனர்.

பேட்டி
பேட்டி

எல்பின் இ காம் நிறுவனம் தொடர்பான 100 கோடி ரூபாய் சொத்துகள் அடையாளம் கண்டுபிடிக்கப்பட்டிருக்கின்றன. ஆருத்ரா கோல்ட் ட்ரேடிங், இன்டர்நேஷனல் பைனான்ஸ் சர்வீஸ், எல்பின் நிறுவனங்கள் தொடர்பாக வழக்கு பதிவுசெய்யப்பட்ட நிர்வாகிகள் வெளிநாட்டுக்கு தப்பிச் செல்லாமலிருக்க லுக்-அவுட் நோட்டீஸ் கொடுக்கப்பட்டிருக்கிறது. தொடர்ந்து இந்த மூன்று நிறுவனங்களின் வங்கிக் கணக்குகள், முதலீடுகள், அசையும் மற்றும் அசையா சொத்துகளை கண்டுபிடிக்கும் பணி நடந்து வருகிறது. அவர்களின் பினாமிகள் குறித்த தகவல்களும் சேகரிக்கப்பட்டு வருகின்றன. சொத்துகள் முடக்கப்பட்டு சிறப்பு நீதிமன்றத்தில் ஒப்படைக்கப்படும். முடக்கப்பட்ட சொத்துகளை மதிப்பீடு செய்து ஏலம் விடப்பட்டு, அரசு அதிகாரிகள் கொண்ட குழு மூலம் இந்த மூன்று நிறுவனங்களில் முதலீடு செய்தவர்களின் ஆவணங்களை சரிபார்த்து பணம் திருப்பிக் கொடுக்கப்படும். தமிழ்நாட்டில் மட்டும் கடந்த மூன்று ஆண்டுகளில் மோசடியில் ஈடுபட்ட நிறுவனங்கள்மீது 124 வழக்குகள் பதிவுசெய்யப்பட்டிருக்கின்றன" என்றார்.