Published:Updated:

2 மாதமாக சவுதியில் இருந்த உடல்; மீட்கமுடியாமல் தவித்த பெற்றோர்-வாசகர்கள் முயற்சியால் கூடலூர் வந்தது!

சவுதி அரேபியாவில் தற்கொலை செய்துகொண்ட மகனின் உடலை இந்தியாவுக்குக் கொண்டுவர முடியாமல் இருந்த நிலையில் `ஜித்தா தமிழ்ச் சங்கம்' மூலம் நேற்று அவரது உடல் கொண்டுவரப்பட்டது.

மகன் ராஜ்குமார் உடலுடன் தந்தை
மகன் ராஜ்குமார் உடலுடன் தந்தை

நீலகிரி மாவட்டம் கூடலூர் ஓவேலி சின்ன சூண்டி பகுதியைச் சேர்ந்த பரசுராமன், பொட்டு தம்பதியரின் மகன், ராஜ்குமார். 29 வயதான இவர், சவுதி அரேபியாவில் உள்ள ஒரு தனியார் நிறுவனத்தில் கடந்த நான்கு ஆண்டுகளுக்கும் மேலாகப் பணியாற்றிவந்தார்.

ராஜ்குமார்
ராஜ்குமார்

விசா காலம் நிறைவடைந்தும் 9 மாதத்கு மேலாக சவுதியில் இருந்து வந்துள்ளார். இந்தநிலையில் கடந்த ஆகஸ்ட் மாதம் 17-ம் தேதி தான் தங்கியிருந்த அறையில் தூக்கிட்டு தற்கொலை செய்து கொண்டார். வெளிநாட்டு வேலைக்குச் சென்ற தன் மகனின் மரணத்தைக் கேள்விப்பட்ட தந்தை பரசுராமனும் தாய் பொட்டுவும் துடிதுடித்துப்போயினர்.

சவுதி அரேபியாவில் இறந்த தன் மகனின் உடலை இந்தியாவுக்குக் கொண்டு வர 2 மாதமாகப் போராடியும் எந்தப் பயனும் இல்லாத நிலையில் தவித்து வந்தனர். இதுகுறித்து நமது விகடனில் கடந்த வாரம் செய்தி வெளியிட்டிருந்தோம். இந்தச் செய்தி சவுதி அரேபியாவில் உள்ள தமிழர்களால் அதிகம் பகிரப்பட்டது.

ஜித்தா தமிழ்ச் சங்கத்தினர்
ஜித்தா தமிழ்ச் சங்கத்தினர்

இதேபோல் சவுதி அரேபியாவில் உள்ள ஜித்தா தமிழ்ச் சங்கத்தின் கவனத்துக்கும் செல்ல அவர்கள் உதவ முன்வந்தனர். ஜித்தா தமிழ்ச் சங்கத்தைச் சேர்ந்த பேரரசு மற்றும் சிராஜ் ஆகியோர் நம்மை தொடர்புகொண்டு இறந்த ராஜ்குமாரின் முகவரி, பெற்றோர் தொடர்பு எண் போன்றவற்றைக் கேட்டறிந்தனர்.

உடனடியாக அடுத்தகட்ட நடவடிக்கைக்கு களமிறங்கிய இந்தக் குழுவினர் 5 நாள்கள் நேரடியாகவும் தொலைபேசி வாயிலாகவும் தூதரகத்தையும் இளைஞர் பணியாற்றிய நிறுவனத்தையும் தொடர்புகொண்டு உடலைக் கொண்டு வருவதில் இருந்த சிக்கல்களை சரி செய்து நேற்று முன்தினம் சவுதியிலிருந்து விமானம் மூலம் உடலை அனுப்பி வைத்தனர்.

சிராஜ்
சிராஜ்

இதுகுறித்து நம்மிடம் பேசிய சவுதி அரேபியா ஜித்தா தமிழ்ச் சங்கம் நிர்வாகி சிராஜ், "திருச்சியைச் சேர்ந்த நான் கடந்த 35 ஆண்டுகளாக சவுதி அரேபியாவில் பணியாற்றி வருகிறேன். ஜித்தா தமிழ்ச் சங்கத்தில் 5,000-க்கும் அதிகமான உறுப்பினர்கள் உள்ளனர். சவுதி அரேபியாவில் உள்ள தமிழர்களுக்கு பல்வேறு உதவிகளைச் செய்து வருகிறோம். சட்டரீதியான சிக்கல்களையும் சரி செய்கிறோம்.

இந்தநிலையில், ராஜ்குமாரின் உடலை இந்தியாவுக்குக் கொண்டு செல்ல முடியாமல் 2 மாதங்களாகப் பெற்றோர்கள் போராடி வருவதை விகடன் செய்தி மூலம் அறிந்துகொண்டோம். பின்னர், அந்த இளைஞர் பணியாற்றிய நிறுவனம் அவர் தங்கியிருந்த முகவரி போன்றவற்றை அறிந்துகொண்டு தாம் நகரி இருக்கும் ஷாஜி மதிலகம் என்பவரின் துணையுடன் தூதரக அதிகாரிகள் மற்றும் இந்த இளைஞரின் ஸ்பான்சர் ஆகியோரை அணுகி உடலை சொந்த நாட்டுக்கு அனுப்புவதில் இருந்த சட்ட சிக்கல்களைக் கேட்டறிந்து கொண்டோம். உடனடியாக அவற்றைச் சரிசெய்து பேரரசு மற்றும் அனைவரின் கூட்டு முயற்சியுடன் அவரின் உடலை மீட்டு அனுப்பி வைத்தோம்" என்றார்.

மகன் ராஜ்குமார் உடலுடன் தந்தை பரசுராமன்
மகன் ராஜ்குமார் உடலுடன் தந்தை பரசுராமன்

2 மாதமாக மகனின் உடலை மீட்க முடியாமல் தவியாய் தவித்து வந்த பெற்றோர், பலரது முயற்சியால் சொந்த மண்ணுக்கு மகனின் உடலைக் கொண்டுவர பாடுபட்ட அனைவருக்கும் கண்ணீர் மல்க நன்றி தெரிவித்து, ராஜ்குமாரின் உடலுக்கு சொந்த ஊரான கூடலூர் சின்ன சூண்டியில் நேற்று இறுதி மரியாதை செலுத்தினர்.