Election bannerElection banner
Published:Updated:

சீடர்கள் முதல் தலைமை பூசாரி வரை.. ஆசிரமத்தில் நடந்த கொடூரம்! -அமிர்தசரஸை உலுக்கிய பாலியல் வன்கொடுமை

ராம் தீரத் கோயில்
ராம் தீரத் கோயில்

ராம் தீரத் கோயிலின் தலைமைப் பூசாரி மற்றும் மற்றொரு பூசாரியும் சேர்ந்து இந்த இரண்டு பெண்களையும் சிறைப்பிடித்து வைத்துக்கொண்டு தொடர்ந்து பாலியல் வன்கொடுமை செய்துவந்துள்ளனர்.

கொரோனா காரணமாக லாக்டௌன் பிறப்பிக்கப்பட்டு ஊரே அடங்கி இருக்கும் இந்த நேரத்திலும் குற்றச் சம்பவங்கள் நடக்காமல் இல்லை. குறிப்பாக மதுக்கடைகள் திறந்த பிறகு இந்தக் குற்றச் சம்பவங்களின் எண்ணிக்கை இரண்டு மடங்காக அதிகரித்து வருகிறது.

இதற்கிடையே, பஞ்சாப் மாநிலம் அமிர்தசரஸில் நடந்த வன்கொடுமைச் சம்பவம் மேலும் அதிர்ச்சியை ஏற்படுத்தியுள்ளது. பட்டியல் சாதிகளுக்கான பஞ்சாப் ஆணைய உறுப்பினர் தர்செம் சிங் சியால்கா, புகார் ஒன்றை அமிர்தசரஸ் போலீஸிடம் கொடுத்தார்.

ராம் தீரத் கோயில்
ராம் தீரத் கோயில்

அதில், `அமிர்தசரஸ் நகரிலிருந்து 11 கி.மீ தொலைவில் உள்ள ராம் தீரத் கோயிலில் இரண்டு பெண்களை அக்கோயிலின் தலைமை பூசாரியும் மற்றொரு பூசாரியும் சேர்ந்து அடைத்து வைத்து பாலியல் வன்கொடுமை செய்து வருகின்றனர்' என்று கூறியிருந்தார்.

இந்தப் புகாரின் பேரில் மே 18-ம் தேதி அக்கோயிலின் உள்ளே அதிரடியாக நுழைந்து ரெய்டு நடத்தியது போலீஸ். அதில் வன்கொடுமைச் சம்பவம் நடந்தது உண்மை என்பது தெரியவந்தது. ஆசிரமத்தில் அடைக்கப்பட்டிருந்த 25 மற்றும் 40 வயது மதிக்கத்தக்க பெண்கள் இருவரையும் மீட்டனர். அவர்களிடம் நடத்திய விசாரணையில் ராம் தீரத் கோயிலின் தலைமைப் பூசாரி மற்றும் மற்றொரு பூசாரியும் சேர்ந்து இந்த இரண்டு பெண்களையும் சிறைப்பிடித்து வைத்துக்கொண்டு தொடர்ந்து பாலியல் வன்கொடுமை செய்துவந்தனர் என்று அதிர்ச்சித் தகவலை கூறியுள்ளனர்.

வழக்கு எப்படி வெளிச்சத்துக்கு வந்தது?

இதுதொடர்பாக போலீஸ் அதிகாரி ஒருவர் பேசும்போது, ``பாதிக்கப்பட்ட பெண்களை முதலில் வன்கொடுமை செய்தது தலைமை பூசாரி கிர்தாரி நாத் மற்றும் வருந்தர் நாத் ஆகியோரின் சீடர்களான சூரஜ் நாத் மற்றும் நச்சதர் நாத் என்ற இருவர்தான். தங்களுக்கு நேர்ந்த இந்தக் கொடுமை குறித்து தலைமை பூசாரியிடம் புகார் அளிக்க அந்தப் பெண்கள் சென்றுள்ளனர். ஆனால், புகாரின்மீது நடவடிக்கை எடுப்பதற்குப் பதிலாக, தலைமைப் பூசாரிகள் இருவரும் பாதிக்கப்பட்ட பெண்களை மீண்டும் அடைத்து வைத்து பாலியல் வன்கொடுமை செய்துள்ளனர். பாதிக்கப்பட்ட இரண்டு பெண்களில் ஒருவரான 25 வயதுப் பெண் பூசாரிகளிடம் ஆசிர்வாதம் வாங்குவதற்காக ஆசிரமத்துக்கு வந்துள்ளார்.

பாலியல் வன்கொடுமை
பாலியல் வன்கொடுமை
மாதிரி படம்

பின்னர் செல்போன்கள் பிடுங்கப்பட்டு அவர் சிறைப்பிடிக்கப்பட்டு கொடுமைகளை அனுபவித்துள்ளார். இருப்பினும், இரண்டு பெண்களில் ஒருவர் ஆசிரமத்தில் உள்ள ஒரு மொபைல் போனை திருடி, குர்தாஸ்பூரின் படாலாவில் உள்ள அவரது குடும்பத்தினருக்குத் தகவல் தெரிவித்துள்ளார். அதன்பிறகே இந்தச் சம்பவம் வெளியில் தெரிந்தது. கைது செய்யப்பட்ட இரண்டு பூசாரிகள்மீது இபிகோ 376, 379, 506 பிரிவுகளின்கீழ் வழக்கு பதிவு செய்யப்பட்டுள்ளது" என்றார்.

இந்த சம்பவம் அமிர்தசரஸ் மக்களை அதிர்ச்சிக்குள்ளாக்கியுள்ளது. ஏனெனில் இந்தக் கோயில் மாவட்டத்தின் முக்கிய அடையாளங்களில் ஒன்றாகும். நகரிலிருந்து 11 கி.மீ தூரத்தில் அமைந்துள்ள இந்தக் கோயில் மகரிஷி வால்மீகியின் ஆசிரமம் என்று கூறப்படுகிறது. வால்மீகி, சீதாவுக்கு தங்குமிடம் கொடுத்த இடம் என்றும், ராம் மற்றும் சீதாவின் மகன்கள் லவா மற்றும் குஷா பிறந்த இடம் என்றும் கூறப்படுகிறது. சில ஆண்டுகளுக்கு முன்பும் இக்கோயில் சர்ச்சையில் சிக்கியது குறிப்பிடத்தக்கது.

Election bannerElection banner
அடுத்த கட்டுரைக்கு