Published:Updated:

இன்ஜினீயர் சுஜி மீது பாய்ந்த குண்டர் சட்டம்! - கந்துவட்டி புகாரில் ஹார்லி டேவிட்சன் பைக் பறிமுதல்

சுஜி என்கிற காசி
சுஜி என்கிற காசி

இரண்டு லட்ச ரூபாய்க்கு பிணையாக டிராவிட்டின் ஆறு லட்ச ரூபாய் மதிப்புள்ள ஹார்லி டேவிட்சன் மோட்டார் சைக்கிளை சுஜி வாங்கிக் வைத்துள்ளார்.

சென்னை பெண் மருத்துவர் உட்பட பல பெண்களை காதலிப்பதாக ஏமாற்றி மோசடி செய்த வழக்கில் நாகர்கோவிலைச் சேர்ந்த காசி என்ற சுஜி கைது செய்யப்பட்டுள்ளார். அவர் மீது மற்றொரு பெண் நாகர்கோவில் நேசமணி நகர் காவல் நிலையத்தில் புகார் அளித்ததன் அடிப்படையில் வழக்கு பதிவு செய்யப்பட்டுள்ளது. சுஜி மீது மேலும் பெண்கள் புகார் அளிக்க வாய்ப்பு உள்ளதால் அவர் மீது குண்டர் சட்டத்தின் கீழ் வழக்கு பதிவு செய்ய வேண்டும் என காவல்துறை சார்பில் குமரி மாவட்ட ஆட்சியர் பிரசாந்த் மு.வடநேரேயிடம் கோரிக்கை வைத்தனர். இதைத்தொடர்ந்து பெண்களின் வாழ்க்கையை சீரழித்த சுஜி மீது குண்டர் சட்டம் பாய்ந்தது. மேலும், சுஜியை காவலில் எடுத்து விசாரணை நடத்த காவல்துறையினர் முயன்று வருகின்றனர். இந்த நிலையில், சுஜி மீது ஒருவர் கந்துவட்டி புகார் அளித்துள்ளார். அதன் அடிப்படையில் வடசேரி போலீஸார் வழக்கு பதிவு செய்ததுடன், அவரிடம் இருந்த ஹார்லி டேவிட்சன் பைக்கையும் கைப்பற்றினர்.

சுஜி
சுஜி

இதுகுறித்து போலீஸ் தரப்பில் கூறுகையில், ``நாகர்கோவிலைச் சேர்ந்த டிராவிட் என்பவர் பிரின்டிங் பிரஸ் தொழில் நடத்தி வருகிறார். இவர் கடந்த 2018-ம் ஆண்டு சுஜியிடம் இரண்டு லட்சம் ரூபாய் வட்டிக்கு கடன் பெற்றுள்ளார். அந்தப் பணத்துக்கு சுஜி கந்து வட்டியும் வசூல் செய்து வந்துள்ளார். அதுமட்டுமல்லாது அந்த இரண்டு லட்சம் ரூபாய்க்கு பிணையாக டிராவிட்டின் ஆறு லட்சம் ரூபாய் மதிப்புள்ள ஹார்லி டேவிட்சன் மோட்டார் சைக்கிளை சுஜி வாங்கி வைத்துள்ளார்.

குறிப்பிட்டக் காலத்துக்குப் பிறகு டிராவிட் வட்டிக்குப் பெற்ற இரண்டு லட்சம் ரூபாய்க்கு வட்டியுடன் சேர்த்து அசலையும் கொடுத்துள்ளார். பணத்தை செட்டில் செய்துவிட்டு அடமானமாக வைத்த மோட்டார் சைக்கிளை திருப்பிக் கேட்டுள்ளார். ஆனால், சுஜி பைக்கை கொடுக்காமல் அவரை மிரட்டியுள்ளாராம். பின்னர் அந்த பைக்கை சுஜி தன் பெயருக்கு மாற்றியுள்ளார். சுஜி மீதான பயத்தில் இதுவரை அவர் புகார் அளிக்காமல் இருந்துள்ளார்.

பறிமுதல்செய்யப்பட்ட பைக்
பறிமுதல்செய்யப்பட்ட பைக்

இந்த நிலையில், சுஜி பெண்களை ஏமாற்றி மோசடி செய்ததாக கைது செய்யப்பட்டதைத் தொடர்ந்து டிராவிட் தைரியமாக புகார் அளித்துள்ளார். அந்தப் புகாரின்பேரில் வழக்கு பதிவு செய்யப்பட்டுள்ளது. சுஜி பயன்படுத்திவந்த ஹார்லி டேவிட்சன் பைக்கும் பறிமுதல் செய்யப்பட்டுள்ளது" என்றார்.

அடுத்த கட்டுரைக்கு