க்ரைம் டேப்ஸ்: போலீஸுக்கு ஏமாற்றம்... உண்மைகளை உடைத்த சத்யா! - பரபர பகுதி - 3
சத்யா கொலை செய்வதிலும், வன்கொடுமை செய்வதிலும் மட்டும் கைதேர்ந்தவன் அல்ல. தன் முன்னாலிருக்கும் எவரையும் தன்வசப்படுத்தும் கலையை அவன் கற்றுவைத்திருந்தான்.
செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!
லாரி டிரைவர் சத்யா ஒரு பெண்ணிடம் வழிப்பறி செய்த வழக்கில் கைதாகி, சிறையில் இருந்தபோதுதான் கான்ஸ்டபிள் ஜோதிமணியை வன்கொடுமை செய்து கொலை செய்த வழக்கில் சம்பந்தப்பட்டிருப்பது தெரியவந்தது. அவனது கைரேகையைவைத்து விசாரணையைத் தொடங்கியதும், அடுத்தடுத்து அதிர்ச்சிகர தகவல்கள் வரத் தொடங்கியதை சென்ற பகுதியில் எழுதியிருந்தேன். கிட்டத்தட்ட 30-க்கும் மேற்பட்ட பெண்களை அவன் வன்கொடுமை செய்து கொலை செய்திருப்பது தெரியவந்தது. உடனே அவனைக் காவலில் எடுத்து விசாரிக்க முடிவு செய்தார்கள்.
இத்தனை கொலைகளில் சம்பந்தப்பட்டிருக்கிறான். இவ்வளவு காலமாக போலீஸில் சிக்காமல் லாகவமாகத் தப்பிவந்திருக்கிறான். எனவே, விசாரணையில் பிடிகொடுக்காமல் நம்மை ஏமாற்றப் பார்ப்பான் என்றே எண்ணினார்கள். ஆனால் விசாரணையைத் தொடங்கிய போலீஸுக்கு எதிர்பாராத ஏமாற்றம் காத்திருந்தது. எடுத்த எடுப்பிலேயே சத்யா போலீஸில் அனைத்துக் குற்றச்சாட்டுகளையும் ஒப்புக்கொண்டான். எதையும் மறுக்கவும் இல்லை; மறைக்கவும் இல்லை. ரொம்பவும் கூலாகப் பேசியதைப் பார்த்து போலீஸார் உண்மையில் மிரண்டேபோனார்கள்.
போலீஸாரின் லத்திக்கு எந்தவிதமான வேலையும் கொடுக்காமல் தன்னைப் பற்றிய தகவல்களை சத்யா புன்னகையுடன் சொல்லியிருக்கிறான்.
லாரி டிரைவர் சத்யா எப்போதும் கையில் ஒரு கறுப்பு கைப்பை ஒன்றை வைத்திருப்பான். அதில் ஒரு சிறிய சைஸ் கத்தி இருக்கும். அதைப் பார்த்தால் நகம் வெட்டுவதற்கோ, பழங்கள் வெட்டுவதற்கோ வைத்திருப்பான் என்றுதான் நினைக்கத் தோன்றும். அவனது முதல் இலக்கு இரவு நேரங்களில் சாலையோரம் டார்ச் லைட்டுடன் நிற்கும் பாலியல் தொழிலாளிகள்தான்.
அவர்களிடம் நைசாக பேச்சுக் கொடுத்து, தனியிடத்துக்கு அழைத்துப் போவான். அவர்களிடம் பேச்சுக் கொடுத்துக்கொண்டே திடீரென அவர்களைக் கடுமையாகத் தாக்கத் தொடங்குவான். அவர்கள் சாகும் தறுவாயில் இருக்கும்போது அவர்களுடன் உறலுறவுகொள்வான். பெரும்பாலும் அவன் தன் வேலையை முடித்திருக்கும்போது அவர்கள் தங்கள் மூச்சை நிறுத்தியிருப்பார்கள். அப்படியும் யாராவது உயிருடன் இருந்தால் அவர்களைக் கொடூரமாகத் தாக்கிக் கொல்வதை வழக்கமாக வைத்திருந்தான். பாலியல் தொழிலாளிகள் தவிர, பண்ணை நிலங்களில் விவசாய வேலை பார்க்கும் பெண்கள், ஆடு மாடு மேய்க்கும் பெண்கள் என கண்ணில்படும் பெண்களையெல்லாம் வன்கொடுமை செய்வதும், கொடூரமாகக் கொலை செய்வதுமாக திரிந்திருக்கிறான். இந்தத் தகவல்களையெல்லாம் போலீஸாரிடம் அவனே சொன்னதுதான் இதில் ஹைலைட்!
``பெண்களைத் தாக்கி, அவர்கள் உயிர் போகும் வலியில் துடிக்கும்போது அவர்களிடம் உறவுகொள்வதுதான் எனக்குப் பிடிக்கும்’’ என்று அவன் சொன்னபோது போலீஸார் வியர்த்து, விறுவிறுத்துப்போனார்கள்.
