Election bannerElection banner
Published:Updated:

நாமக்கல்: `கோயிலில் கொள்ளை; காட்டில் பங்கு பிரிப்பு!’ - மொத்தமாக மாட்டிய கொள்ளையர்கள்

கொள்ளையடித்த பணம், அம்மன் நகை
கொள்ளையடித்த பணம், அம்மன் நகை ( நா.ராஜமுருகன் )

காட்டுப்பகுதியில் மூன்று பேர் பணத்தைக் குவியலாகக் கொட்டி, அதைப் பங்கு பிரித்துக்கொண்டிருந்தனர். இதை அந்த வழியாக சென்ற சிலர் பார்த்துவிட்டு, சந்தேகத்தின் பேரில் அந்த மூன்று பேரையும் விசாரித்தனர்.

கோயில் காவலாளியைத் தாக்கிவிட்டு, கோயில் நகை, உண்டியலைக் கொள்ளையடித்த கும்பல், காட்டுப்பகுதியில் வைத்து பங்கு பிரித்தபோது, அந்த வழியாகச் சென்றவர்களிடம் வசமாக மாட்டினர். அதோடு, இந்தக் கொள்ளைச் சம்பத்தில் ஈடுப்பட்டது மதுரையைச் சேர்ந்த பிரபல கொள்ளையர்கள் என்பது, போலீஸாரையும் பொதுமக்களையும் அதிர வைத்திருக்கிறது.

கொள்ளையர்கள்
கொள்ளையர்கள்
நா.ராஜமுருகன்
கரூர்: பாதியில் நிற்கும் சாலை;  முழுமை பெறாத மைதானம்! - அவசரகதியில் திறக்கப்பட்ட திட்டங்கள்

நாமக்கல் மாவட்டம், பரமத்தி சந்தைப் பகுதியில் இருக்கிறது, சேற்றுக்கால் மாரியம்மன் கோயில். வாரத்தில் வெள்ளிக்கிழமை அன்றும், மற்றும் விசேஷ தினங்களிலும் இந்தக் கோயிலில் சிறப்பு வழிபாடு நடைபெறுவது வழக்கம். அந்த நாள்களில் ஏராளமான பக்தர்கள் இந்த அம்மனை வந்து வழிப்பட்டுச் செல்வார்கள். இந்தநிலையில், நேற்று முன்தினம் நள்ளிரவு கோயிலுக்குள் புகுந்த மூன்று பேர்கொண்ட கும்பல் ஒன்று, கோயிலில் கொள்ளையடித்த முயன்றிருக்கிறது. அப்போது, அவர்களைத் தடுத்த, கோயிலுக்குக் காவலாக இருந்த காவலாளி கணேசனைத் தாக்கி, அறைக்குள்வைத்துப் பூட்டினர்.

பரமத்தி
பரமத்தி
நா.ராஜமுருகன்

பின்னர், கோயிலுக்குச் சென்ற அந்த மூன்று பேர்கொண்ட கும்பல், அம்மனின் அரை பவுன் பொட்டுத் தாலி, ஒரு கிலோ அளவிலான வெள்ளிக் கவசம் உள்ளிட்ட ஒரு லட்சம் மதிப்பிலான நகைகளைக் கொள்ளையடித்துச் சென்றது. அறைக்குள் இருந்த கணேசன், நேற்று காலை வெளியில் வந்து கோயில் நிர்வாகத்தினருக்குத் தகவல் கொடுத்தார். அதோடு, காவல்துறைக்கும் தகவல் கொடுக்கப்பட்டது. இந்தக் கொள்ளைச் சம்பவத்தை அறிந்த பரமத்தி வேலூர் டி.எஸ்.பி ராஜாரணவீரன், இன்ஸ்பெக்டர் செந்தில் குமார் உள்ளிட்ட போலீஸார் கோயிலுக்கு விரைந்து வந்தனர். அங்கே விசாரணை நடத்தினர். அம்மன் நகைகளைக் கொள்ளையடித்தது யார், எப்படிக் கொள்ளைச் சம்பவம் நடந்தது என்ற கோணத்தில் விசாரணையைத் தொடர்ந்தனர்.

இதற்கிடையில், அருகிலுள்ள கீரம்பூர் பகுதியில் இருக்கும் காட்டுப்பகுதியில் மூன்று பேர் பணத்தைக் குவியலாகக் கொட்டி, அதைப் பங்கு பிரித்துக்கொண்டிருந்தனர். இதை அந்த வழியாகச் சென்ற சிலர் பார்த்துவிட்டு, சந்தேகத்தின்பேரில் அந்த மூன்று பேரையும் விசாரித்தனர். உடனே அவர்கள், `நாங்க மூணு பேரும் மதுரையை சேர்ந்த பிரபல கொள்ளையர்கள். எங்களைக் காட்டிக்கொடுத்தால், உங்களைச் சும்மாவிட மாட்டோம். உங்களைக் கொன்றுவிடுவோம்' என்று மிரட்டியிருக்கிறார்கள். அதனால், அந்தக் கொள்ளையர்கள் மீது கோபமடைந்த மக்கள், அவர்களைப் பிடித்து, கடுமையாகத் தாக்கினர். பின்னர் பரமத்தி போலீஸாரிடம் அவர்கள் மூன்று பேரையும் ஒப்படைத்தனர்.

கொள்ளையர்கள்
கொள்ளையர்கள்
நா.ராஜமுருகன்

அவர்களிடம் போலீஸார் நடத்திய விசாரணையில், அவர்கள் மூன்று பேரும் மதுரையைச் சேர்ந்த ராஜூ, முருக சூர்யா, கருப்பசாமி என்பது தெரியவந்தது. மூவரும் சேர்ந்துதான், பரமத்தி அம்மன் கோயில் காவலாளியைத் தாக்கிவிட்டு, அம்மன் நகைகளைக் கொள்ளையடித்தனர் என்பதைக் கண்டுபிடித்தனர். இவர்கள் மூவரும் மதுரையைச் சேர்ந்த பிரபல கொள்ளையர்கள் என்பதும், இவர்கள் மீது பல காவல் நிலையங்களிலும் வழக்குகள் நிலுவையில் இருக்கின்றன என்பதும் விசாரணையில் தெரியவந்தது. இதையடுத்து, மூவரிடமிருந்தும் அம்மன் நகையைக் கைப்பற்றிய போலீஸார், அவர்களைக் கைதுசெய்து சிறையில் அடைத்தனர்.

Election bannerElection banner
அடுத்த கட்டுரைக்கு