Published:Updated:

தமிழகத்தின் ஈரம்: தஞ்சாவூர், பெரம்பலூர்

பெரம்பலூர் மாவட்டம் கருப்புப் பட்டியலில் இருக்கிறது.

பிரீமியம் ஸ்டோரி

தஞ்சாவூர்: ‘சோறு போடும் ஊர்... குடிப்பதற்கில்லை நீர்!’

‘தமிழகத்தின் நெற்களஞ்சியம்’ எனத் தஞ்சாவூர் பெயர் பெறுவதற்கு முக்கியக் காரணமாக விளங்கியது, கல்லணைதான். கல்லணையின் தண்ணீரால்தான் ஒருங்கிணைந்த தஞ்சாவூர் மாவட்டங்கள் பசுமை பூமியாக விளங்கின. டெல்டா மாவட்டங்களின் முக்கிய குடிநீர் ஆதாரமான கல்லணைப் பகுதி காவிரி ஆற்றுப்படுகை இன்று பாளம் பாளமாக வெடித்துப் பாலைவனமாகக் காட்சியளிக்கிறது.

மேட்டூரிலிருந்து வருகிற நீரைத் தேக்கி வைத்து வேண்டிய நேரத்தில் வேண்டிய திசைக்குத் திறந்து விடுவதற்காக மாமன்னன் கரிகாற்சோழ னால் கட்டப்பட்டது, கல்லணை. இந்த அணையில், அதிக அளவில் தண்ணீரைத் தேக்கி வைக்க முடியாது. சுமார் 100 மில்லியன் கன அடி அளவு தண்ணீரை மட்டுமே தேக்க முடியும். கல்லணையிலிருந்து, காவிரி, கல்லணைக் கால்வாய், வெண்ணாறு என மூன்று ஆறுகளின் வழியாகத் தண்ணீர் பிரித்து அனுப்பப்படுகிறது.

அதிக அளவு நீர்வரத்து இருந்தால், அது கொள்ளிடம் ஆற்றில் திறந்து விடப்படும். அந்தத் தண்ணீர் கடலில் கலந்துவிடும். தஞ்சாவூர் மாவட்டம் மட்டுமன்றி திருவாரூர், நாகப்பட் டினம், காரைக்கால், புதுக்கோட்டை ஆகிய மாவட்டங்களும் கல்லணையின் தண்ணீரைத்தான் நம்பியிருக்கின்றன. எப்போதும் ஜூன் மாதம் தண்ணீர் திறக்கப்படுவது வழக்கம். ஆனால், கடந்த பத்து ஆண்டுகளாக உரிய நேரத்தில் கல்லணைக்குத் தண்ணீர் வருவதில்லை. அதனால், பசுமை பூமியான தஞ்சாவூர் தண்ணீருக்காகத் தவித்து வருகிறது.

பொதுப்பணித்துறை, ஆறுகள், கால்வாய்களைத் தூர்வாரி பலப்படுத்தாததால், கடந்த ஆண்டு அதிகப்படியான தண்ணீர் கொள்ளிடம் ஆறு மூலமாகக் கடலில் வீணாகக் கலந்தது. முறையான நடவடிக்கை எடுத்திருந்தால் தஞ்சாவூர் மாவட்டத்தில் கிட்டத்தட்ட 703 ஏரிகள் நிறைந்திருக்கும்.

காவிரி மேலாண்மை ஆணை யம் பரிந்துரைத்த தண்ணீரைக் கர்நாடகா மாநிலத்திடமிருந்து பெறுவதற்கு எந்த முயற்சியும் எடுக்கவில்லை தமிழக அரசு. தொடர்ந்து கல்லணை காய்ந்து கிடந்தால், தமிழ்நாட்டின் நெற்களஞ்சியமான தஞ்சாவூர் வெகுவிரைவில் பாலைவனமாக மாறிவிடும்.

பெரம்பலூர்: வறண்டு கிடக்கும் விசுவக்குடி அணை... தாகம் தீர்க்கும் கொள்ளிடம் திட்டம்!

பெரம்பலூர் மாவட்டத்தில் வரலாறு காணாத அளவுக்கு வறட்சி நிலவுகிறது. இம்மாவட்டத்தின் முக்கிய குடிநீர் ஆதாரம், வேப்பந்தட்டை அருகே அமைந்துள்ள விசுவக்குடி அணை. இது காய்ந்து போய்க் கிடக்கிறது. நிலத்தடி நீரும் அதலபாதாளத்துக்குச் சென்றுவிட்டது.

விசுவக்குடி அணை
விசுவக்குடி அணை

விசுவக்குடி அணை, கல்லாறு ஓடையின் குறுக்கே கட்டப் பட்டுள்ளது. செம்மலை - பச்சை மலை ஆகிய மலைப்பகுதிகளில் பெய்யும் மழைநீர்தான் இந்த அணைக்கான நீர் ஆதாரம். 36 அடி உயரம் கொண்டது இந்த அணை. இதில், 41 மில்லியன் கன அடி நீரைத் தேக்கிவைத்து 30.67 மில்லியன் கன அடி நீரைப் பாசனத்துக்கும், 10 மில்லியன் கன அடி நீரைக் குடிநீர்த் தேவைக்கும் பயன்படுத்துவதாகத் திட்டமிடப்பட்டுள்ளது. கடந்த 2015-ம் ஆண்டு முதல்முறையாக முழுக் கொள்ளளவை எட்டியது, இந்த அணை. அந்த ஆண்டில் விவசாயத்துக்குத் தண்ணீர் திறந்துவிடப்பட்டது. 2017-ம் ஆண்டு பருவமழை யின்போது 22 அடி உயரம் மட்டும்தான் நிரம்பியது. எனவே, அந்த ஆண்டில் தண்ணீர் திறக்கப்படவில்லை.

கடந்த 2018-ம் ஆண்டு, இந்த அணையிலிருந்த 5 மில்லியன் கன அடி நீர், குடிநீருக்காக எடுக்கப்பட்டது. தற்போது, சொட்டுத் தண்ணீர்கூட இல்லாமல், பாலைவனம் போலக் காட்சியளிக்கிறது, இந்த அணை. பெரம்பலூர் மாவட்டம் கருப்புப் பட்டியலில் இருக்கிறது. தற்போது, கொள்ளிடம் கூட்டுக்குடிநீர் திட்டம் மட்டும்தான் பெரம்பலூர் மக்களின் தாகம் தீர்த்து வருகிறது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு