அலசல்
சமூகம்
Published:Updated:

பகலில் திருடன்... இரவில் போலீஸ்... காவல்துறை கறுப்பு ஆடு கற்குவேல்

கற்குவேல்
பிரீமியம் ஸ்டோரி
News
கற்குவேல்

கற்குவேல் சிறு வயதிலிருந்தே கோடீஸ்வரனாக வேண்டும் என்ற கனவுடன் இருந்திருக்கிறார்

‘‘பொதுவாக, பலரும் இரவுப் பணியை வேண்டா வெறுப்பாகத்தான் செய்வார்கள். ஆனால், கற்குவேலுக்கு இரவுப் பணி என்பது கரும்பாக இனித்திருக்கிறது. எப்போதுமே இரவுப் பணியைக் கேட்டு வாங்கியிருக்கிறார். ‘அவ்வளவு கடமையுணர்ச்சியா!’ என்று ஆச்சர்யப்பட்டுவிட வேண்டாம். “பட்டப்பகலில் காக்கி உடையில் பூட்டிக்கிடக்கும் வீடுகளில் கொள்ளையடிக்கவே, இரவுப் பணிக்கு வந்திருக்கிறார்’’ என்கிறார்கள் அவருடன் பணியாற்றிய காவலர்கள்.

நெல்லை, தூத்துக்குடி மாவட்டங்களில் பூட்டிக்கிடக்கும் வீடுகளை உடைத்து நகை, பணம் கொள்ளையடிக்கப்பட்ட சம்பவங்கள் கடந்த சில மாதங்களாக போலீஸாருக்குப் பெரும் தலைவலியை ஏற்படுத்தின. சில வாரங்களுக்கு முன்பு, நெல்லை பெருமாள்புரம் பகுதியிலுள்ள சிறைக்காவலர் குடியிருப்பில் பூட்டிக்கிடந்த வீட்டை உடைத்து 15 சவரன் நகை கொள்ளையடிக்கப்பட்டது. காவல் நிலையத்துக்கு அருகில் இந்தக் கொள்ளைச் சம்பவம் நடக்கவே, போலீஸாருக்கு இது கௌரவப் பிரச்னையாகிப்போனது. கொள்ளையர்களைப் பிடிக்க தீவிரம் காட்டினார்கள். இதில், கொள்ளைச் சம்பவங்களுக்கு மூளையாகச் செயல்பட்டதே ஒரு காவலர் என்பது தெரியவர, அதிர்ந்துபோயிருக்கிறார்கள்.

ஜெயக்குமார் - மகேஷ்குமார்
ஜெயக்குமார் - மகேஷ்குமார்

இது குறித்து நெல்லை மாநகர குற்றப்பிரிவு துணை கமிஷனர் மகேஷ்குமாரிடம் பேசினோம். ‘‘நெல்லை மாநகரத்தின் விரிவாக்கப் பகுதிகளில் நடக்கும் கொள்ளைச் சம்பவங்கள் தொடர்பாக எங்களுக்கு எந்தத் தடயமும் கிடைக்காத நிலையில், சிறைக்காவலர் வீட்டில் நடந்த கொள்ளையில் மட்டும் ஒரு கைரேகை கிடைத்தது. அந்தக் கைரேகையை ஒப்பிட்டுப் பார்த்ததில் வேறொரு வழக்கில் சிக்கியிருந்த காவலர் கற்குவேலின் கைரேகையுடன் ஒத்துப்போனது. அவரைப் பிடித்து விசாரணை நடத்தியபோது, கொள்ளையில் ஈடுபட்டதை ஒப்புக்கொண்டார்’’ என்றார்.

காவலர் கற்குவேல் சிக்கியது எப்படி? அவரை வளைத்த குற்றப்பிரிவு போலீஸாரிடம் பேசினோம். ‘‘கற்குவேல் சிறு வயதிலிருந்தே கோடீஸ்வரனாக வேண்டும் என்ற கனவுடன் இருந்திருக்கிறார். கடந்த 2015-ம் ஆண்டு இளைஞர் காவல் படை உருவாக்கப்பட்டபோது அதில் சேர்ந்தவர், பின்னர் நடந்த எழுத்துத் தேர்வு மூலம் 2017-ம் ஆண்டு தேர்வாகி காவலர் ஆனார். ஆறுமுகநேரி காவல்நிலையத்தில் பணியாற்றியபோது கொள்ளைச் சம்பவங்களில் தொடர்புடைய சிலரின் நட்பு கிடைத்ததால், அவர்களுடன் சேர்ந்து நெல்லை, தூத்துக்குடி மாவட்டங் களில் 30-க்கும் அதிகமான வீடுகளில் கைவரிசையைக் காட்டியிருக்கிறார்.

ஆறுமுகநேரி காவல் நிலையத்தில் பணியாற்றியபோது, ஏட்டுவின் செல்போனை கற்குவேல் திருடியிருக்கிறார். ஸ்டேஷனிலுள்ள சிசிடிவி மூலம் மாட்டிக்கொண்டதால், அவர்மீது வழக்கு பதிவுசெய்யும் முயற்சியாகக் கைரேகை எடுக்கப்பட்டது. கடைசி நேரத்தில் அந்த வழக்கிலிருந்து தப்பிவிட்டாலும், அந்தக் கைரேகை மூலமாகத்தான் இப்போது சிக்கிக்கொண்டார்’’ என்றவர்கள், பகலில் கற்குவேல் நடத்திய கொள்ளை டெக்னிக் பற்றியும் விவரித்தார்கள்.

