தாகத்தில் தவிக்கும் தமிழகம்! - விருதுநகர் - “அகப்பைத் தண்ணிக்கே அம்புட்டு அல்லாட்டம்!"

இ யல்பிலேயே வறட்சியான மாவட்டம், விருதுநகர். போதிய மழை பெய்யாத காரணத்தால், மாவட்டம் முழுவதும் கடும் தண்ணீர்த் தட்டுப்பாடு நிலவுகிறது. நீர்நிலைகள் அனைத்தும் கட்டாந்தரையாகக் காட்சியளிக்கின்றன. மேய்ச்சல் நிலங்களில் குடிக்கத் தண்ணீர் இல்லாமல், ஆங்காங்கு தேங்கியிருக்கும் கழிவுநீரைக் குடிக்கின்றன கால்நடைகள்.

. விருதுநகர், சிவகாசி பகுதிகளில் தாமிரபரணி கூட்டுக் குடிநீர்த் திட்டம் மூலம் 15 நாள்களுக்கு ஒருமுறையும், ஸ்ரீவில்லிப்புத்தூர் பகுதியில் மானூர் கூட்டுக் குடிநீர்த் திட்டம்மூலம் 20 நாள்களுக்கு ஒருமுறையுமே குடிநீர் விநியோகம் செய்யப்பட்டு வருகிறது. விருதுநகர் நகராட்சிப் பகுதிகளில் தாமிரபரணி கூட்டுக் குடிநீர்த் திட்டம், ஆனைக்குட்டம் மற்றும் ஒண்டிப்புலி கல் குவாரியிலிருந்து பெறப்படும் தண்ணீர் ஆகியவை ஒன்றாகக் கலந்து விநியோகம் செய்யப்படுகிறது. இப்படி மூன்று இடங்களிலிருந்து பெறப்படும் தண்ணீரைக் கலந்து வழங்குவதால், தரமில்லாத அந்த நீரைக் குடிநீராகப் பயன்படுத்த முடியவில்லை.

முத்துராமலிங்கபுரம் கிராமத்தில் இரண்டு அல்லது மூன்று நாள்களுக்கு ஒருமுறை, ஒரு மணி நேரம் மட்டுமே குடிநீர் விநியோகம் செய்யப்படுகிறது. எனவே, குடிநீருக்காகப் பல ஆண்டுகளாக ஆற்றைத் தோண்டியே தண்ணீர் எடுத்து வருகின்றனர், மக்கள். நீண்ட நாள்களாக மழை இல்லாததால், தற்போது ஆற்றிலும் தண்ணீர் ஊறவில்லை. இதனால், ஒரு குடம் தண்ணீருக்காக சுமார் ஒரு மணி நேரம் காத்திருந்து அகப்பை மூலம், தண்ணீர் சேகரித்துச் செல்கின்றனர் மக்கள். கடுமையான வெயில் காரணமாக அதிகாலையிலேயே ஆற்றுக்குச் சென்று விடுகின்றனர். அப்படிக் காத்திருந்தும், ‘அகப்பை தண்ணிக்கே அம்புட்டு அல்லாட்டம்’ என்று வெயிலில் புலம்புகிறார்கள் மக்கள்.

- இரா.கோசிமின் படம்: ஆர்.எம்.முத்துராஜ்

விகடன் லேட்டஸ்ட்

தாகத்தில் தவிக்கும் தமிழகம்! - விருதுநகர் - “அகப்பைத் தண்ணிக்கே அம்புட்டு அல்லாட்டம்!"

இரா.கோசிமின்