சைக்கோ கொலைகாரன்
சத்யாவை மாஜிஸ்ட்ரேட்டிடம் கூட்டிச் சென்று சிறையில் அடைப்பதற்கு முன்பாக, அவனை மனநல மருத்துவரிடம் அழைத்துச் சென்றார்கள். `சத்யா மனப்பிறழ்வு கொண்டவன், போலீஸ் மொழியில் ஒரு சைக்கோ கொலைகாரன்’ என்று அவனைப் பரிசோதித்த டாக்டர் அறிவித்தார்.
சத்யா சிறையில் அடைக்கப்பட்டான். சத்யா கடைசிவரை புன்னகை மாறாமல், எந்தவிதமானப் பதற்றமும் இல்லாமல் சகஜமாக இருந்தது போலீஸுக்கே அதிர்ச்சியாகத்தான் இருந்தது.
ஆனால் சத்யா பெண்களைத் தாக்கி வன்கொடுமை செய்து கொலை செய்வான் என்பதை மட்டுமே முடிவு செய்திருந்தனர். சத்யாவுக்கு இன்னொரு முகம் இருப்பது அவர்களுக்குத் தெரிந்திருக்கவில்லை. சத்யாவின் அந்த முகம் மீண்டும் போலீஸாரின் தூக்கத்தை கெடுக்கப்போவதை அவர்கள் அறிந்திருக்கவில்லை.
கோவை சிறையில் அடைக்கப்பட்டிருந்த சத்யா, தன் மீது தருமபுரியில் பதிவாகியிருந்த கொலை வழக்குக்காக அழைத்துச் செல்லப்பட்டான். ஆயுதப்படையை சேர்ந்த குருசாமி, அருள் வேலு என்ற இரு கான்ஸ்டபிள்கள் அவன் பாதுகாப்புக்குச் சென்றனர். சேலம் பேருந்து நிறுத்தத்தில் இருவரையும் ஏமாற்றிவிட்டு நிதானமாக எந்தவிதமான பரபரப்பும் இன்றி அவன் தப்பிச் சென்றான். அந்த காஸ்டபிள்கள் இருவரும் அவனைத் தப்பிக்கவிட்டதற்காக துறைரீதியான நடவடிக்கைக்கு ஆளானார்கள்.
அவர்களிடம் விசாரணையும் நடத்தப்பட்டது. அப்போது யாரும் எதிர்பாராதவிதமாக குருசாமி தன்னைத் தானே துப்பாக்கியால் சுட்டுக்கொன்று தற்கொலை செய்து கொண்டார். இது போலீஸாருக்குப் பெரும் அதிர்ச்சியாக இருந்தது. அப்போதுதான் ஒரு விஷயம் போலீஸாருக்கு உறைக்கத் தொடங்கியது. சத்யா கொலை செய்வதிலும், வன்கொடுமை செய்வதிலும் மட்டும் கை தேர்ந்தவன் அல்ல; தன் முன்னாலிருக்கும் எவரையும் தன் வசப்படுத்தும் கலையை அவன் கற்றுவைத்திருந்தான். இப்போது தப்பிச் சென்றுவிட்ட சத்யாவால் என்னென்ன கொடூரங்கள் நிகழப் போகின்றனவோ என்று போலீஸார் பதறிக்கொண்டிருக்க, சத்யா, கர்நாடகாவில் ஆறு பெண்களை வன்கொடுமை செய்து கொன்றிருந்தான். தருமபுரியில் ஒரு பெண்ணை வன்கொடுமை செய்யும்போது, அதற்குத் தடையாக இருந்த அந்தப் பெண்ணின் கணவனையும், அவர்களின் குழந்தையையும் கொடூரமாகத் தாக்கிக் கொலை செய்தான். இந்த எட்டுக் கொலைகளை அவன் வெறும் இரண்டு மாதங்களுக்குள் செய்திருந்தான். அடுத்து என்ன நடக்கப் போகிறதோ என்ற பீதியில் போலீஸார் பதைபதைத்துக்கொண்டிருந்தனர்.
ஒரே நாளில் தன் குடும்பத்தைச் சேர்ந்த ஒன்பது பேரைக் கொலை செய்த ஜெயப்பிரகாஷ், கொலை செய்து அந்த உடல்களை தன் வீட்டிலேயே புதைத்துவைத்த ஆட்டோ சங்கர், தன் ஜூனியர் மாணவனைக் கொலை செய்து துண்டு துண்டாக வெட்டி பல இடங்களில் வீசிவிட்டுச் சென்ற மருத்துவ மாணவர் ஜான் டேவிட் போன்றோரைத் தூக்கி சாப்பிட்டுவிட்ட சத்யாவைப் பிடிக்க போலீஸார் பல வியூகங்களை வகுந்திருந்தார்கள். சத்யா பிடிபட்டானா?
க்ரைம் டேப்ஸ் தொடரும்...
பகுதி 2-க்கு செல்ல...
