Published:Updated:

மக்கள் எதிர்பார்ப்பது இவற்றைத்தான்!

ஒட்டுமொத்த விகடனுக்கும் ஒரே ஷார்ட்கட்

Use App
மக்கள் எதிர்பார்ப்பது இவற்றைத்தான்!
மக்கள் எதிர்பார்ப்பது இவற்றைத்தான்!

மக்கள் எதிர்பார்ப்பது இவற்றைத்தான்!

பிரீமியம் ஸ்டோரி

ரும் 28ஆம் தேதி தமிழக சட்டமன்றம் கூடவிருக்கிறது. சட்டமன்றம் கூடுவது வழக்கமான நிகழ்வுதான். ஆனால் இந்தமுறை, சட்டமன்றக் கூட்டத்தொடர் தமிழக மக்கள் மத்தியில் பல எதிர்பார்ப்புகளை ஏற்படுத்தியிருக்கிறது. ஒருபுறம் ஆளுங்கட்சியான அ.தி.மு.க ஆட்சியைத் தக்கவைத்திருக்கிறது. இன்னொருபுறம் தி.மு.க தன் பலத்தை அதிகரித்திருக்கிறது. ‘மக்கள் ஆதரவு யாருக்கு?’ என்ற அனல் பறக்கும் விவாதங்கள், தலைமை வழிபாடுகள், சுயப்பிரதாபங்கள் ஆகியவற்றை இரண்டு கட்சிகளும் அரங்கேற்றும் என்று எதிர்பார்க்கப்படுகிறது. ஆனால் மக்கள் எதிர்பார்ப்பது இவற்றை அல்ல.

மக்கள் எதிர்பார்ப்பது இவற்றைத்தான்!

தண்ணீர்ப்பிரச்னை ஒட்டுமொத்தத் தமிழகத்தையும் பாதித்துள்ளது. குறிப்பாகத் தலைநகரம் சென்னை, வறட்சியால் வாடி வதங்கியிருக்கிறது. தண்ணீர்ப்பிரச்னை காரணமாகப் பல ஐ.டி நிறுவனங்கள், தங்கள் பணியாளர்களை வீட்டில் இருந்தே பணிபுரியும்படி அறிவுறுத்துகின்றன. உணவகங்களும் விடுதிகளும் மூடப்படுகின்றன. எல்லாவற்றுக்கும் மேலாக, சில பள்ளிகளும் தண்ணீர்ப்பிரச்னை காரணமாக மூடப்பட்டிருக்கின்றன. இவ்வளவு தூரம் பிரச்னை தீவிரமடைந்திருக்கும்போது தானாகவே தண்ணீர் தருவதாகக் கேரள முதல்வர் உதவிக்கரம் நீட்டியிருக்கிறார். ஆனால் வறட்சியை மறைத்து வறட்டுக் கௌரவம் காட்டியிருக்கிறது தமிழக அரசு.

கேரள முதல்வர் பினராயி விஜயனே சமூகவலைதளத்தில் இதைத் தெரிவித்த பிறகுதான் விஷயம் வெட்டவெளிச்சமாகியிருக்கிறது. ஆனாலும் தமிழக அரசு இதுகுறித்து இன்னும் போதிய அக்கறை காட்டவில்லை. தண்ணீர்ப்பிரச்னைக்கு என்னென்ன காரணங்கள் என்பது குறித்து எவ்வளவோ விவாதித்திருக்கிறோம். அவற்றையெல்லாம் சரிசெய்ய வேண்டிய பொறுப்பு ஆளுங்கட்சி, எதிர்க்கட்சி இரண்டுக்குமே உண்டு. இப்போதைய தண்ணீர்ப்பிரச்னையைத் தீர்ப்பது மட்டுமல்ல, எதிர்காலத்துக்கான திட்டங்களைத் தீட்டுவதும் முக்கியம்.

இருக்கும் பிரச்னைகளை வெளிப்படையாக விவாதிப்பதும் அதற்கான தீர்வு காண்பதும் ஆளுங்கட்சியின் கடமை. எடுத்ததற்கெல்லாம் வெளிநடப்பு செய்யாமல் ஆக்கபூர்வமான செயல்களில் ஈடுபட வேண்டியது எதிர்க்கட்சியான தி.மு.க-வின் கடமை. ஆளுங்கட்சியின் தவறுகளைச் சுட்டிக்காட்டுவது மட்டுமல்ல, முக்கியமான பிரச்னைகளைத் தீர்க்க ஆலோசனைகளை முன்வைப்பதும் கட்சி வேறுபாடுகளை மறந்து இணைந்து செயல்பட வேண்டியதும் எதிர்க்கட்சியின் முன் நிற்கும் பணிகள். இதை எதிர்பார்த்துதான் தமிழக மக்கள் சமீபத்திய தேர்தலில் வாக்களித்திருக்கிறார்கள் என்பதை இரண்டு கட்சிகளும் கவனத்தில்கொள்ள வேண்டும்.

தண்ணீர்ப்பிரச்னை முதன்மையான பிரச்னை என்றாலும் அத்துடன் புதிய கல்விக்கொள்கை குறித்த தமிழகத்தின் நிலைப்பாடு, ஹைட்ரோகார்பன், மின்தடை, காவிரி நீரைத் திறக்காமல் கர்நாடகம் இழுத்தடிப்பது என்று பல பிரச்னைகளும் அணிவகுத்து நிற்கின்றன. ஆக்கபூர்வமான செயல்களையே ஆளுங்கட்சியிடமும் எதிர்க்கட்சியிடமும் மக்கள் எதிர்பார்த்துக் காத்திருக்கின்றனர்.

சட்டை கிழிப்பு, வெட்டிச்சண்டைகள் இல்லாமல் மக்கள் நலனுக்காக இந்தச் சட்டமன்றக் கூட்டத்தொடர் பயன்படும் என்று நம்புவோம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு