Published:Updated:

ஈரோடு: சினிமா பாணியில் ஓடும் லாரியில் மசாலா பண்டல்கள் திருட்டு - 4 தார்ப்பாய் திருடர்கள் கைது!

கைதனவர்கள்

லாரியைப் பின்தொடர்ந்து சென்ற தார்ப்பாய் திருடர்கள் நெடுஞ்சாலை திரைப்படத்தில் வருவதைப்போல மேடான பகுதியில் மெதுவாக லாரி செல்லும்போது பின்பகுதியில் ஏறி திருட்டில் ஈடுபட்டனர்.

ஈரோடு: சினிமா பாணியில் ஓடும் லாரியில் மசாலா பண்டல்கள் திருட்டு - 4 தார்ப்பாய் திருடர்கள் கைது!

லாரியைப் பின்தொடர்ந்து சென்ற தார்ப்பாய் திருடர்கள் நெடுஞ்சாலை திரைப்படத்தில் வருவதைப்போல மேடான பகுதியில் மெதுவாக லாரி செல்லும்போது பின்பகுதியில் ஏறி திருட்டில் ஈடுபட்டனர்.

Published:Updated:
கைதனவர்கள்

ஈரோடு அருகே மாமரத்துப்பாளையம் பகுதியில் தனியார் மசாலா நிறுவனம் இயங்கிவருகிறது. இந்த நிறுவனத்திலிருந்து தினந்தோறும் தமிழ்நாடு, கர்நாடகம், ஆந்திரா, கேரளா என பல்வேறு மாநிலங்களுக்கும் மசாலாப் பொருள்களான சாம்பார் தூள், மிளகுத்தூள், சிக்கன், மட்டன் மசாலா தூள், மஞ்சள் தூள் போன்றவற்றின் பண்டல்களை லாரியில் ஏற்றி மேலே தார்ப்பாய் கட்டி அனுப்பிவைக்கின்றனர். இந்த லாரிகளைப் பின்தொடர்ந்து மினி லாரியான டாடா ஏஸ் லாரியில் சென்று பின்னால் ஏறி தார்ப்பாயைக் கிழித்து மசாலா பண்டல்களை ஓடும் லாரியிலிருந்து திருடிச் செல்வதை ஒரு கும்பல் வழக்கமாகக் கொண்டிருந்தது. வாரத்துக்கு 2, 3 லாரிகளிலிருந்து சுமார் அரை டன் எடையில், சில லட்சங்கள் மதிப்புள்ள மசாலாப் பொருள்கள் அடங்கிய பண்டல்கள் திருட்டுப் போவதாக நிறுவனத்தின் சார்பில் சித்தோடு போலீஸில் புகாரளிக்கப்பட்டது.

பாரதி
பாரதி

இதையடுத்து, மசாலாப் பொருள்களைக் கடத்திச் செல்லும் கும்பல் திருடும் விதம் குறித்து நெடுஞ்சாலைப் பகுதியிலும், கொச்சின்- சேலம் தேசிய நெடுஞ்சாலையிலும் பொருத்தப்பட்டிருந்த சிசிடிவி கேமராக்களின் பதிவுகளைக் கைப்பற்றி தீவிரமாக விசாரித்தனர். அதில் லாரிகளைப் பின்தொடர்ந்து மினிலாரிகளில் வரும் நபர்கள்தான் இந்தச் செயலில் ஈடுபட்டுவருவது தெரியவந்தது.

இதையடுத்து, சித்தோடு இன்ஸ்பெக்டர் முருகையன் தலைமையில் எஸ்.எஸ்.ஐ ஸ்ரீரங்கன் உள்ளிட்ட போலீஸார் குழு அமைக்கப்பட்டு தீவிரமாகக் கண்காணிக்கப்பட்டது.
சித்தோடு அருகே தேசிய நெடுஞ்சாலை வழியாக லாரியைப் பின்தொடர்ந்து சென்ற தார்ப்பாய் திருடர்கள் சிலர் `நெடுஞ்சாலை’ திரைப்படத்தில் வருவதைப்போல மேடான பகுதியில் மெதுவாக லாரி செல்லும்போது பின்பகுதியில் ஏறினர். அவர்கள் கட்டியிருந்த தார்ப்பாயைப் பிரித்து உள்ளே இறங்கி பண்டல்கள் ஒவ்வொன்றாக இறக்கி பின்னால் வந்த மினிலாரியில் ஏற்றிக்கொண்டிருந்தனர்.  

ரூபன்
ரூபன்

அப்போது அவர்களைப் பின்தொடர்ந்து சென்ற சித்தோடு இன்ஸ்பெக்டர் முருகையன் தலைமையிலான போலீஸார் அவர்களைப் பிடித்து காவல் நிலையத்துக்குக் கொண்டுவந்து விசாரணை நடத்தினர். அவர்களிடமிருந்து 630 கிலோ எடையுள்ள ரூ.1.40 லட்சம் மதிப்புள்ள மசாலா பாக்கெட்டுகளைக் கைப்பற்றியதுடன், மதுரை மாவட்டம், நாகமலை புதுக்கோட்டை வடிவேல் கரையைச் சேர்ந்த முருகன் மகன் பிரசாத் (37), மதுரை உசிலம்பட்டி ஏ.கொக்குளம் பன்னியான் தெருவைச் சேர்ந்த பின்னதேவர் மகன் பாரதி (31), மதுரை திருமங்கலம், செக்காவூரணி, கே.புளியம்குளம் வடக்குத் தெருவைச் சேர்ந்த சேகர் என்பவரின் மகன் ரூபன் (24), மதுரை மாவட்டம், நாகமலை புதுக்கோட்டை மேலக்குடியைச் சேர்ந்த சேரூமபாண்டியின் மகன் முத்துகுமார் (49) ஆகிய நான்கு பேரை போலீஸார் கைதுசெய்தனர். இதில் முருகன் மீது ஏற்கெனவே 18 வழக்குகளிலும், பாரதி மீது மூன்று வழக்குகளிலும் தொடர்பிருப்பது விசாரணையில் தெரியவந்தது.

முத்துகுமார்
முத்துகுமார்

இதுகுறித்து இன்ஸ்பெக்டர் முருகையன் நம்மிடம் கூறுகையில், ``பிடிபட்ட நபர்கள் கடந்த 3 மாதங்களாகவே ஓடும் லாரியிலிருந்து மசாலாப் பொருள்களைக் கைப்பற்றி குறைந்த விலைக்கு கடைக்காரர்களிடம் விற்றுவிடுவார்கள். மேடான பகுதியில் பாரம் ஏற்றிய லாரிகள் மெதுவாகச் செல்லும்போது பின்பகுதி வழியாக ஏறி, லாரியின் தார்ப்பாயை கிழித்து உள்ளே இறங்கும் தார்ப்பாய் திருடர்களான இந்த நால்வர் மீதும் பல்வேறு வழக்குகள் இருக்கின்றன. மதுரை, திருச்சி, கிருஷ்ணகிரி, தருமபுரி, நாமக்கல், கரூர் என பல்வேறு மாவட்டங்களிலும் ஓடும் லாரியில் கைவரிசை காட்டியவர்கள் இவர்கள். இதுவரை ரூ.30 லட்சம் மதிப்புள்ள மசாலாப் பொருள்களை இவர்கள் திருடியிருப்பது விசாரணையில் தெரியவந்திருக்கிறது. இவர்களிடம் ரூ.2 லட்சம் மதிப்புள்ள மசாலாப் பொருள்கள் மீட்கப்பட்டிருக்கிறது. பிடிபட்டவர்கள் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டனர்” என்றார்.