Published:Updated:

திருவாரூர்: குழந்தைக்குப் பாலியல் தொந்தரவு; இளைஞருக்கு 10 ஆண்டுகள் சிறைத் தண்டனை!

பாலியல் வன்கொடுமை - Representational Image
பாலியல் வன்கொடுமை - Representational Image

திருவாரூர் மாவட்டத்தில் இதுவரை பதிவாகியுள்ள அனைத்து போக்சோ வழக்குகளிலும், சம்பந்தப்பட்ட குற்றவாளிகளுக்கு உரிய தண்டனை கிடைக்க தொடர் நடவடிக்கை மேற்கொள்ளப்பட்டுவருகிறது.

திருவாரூர் மாவட்டம், கூத்தாநல்லூர் பகுதியில் ஒரு குழந்தைக்குப் பாலியல் தொந்தரவு கொடுத்த குற்றச்சாட்டில் கைதுசெய்யப்பட்ட இளைஞருக்கு, திருவாரூர் மகிளா நீதிமன்றம் போக்சோ சட்டத்தின் கீழ் பத்தாண்டுகள் சிறைத் தண்டனையும், 5,000 ரூபாய் அபராதமும் விதித்து தீர்ப்பளித்திருக்கிறது.

திருவாரூர்
திருவாரூர்

திருவாரூர் மாவட்டம், கூத்தாநல்லூர் காவல் சரகத்துக்கு உட்பட்ட சேகரை பகுதியைச்சேர்ந்தவர் மூர்த்தி. இவருடைய மகன் விஜய். 22 வயதான விஜய் கடந்த 2019-ம் ஆண்டு, மே மாதம் 27-ம் தேதி, அதே பகுதியைச் சேர்ந்த, மூன்று வயதே நிரம்பிய பெண் குழந்தைக்குப் பாலியல் தொந்தரவு கொடுத்ததாக அதிர்ச்சிகரமான குற்றச்சாட்டு எழுந்தது. அந்தச் சம்பவம் கூத்தாநல்லூர் பகுதி மக்களிடையே பெரும் கொந்தளிப்பை ஏற்படுத்தியது.

பச்சிளம் குழந்தையிடம் கொடூரமாக நடந்துகொண்ட இளைஞர் விஜய் மீது காவல்துறையினர் உடனடியாகக் கடுமையான நடவடிக்கை எடுத்து, சட்டப்படி தண்டிக்கப்பட வேண்டும் என வலியுறுத்தினார்கள். அது தொடர்பாக திருவாரூர் அனைத்து மகளிர் காவல் நிலையத்தில் கடந்த 28.05.19 அன்று வழக்கு பதிவு செய்யப்பட்டு புலன் விசாரணை முடித்து நீதிமன்றத்தில் குற்றப்பத்திரிக்கை தாக்கல் செய்யப்பட்டது.

பாலியல் வன்கொடுமை
பாலியல் வன்கொடுமை

இந்தநிலையில், வழக்கை விசாரித்த திருவாரூர் மகிளா நீதிமன்றம், இளைஞர் விஜய்க்கு பத்து ஆண்டுகள் சிறைத்தண்டனையும் 5,000 ரூபாய் அபராதமும் விதித்து தீர்ப்பளித்துள்ளது. இந்தத் தீர்ப்பைத் தொடர்ந்து இளைஞர் விஜய்யை திருவாரூர் அனைத்து மகளிர் காவல்துறையினர் சிறையில் அடைத்தனர். சிறப்பாகப் புலன்விசாரணை செய்து குற்றவாளிக்கு தண்டனை பெற்றுத்தந்த அனைத்து மகளிர் காவல்துறையினருக்கு திருவாரூர் மாவட்ட காவல் கண்காணிப்பாளர் விஜயகுமார் பாராட்டு தெரிவித்தார். மேலும் இது போன்ற பாலியல் தாக்குதலில் ஈடுபடும் நபர்கள் மீது கடுமையான சட்டபூர்வ நடவடிக்கை எடுக்கப்படும் என எச்சரிக்கை செய்துள்ளார். திருவாரூர் மாவட்டத்தில் இதுவரை பதிவாகியுள்ள அனைத்து போக்சோ வழக்குகளிலும், சம்பந்தப்பட்ட குற்றவாளிகளுக்கு உரிய தண்டனை கிடைக்கத் தொடர் நடவடிக்கை மேற்கொள்ளப்பட்டுவருகிறது எனவும் தெரிவித்தார்.

அடுத்த கட்டுரைக்கு