Published:Updated:

`10 லட்சம் வராவிட்டால் கேரியர் நாசம்!' -நடிகை பூர்ணாவை மிரட்டிய கடத்தல் கும்பல்

 நடிகை பூர்ணா
நடிகை பூர்ணா

பூர்ணாவின் பெற்றோரிடம் தங்களுக்குப் பணம் கொடுக்காமல் இருந்தால் பூர்ணாவின் கேரியரைப் பாழாக்கிவிடுவதாகவும் அவரைக் கொலை செய்துவிடுவதாகவும் மிரட்டியுள்ளனர்.

மலையாள சினிமாவில் முன்னணி நடிகையான ஷம்னா காஸிம் தனது பெயரை பூர்ணா என மாற்றி தமிழ் சினிமாவில் நடித்து வருகிறார். கேரள மாநிலம் கொச்சி மரட் பகுதியில் குடும்பத்துடன் வசித்துவரும் பூர்ணாவின் வீட்டில், திருமணம் சம்பந்தமான பேச்சுவார்த்தைக்காக கடந்த சில மாதங்களுக்கு முன்பு ஒரு கும்பல் சென்றுள்ளது.

பூர்ணாவின் உறவினர் ஒருவரின் பெயரைக் கூறி அவர் அனுப்பியதாக தெரிவித்ததால் அவர்களும் நம்பியுள்ளனர். மேலும், அந்தக் கும்பல் கோழிக்கோட்டிலிருந்து வருவதாக தெரிவித்துள்ளது. திருமணம் சம்பந்தமாக அடிக்கடி பேசியதன் மூலம் அந்த நபர்கள் பூர்ணாவின் பெற்றோருடன் நட்பு ஏற்படுத்தியுள்ளனர்.

இந்தநிலையில் அந்தக் கும்பலைச் சேர்ந்த ரபீக் என்பவர் நடிகை பூர்ணாவை மொபைல் போனில் தொடர்புகொண்டு துபாயில் உள்ள தனது பிசினஸுக்காக உடனடியாக பத்து லட்சம் ரூபாய் வேண்டும் எனக் கேட்டுள்ளார். இதனால் சந்தேகமடைந்த பூர்ணா இதுசம்பந்தமாக பெற்றோரிடம் பேசிவிட்டு முடிவெடுப்பதாகக் கூறியுள்ளார்.

ஆனால், தனக்குப் பணம் அவசரம் என அவர் கூறியுள்ளார். எனவே வீடியோ கால் செய்யும்படி அவரிடம் பூர்ணா கூறியிருக்கிறார். இதைத் தொடர்ந்து போன் தொடர்பைத் துண்டித்தவர், பின்னர் சுவிட்ச் ஆஃப் செய்துவிட்டார். அதன் பிறகு பூர்ணாவின் பெற்றோர் அந்தக் கும்பல் கொடுத்த முகவரி குறித்து விசாரித்தபோது அது போலியானது எனத் தெரியவந்தது.

கைது செய்யப்பட்டவர்கள்
கைது செய்யப்பட்டவர்கள்

இதற்கிடையில் அந்தக் கும்பல் பூர்ணாவின் வீட்டுக்குச் சென்று வீட்டையும் வீடு அமைந்துள்ள பகுதியையும் வீடியோ எடுத்துள்ளனர். பின்னர் பூர்ணாவின் பெற்றோரிடம் தங்களுக்குப் பணம் கொடுக்காமல் இருந்தால் பூர்ணாவின் கேரியரை பாழாக்கிவிடுவோம் என்றும், கொலை செய்துவிடுவதாகவும் மிரட்டியுள்ளனர். இதுகுறித்து பூர்ணாவின் தந்தை காஸிம், கொல்லம் மரட் காவல் நிலையத்தில் புகார் அளித்தார். போலீஸார் விசாரணை நடத்தி வாடனாப்பள்ளியைச் சேர்ந்த ரபீக், கடவனூரைச் சேர்ந்த ரமேஷ், சரத், அஷ்ரப் ஆகிய நான்கு பேரைக் கைது செய்தனர்.

கைது செய்யப்பட்டவர்களின் புகைப்படங்கள் வெளியானதைத் தொடர்ந்து மாடலிங் துறையைச் சேர்ந்த பெண் ஒருவர், "இவர்கள் தங்கம் கடத்தும் கும்பலைச் சேர்ந்தவர்கள்" என போலீஸாரிடம் தெரிவித்தார். மாடலிங் துறையைச் சேர்ந்த அந்தப் பெண்ணுக்குப் பாலியல்ரீதியாகவும் அந்தக் கும்பல் தொல்லை அளித்ததாக தகவல் வெளியாகியுள்ளது.

இதுகுறித்து மாடலிங் துறையைச் சேர்ந்த அந்தப் பெண் கூறுகையில், "இவர்கள் என்னிடம் நட்பை ஏற்படுத்திக் கொண்டார்கள். பின்னர் என்னை பாலக்காட்டுக்கு அழைத்து தங்கம் கடத்தும் வாகனத்துக்குப் பாதுகாப்பாக செல்லும்படி கூறினர். நான் மறுத்ததால் எட்டு நாள்கள் என்னைத் தனி அறையில் அடைத்து வைத்து சித்ரவதை செய்தனர்.

நடிகை பூர்ணா
நடிகை பூர்ணா

இதுகுறித்து கடந்த மார்ச் 4-ம் தேதி நான் காவல் நிலையத்தில் புகார் அளித்திருந்தேன். அவர்கள் குறித்த விவரங்கள் தெரியாமல் இருந்ததால் வழக்கில் எந்த முன்னேற்றமும் இல்லாமல் இருந்தது. நடிகை பூர்ணாவை மிரட்டிய வழக்கில் கைதானவர்களின் புகைப்படங்களைப் பார்த்தபோது என்னை மிரட்டியதும் இவர்கள்தான் என்பதை அடையாளம் கண்டுகொண்டேன். இதுபற்றிக் காவல்துறை அதிகாரிகளிடம் கூறியுள்ளேன். இவர்கள் தங்கம் கடத்தும் வாகனங்களுக்கு நடிகைகள் அல்லது பிரபலமான மாடலிங் துறையைச் சேர்ந்த பெண்களை எஸ்கார்டாக அனுப்புவது வழக்கம்" என்றார். இதையடுத்து இந்தக் கும்பல் குறித்து போலீஸார் தீவிர விசாரணை நடத்தி வருகின்றனர்.

Vikatan
அடுத்த கட்டுரைக்கு