“நைட் டூட்டியை முடித்துவிட்டு அதிகாலையில் போலீஸ் யூனிஃபார்முடன் தூத்துக்குடி, திருநெல்வேலியின் புறநகர்ப் பகுதிகளில் வீதி வீதியாகச் சென்று நோட்டமிடுவார். பொதுமக்களும் பூட்டிக்கிடக்கும் வீட்டை பாதுகாப்புக்காக போலீஸ் கண்காணிக்கிறது என்று நினைத்துக்கொள்வார்கள். பகலில் குட்டித் தூக்கம் போட்ட பிறகு, மதியத்தில் தெருக்களில் ஆள் அரவமில்லாத நேரத்தில் நைசாக உள்ளே நுழைந்து ஜன்னலையோ, பூட்டையோ சத்தமில்லாமல் உடைத்துக் கொள்ளையடித் திருக்கிறார்” என்றார்கள்.

பகலில் திருடன்... இரவில் போலீஸ்... காவல்துறை கறுப்பு ஆடு கற்குவேல்

கற்குவேல் பற்றி அவரின் நண்பர்களிடம் விசாரித்தோம். ‘‘திருச்செந்தூர்தான் அவனோட சொந்த ஊர். கற்குவேல் சின்னப் பையனா இருக்கறப்பவே அவனோட அப்பா இறந்துட்டாரு. வீட்டு வேலை செஞ்சுதான் அவனோட அம்மா படிக்கவெச்சாங்க. பல இடங்கள்ல சிக்கி அடிபட்டும் திருட்டுப் பழக்கம் மட்டும் போகலை. இளைஞர் காவல் படையில சேர்ந்ததும், அப்பவே எஸ்.ஐ மாதிரி போலீஸ் கட்டிங் செஞ்சுக்கிட்டு, பைக்குல போலீஸ் ஸ்டிக்கர் ஒட்டிக்கிட்டுச் சுத்தினான். போலீஸ் வேலையில சேர்ந்ததும், வெறுங்காலோட ஆடுறவனுக்கு சலங்கை கட்டிவிட்டது மாதிரி ஆகிடுச்சு. திருச்செந்தூர் அவுட்டர்ல சாயங்கால நேரத்துல நின்னுக்கிட்டு அந்த வழியா வர்றவங்க பைக்கை மறிச்சு ‘லைசென்ஸ் இருக்கா?’னு கேட்டு, பணம் வசூல் பண்ணுவான். போற வர்ற லாரிகளை மறிச்சு, பணம் பறிப்பான்.

கொஞ்ச நாள் டி.எஸ்.பி-க்கு கார் ஓட்டினான். அப்போ அவனே ஆபீஸர் மாதிரி நடந்துக்குவான். நைட் டூட்டியை விரும்பி வாங்கும் கற்குவேல், பகல் நேரத்துலயும் காக்கி டிரெஸ்லயே சுத்துவான். ஆன்லைன் ரம்மி விளையாடி நிறைய பணத்தை இழந்துட்டதாவும், அதுல ஜெயிச்சு கோடிக்கணக்குல சம்பாதிக்கணும்னும் எங்ககிட்ட சொல்லியிருக் கான். ‘இருக்குற வரையும் ராயலா வாழணும்டே’னு அடிக்கடி சொல்லும் கற்குவேல், கொள்ளையடிக்கத் துணிவான்னு நினைக்கவேயில்லை’’ என்கிறார்கள்.

பகலில் திருடன்... இரவில் போலீஸ்... காவல்துறை கறுப்பு ஆடு கற்குவேல்

இதுகுறித்து தூத்துக்குடி எஸ்.பி-யான ஜெயக்குமாரிடம் கேட்டோம். “ஏட்டுவிடம் செல்போன் திருடுவது உட்பட பல சம்பவங்களில் கற்குவேல் ஈடுபட்டது தெரியவந்ததும் அவரை பட்டாலியனுக்கு மாற்றி, விசாரிக்க உத்தரவிட்டேன். அதற்குள் நெல்லையில் நடந்த கொள்ளையில் அவருக்குத் தொடர்பு இருப்பதாகத் தகவல் கிடைத்தது. அதனால் அவரைக் கண்காணிக்க உத்தரவிட்டிருந்தேன். அவர்மீதான குற்றச்சாட்டுக்குப் போதுமான ஆதாரம் இருந்ததால், கைதுசெய்ய நடவடிக்கை எடுத்ததுடன், அவரை சஸ்பெண்டும் செய்திருக்கிறேன். தூத்துக்குடி மாவட்டத்தில் நடந்த பிற கொள்ளைச் சம்பவங்கள் தொடர்பாகவும் அவரைக் காவலில் எடுத்து விசாரிக்க நீதிமன்றத்தில் மனு அளிக்கவிருக்கிறோம்’’ என்றார்.

`கள்வன் பெரியவனா... காப்பான் பெரியவனா?’ என்பார்கள். ஆனால், இங்கு காப்பானே கள்வனாக மாறியதுதான் அவலம்!