Published:Updated:

பெருகட்டும் ஆரோக்கியமான போட்டி!

பெருகட்டும் ஆரோக்கியமான போட்டி!

பிரீமியம் ஸ்டோரி

ஹலோ வாசகர்களே..!

பெருகட்டும் ஆரோக்கியமான போட்டி!

‘‘100 பில்லியன் டாலர் முதலீடு வெளிநாடுகளிலிருந்து இந்தியாவுக்கு வரத் தயாராக இருக்கிறது. இந்த முதலீட்டு வாய்ப்பினைப் பயன்படுத்திக் கொள்வது மாநில அரசாங்கங்களின் கையில்தான் இருக்கிறது.  வளர்ச்சிப் பாதையில் இருக்கும் தடைக்கற்களை மாநில அரசாங்கங்கள் நீக்க வேண்டும்’’ என்று பேசியிருக்கிறார் பிரதமர் மோடி.

பிரதமரின் இந்தக் கருத்தை மாநில அரசாங்கங்கள் கட்சி பேதமின்றி வரவேற்பதில் எந்தத் தவறும் இருக்காது. காரணம், மத்திய அரசாங்கத்தோடு மாநில அரசுகளும் ஒன்றுசேர்ந்து உழைத்தால் மட்டுமே நம் நாடு பொருளாதார ரீதியில் மிகப் பெரிய வளர்ச்சி காணும்; ஒட்டுமொத்த இந்தியாவும் வளரும்.

மக்களின் பொருளாதாரம் வளமடைந்தால்தான் அவர்களின் மனதில் நிலைத்து நிற்க முடியும் என்பதை இன்றைக்கு ஏறக்குறைய எல்லா அரசியல் கட்சிகளும் நன்கு உணர்ந்திருக்கின்றன. அதனால்தான் பல மாநிலங்களின் முதல்வர்கள் தொழில் வளர்ச்சியைப் பெருக்க, அனைத்து முயற்சிகளையும் செய்கின்றனர். 

பெருகட்டும் ஆரோக்கியமான போட்டி!

மத்தியப் பிரதேச முதலமைச்சர் சிவராஜ் சிங் சவுகான், தனது மாநிலத்தில் சர்வதேச முதலீட்டாளர் மாநாட்டை நடத்தியதன் மூலம் 80,000 கோடி ரூபாய் முதலீட்டுக்கான உறுதியைப் பெற்றிருக்கிறார். ஆந்திரா மற்றும் தெலங்கானா மாநிலங்களின் முதல்வர்களும் புதிய முதலீடுகளைப் பெற அக்கறையோடு செயல்படுகின்றனர். இந்த விஷயத்தில்  கேரளாவும் அலாதி ஆர்வம் காட்டுகிறது. மாநிலங்களுக்கு இடையே யான இந்த போட்டியை ஆரோக்கியமான தாகவே நாம் கருத வேண்டும்.

ஆனால், வளர்ச்சிப் பாதையில் தமிழக அரசாங்கம் வெகுவாகப் பின்தங்கி இருப்பது நமக்கு வருத்தத்தையே தருகிறது. ஜிடிபி வளர்ச்சியில் தொடர்ந்து பின்தங்கு வதும், தொழில் தொடங்குவதற்கான போட்டித்திறனில் தமிழகம் பின்னோக்கிப் போவதுமாகவே இருக்கிறது. இந்த நிலையில், சிறையில் இருக்கும் முன்னாள் முதல்வருக்காக ஜாமீன் பெறுவதே தமிழக அரசு தனது தலையாய வேலையாக நினைத்து செயல்படுகிறது.

இது தவறில்லை என்றாலும், புதிய முதல்வர் வளர்ச்சிக்கு வழிவகுக்கும் நடவடிக்கைகளை உடனடியாக எடுக்காவிட்டால், பிற மாநிலங்களின் வேகமான வளர்ச்சியினால் தமிழகம் மாபெரும் வாய்ப்புகளை இழக்க நேரிடும். அப்படி ஒரு நிலை உருவானால், தமிழகத்தின் வளர்ச்சியே கேள்விக்குறியாகி, மக்களின் நம்பிக்கையை ஆளும்கட்சி இழந்துவிடும் என்பதில் சந்தேகமே இல்லை!                                                    

- ஆசிரியர்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு