Published:Updated:

பன்முகங்கொண்ட தனித்தமிழ் அருவி!

இரா.இளங்குமரனார்
பிரீமியம் ஸ்டோரி
இரா.இளங்குமரனார்

- தமிழச்சி தங்கபாண்டியன், எம்.பி

பன்முகங்கொண்ட தனித்தமிழ் அருவி!

- தமிழச்சி தங்கபாண்டியன், எம்.பி

Published:Updated:
இரா.இளங்குமரனார்
பிரீமியம் ஸ்டோரி
இரா.இளங்குமரனார்

தமிழ் இலக்கிய உலகம் இன்று எல்லைகளைக் கடந்து பரந்துபட்ட தளத்தில் இயங்கிக்கொண்டிருக்கிறது. எந்த ஒரு மொழியின் இலக்கியத்துக்கும், ஏன் அந்த மொழிக்குமேகூட அடிப்படைக் கூறாக விளங்குபவை அதன் இலக்கண நூல்கள். ஏணியின் படிக்கட்டுகள் எத்தனை வேண்டுமானாலும் இருக்கலாம். அதன் இருபக்கத் தாங்கு தூண்கள்போல இலக்கண நூல்கள் நம் மொழியைத் தாங்கிப்பிடித்திருக்கின்றன. ஐயா இரா.இளங்குமரனார் (1927-2021) அந்தத் தூண்களின் மீது இறுக்கிக் கட்டப்பட்ட வடக்கயிறு போன்றவர்.

ஒரு சம்பவம் சொல்கிறேன்... தொல்காப்பியத்துக்குப் பிந்தைய காலத்தில் தோன்றிய யாப்பிலக்கண நூல்களில் முதன்மையான நூல் காக்கைப்பாடினியம். அது நமக்குக் கிடைக்காமலே போனது. இளங்குமரனார் அதை ஓலைச்சுவடிகளின் துணையின்றி, தமிழிலுள்ள பிற இலக்கண இலக்கிய உரைகளில் இடம்பெற்றிருந்த காக்கைப்பாடினியாரின் நூற்பாக்களையெல்லாம் திரட்டி உரை வரைந்தார். தமிழ் நூல்களின் பதிப்பு வரலாற்றில் எவரும் எண்ணிப்பார்க்க முடியாத சாதனை அவருடையது.

பன்முகங்கொண்ட தனித்தமிழ் அருவி!

தனித்தமிழ் இயக்கத்தின் பேராளுமை அவர். தமிழில் பல்வேறு துறைகளில் ஐந்நூற்றுக்கும் மேற்பட்ட நூல்களை எழுதியவர். 111 அடிகளில் திருக்குறள் கருத்துகளைக்கொண்டே `குறள்போற்றி’ எனும் துதியை உருவாக்கியவர். அதையே சடங்குகள் அற்ற தமிழ் மணங்களில், புகுமனை விழாக்களில் ஒலித்து வள்ளுவத்தை ஓர் இயக்கமாகவே வளர்த்தெடுத்தவர். திருக்குறள் கட்டுரைகள், செந்தமிழ் சொற்பொருள் களஞ்சியம், தேவநேயம், சொற்பிறப்பு அகரமுதலி, சுவடிக்கலை, பாரதி, பாவேந்தம் எனப் பன்முகங்கொண்டு இளங்குமரனார் உருவாக்கிப் பங்களித்த தமிழ்க்கொடையில் தமிழன்னை முகம் பூத்துக்கிடக்கிறாள்.

மூவாத தமிழ்க்கிழவியின் தொன்மையும் அவளின் தூய்மையும் வளமையுமே எந்நாளும் அவர் சொல்லாக, செயலாக, எழுத்தாக, பேச்சாக விரிந்தது. அதுவே அவரது வாழ்க்கையும் ஆனது. எளிமையும் அர்ப்பணிப்பும் கொண்ட அவரின் தமிழ்ப்பணியும் ஆசிரியப்பணியும் இன்னும் என்னை வியப்புக்குள் ஆழ்த்துகிறது. 1978-ல் தமிழ்நாடு அரசு ‘நல்லாசிரியர் விருது’ அறிவித்தபோது, அந்த விருதைப் பெற்ற முதல் ஆசிரியர் இளங்குமரனார்தான். தமிழ்வழிக் கல்விக்காகவும், குறளியக் கருத்துக்காகவும் வாழ்நாள் முழுவதும் குரல்கொடுத்த முதுபெரும் தமிழறிஞரின் இழப்பு தமிழுக்கும் தமிழர்க்கும் பேரிழப்பு. அவரது குறள் உள்ளவரை செந்தமிழ் உள்ளவரை அவர் புகழ் வாழும்!