Published:Updated:

ஹலோ வாசகர்களே..!

சாரதாவும் சஹாராவும் இனி வேண்டாமே!

பிரீமியம் ஸ்டோரி

ஏறக்குறைய 24,029 கோடி ரூபாயை உத்தரப்பிரதேசம் மற்றும் பீஹாரைச் சேர்ந்த அப்பாவி மக்களிடமிருந்து வசூலித்துவிட்டு, வெறும் 5,120 கோடி ரூபாய் மட்டுமே திரும்பத் தந்திருக்கிறது சஹாரா நிறுவனம். மீதமுள்ள 19,000 கோடி ரூபாய்க்கு தன்னிடமிருந்த சில நிலங்களைத் தந்து, எப்படியாவது தப்பிக்கப் பார்க்கிறது.

ஆனால், செபியும் உச்ச நீதிமன்றமும் சஹாரா நிறுவனத்தை விடுகிற மாதிரி இல்லை. மக்களிடமிருந்து வசூலித்தப் பணத்தைத் திரும்பத் தரும் வரை சஹாரா நிறுவனம் எந்த சொத்தையும் விற்கக்கூடாது என்றும், அந்த நிறுவனத்தின் அதிபர் சுப்ரதா ராய் வெளிநாடுகளுக்கு செல்லக்கூடாது என்றும் உச்ச நீதிமன்றம் உத்தரவு பிறப்பித்திருக்கிறது. இனியும் சஹாராவை நம்பமுடியாது. எனவே, மக்களிடம் வசூலித்தப் பணத்தை உடனடியாக கட்டவேண்டும் என்றும் எச்சரித்துள்ளது.

இன்றைய தேதியில் சஹாரா மட்டுமல்ல, பல ஆயிரம் நிறுவனங்கள் அரசாங்கத்திடமிருந்து எந்த அனுமதியும் பெறாமல், மக்களிடமிருந்து பணத்தை வசூலித்துக்கொண்டுதான் இருக்கின்றன. ஒரு பிரபலமான நிறுவனம் இன்ஷூரன்ஸ் என்கிற பெயரிலும், ரியல் எஸ்டேட் என்கிற பெயரிலும் எக்கச்சக்கமான பணத்தை மக்களிடமிருந்து வசூலித்து வருகிறது. சீட்டு பிடிக்கிறோம் என்கிற பெயரில் சந்துக்குச் சந்துக்கு பல ஆயிரம் பேர் பணத்தை வசூலித்துகொண்டுதான் இருக்கிறார்கள்.

ஹலோ வாசகர்களே..!

இந்தத் திட்டங்கள் எல்லாமே எந்த நிமிடத்திலும் தோல்வி அடையக்கூடிய அபாயம் கொண்டவை. அப்படி ஏதும் அசம்பாவிதம் நடந்தால், மக்கள் கஷ்டப்பட்டு சேர்த்த பல ஆயிரம் கோடி ரூபாய்க்கு யார் பொறுப்பு? சில மாதங்களுக்கு முன்பு மேற்கு வங்காளத்தில் சாரதா சிட் ஃபண்ட்ஸ் என்கிற நிறுவனம் செய்த மோசடியால்  பல்லாயிரம் குடும்பங்கள் பணத்தை இழந்து

ஹலோ வாசகர்களே..!

பரிதவித்ததை மறக்க முடியாது.    

இதுமாதிரியான மோசடி நிறுவனங்கள் பற்றி புகார் வந்தபிறகே விசாரிக்க ஆரம்பிப்போம் என அரசாங்கம் ஆசுவாசமாக இருக்காமல், அரசிடமிருந்து முறையான அனுமதி பெறாத எல்லா நிறுவனங்களையும் உடனுக்குடன் விசாரணை வளையத்துக்குள் கொண்டுவந்து, கண்காணித்தால் மட்டுமே மக்களின் பணம் தப்பும்! இல்லாவிட்டால் சாரதாக்களும் சஹாராக்களும் அன்றாட நிகழ்வுகளாகிவிடும்.

- ஆசிரியர்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு