Published:Updated:

வளர்ச்சியை வேகப்படுத்தும் நிதி அமைச்சரின் நடவடிக்கைகள்!

தலையங்கம்
பிரீமியம் ஸ்டோரி
News
தலையங்கம்

ஹலோ வாசகர்களே..!

தொழில் நிறுவனங்களுக்கான வரியை 30 சதவிகிதத்திலிருந்து 25 சதவிகிதமாகக் குறைக்க உத்தரவிட்டு, அடுத்த மாதம் வரவிருக்கும் தீபாவளியை இந்த மாதமே கொண்டு வந்திருக்கிறார் நிதி அமைச்சர் நிர்மலா சீதாராமன். அதுமட்டுமல்ல, இந்த ஆண்டு ஆகஸ்ட் 1-ம் தேதிக்குப்பிறகு தொடங்கப்பட்ட நிறுவனங்களுக்கு 17% மட்டுமே வரி விதிக்கப்படும் என்றும் அறிவித்திருக்கிறார். தவிர, குறைந்தபட்ச மாற்று வரியை (Minimum Alternative Tax) 15 சதவிகிதமாகக் குறைத்திருக்கிறார்.

வளர்ச்சியை வேகப்படுத்தும் நிதி அமைச்சரின் நடவடிக்கைகள்!

நிதி அமைச்சரின் இந்த அறிவிப்புகளைத் தொழில் துறை சார்ந்தவர்கள் ஏகமனதாக வரவேற்றிருக்கிறார்கள். ‘நிதி அமைச்சரின் இந்த நடவடிக்கை மிக மிகத் தைரியமானது’ எனப் பெரும் தொழிலதிபர்கள் எல்லோருமே புகழ்ந்து தள்ளியிருக்கிறார்கள். தொழில் நிறுவனங்களுக்கான சராசரி வரியானது உலக அளவில் 24 சதவிகிதமாக இருக்கிறது. ஆனால், இந்த சராசரி வரியைவிட அதிகமான வரியானது நம் தொழில் நிறுவனங்களுக்கு விதிக்கப்பட்டு வந்தது. இதைக் குறைக்க வேண்டும் எனத் தொழில் நிறுவனங்கள் கடந்த பல ஆண்டுகளாகவே கோரிவந்தன. அந்தக் கோரிக்கை இப்போது நிறைவேற்றப்பட்டு, சிங்கப்பூரில் தொழில் நிறுவனங்களுக்கு விதிக்கும் வரி அளவுக்கு மட்டுமே நம் நாட்டு நிறுவனங்களுக்கும் வரி விதிக்கப்பட இருப்பது எல்லோருக்கும் ஆனந்தத்தை அளிக்கக்கூடிய விஷயம்.

நமது பொருளாதார வளர்ச்சியானது கொஞ்சம் சுணக்கம் கண்டிருக்கும் நிலையில், மீண்டும் வேகமான வளர்ச்சி காண்பதற்கு நிதி அமைச்சர் இப்போது அறிவித்திருக்கும் இந்த அறிவிப்புகள் மிகவும் பயன்படும். தொழில் நிறுவனங்களுக்கான வரி குறையும்போது, நிறுவனங்களின் லாபம் அதிகரிக்கும். இந்த லாபத்தை மீண்டும் தொழில் துறையிலேயே முதலீடு செய்வதற்குப் பல நிறுவனங்கள் விரும்பும். இதனால் எல்லாவிதமான தொழில்களும் வளர்ச்சியடையும்; புதிய வேலைவாய்ப்புகள் உருவாகி, பொருளாதார வளர்ச்சி பெருகும். அதுமட்டுமல்ல, தொழில் நிறுவனங் களுக்கான வரி குறைவாக இருக்கும்போது, அதை எந்த நிறுவனமும் கட்டாமல் ஏமாற்ற முயற்சி செய்யாது. இதனால் கறுப்புப்பணம் உருவாவது குறையும்.

மத்திய அரசின் இந்த நடவடிக்கையால் அரசாங்கத்துக்கு ரூ.1.45 லட்சம் கோடி இழப்பு ஏற்படும். இதை மத்திய அரசாங்கம் எப்படி ஈடுசெய்யப் போகிறது என்பது முக்கியமான கேள்விதான். இந்த வருமான இழப்பினால் மத்திய அரசாங்கம் ஒன்றிரண்டு ஆண்டுகளுக்குச் சிரமப்படவேண்டியிருக்கும். ஆனால், அடுத்தடுத்த ஆண்டுகளில் வருமானம் உயர்வதன்மூலம் அந்தச் சிரமத்திலிருந்து வெளியே வந்துவிட முடியும்.

மத்திய அரசின் இந்த நடவடிக்கையைத் தொழில் துறை நிறுவனங்கள் நன்கு பயன்படுத்திக்கொண்டு, பொருளாதாரத்தை உயர்த்த வேண்டும் என்பதே நம் எல்லோரின் எதிர்பார்ப்பு!

- ஆசிரியர்

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz