Published:Updated:

குறையும் பொருளாதார வளர்ச்சி... முனைப்புடன் செயல்பட வேண்டிய நேரமிது!

ஹலோ வாசகர்களே..!

பிரீமியம் ஸ்டோரி

டந்த வெள்ளிக்கிழமை அன்று வெளியான சிங்கப்பூரின் பொருளாதார நிலை குறித்த புள்ளிவிவரம் உண்மையிலேயே எல்லோரையும் அதிர வைக்கும்படி இருக்கிறது. கடந்த 2009-ம் ஆண்டில் இரண்டாம் காலாண்டில் 1.2% வளர்ச்சியடைந்தது. அதன்பிறகு கடந்த காலாண்டில் 1.1% என்கிற மிகக் குறைவான நிலையை எட்டி, அதிர்ச்சிக்கு உள்ளாக்கியிருக்கிறது.

குறையும் பொருளாதார வளர்ச்சி... முனைப்புடன் செயல்பட வேண்டிய நேரமிது!

சிங்கப்பூரின் வளர்ச்சி குறைவதைப் பார்த்து நாம் இவ்வளவு தூரம் பதற்றப்பட வேண்டுமா என்று கேட்டால், நிச்சயம் பதற்றப்படத்தான் வேண்டும். காரணம், உலகப் பொருளாதாரம் செழிப்பாக இருக்கிறதா, இல்லையா என்பதைக் காட்டும் கண்ணாடிதான் சிங்கப்பூர் பொருளாதாரம். அந்த நாட்டின் பொருளாதாரம் சிறப்பாக இருந்தால், உலகமே சுறுசுறுப்பாகச் செயல்படுகிறது என்று அர்த்தம். அந்த நாட்டின் பொருளாதாரம் சரியில்லை என்றால், உலகமே சோம்பித் தூங்குகிறது என்று அர்த்தம். ஆக, மீண்டுமொரு பொருளாதார சுணக்கத்தை நாம் சந்திக்கவேண்டிய கட்டாயத்தில் இருக்கிறோம் என்பதற்குக் கட்டியம் கூறுகிறது சிங்கப்பூர் பொருளாதாரம்.

சிங்கப்பூர் மட்டுமல்ல, தென்கொரியாவின் பொருளாதாரமும் நெருக்கடியில் இருக்கிறது. சீனாவின் வளர்ச்சியோ கடந்த 27 ஆண்டுகளில் இல்லாத அளவுக்குக் குறைந்திருக்கிறது. அமெரிக்கா மற்றும் ஐரோப்பிய நாடுகளின் வளர்ச்சியானது மட்டுப்பட்டிருக்கும் நிலையில், ஆசிய நாடுகளோ பொருளாதார நெருக்கடியில் சிக்கும் நிலைக்குத் தள்ளப்பட்டிருக்கின்றன.

உலகப் பொருளாதார இயந்திரத்தை இயக்கும் முக்கியமான நாடுகளே திக்கித் திணறிக்கொண்டிருக்கும் நிலையில், நமது பொருளாதாரம் மட்டும் அடுத்த சில காலாண்டுகளில் பெரிய அளவில் வளர்ந்துவிடும் என்று நிச்சயம் எதிர்பார்க்க முடியாது. இந்த ஆண்டில் நமது ஜி.டி.பி வளர்ச்சியானது 6.8 சதவிகிதத்திலிருந்து கொஞ்சம் உயர்ந்து 7% வரை தொடலாம். அல்லது 6.8% என்கிற அளவுக்குக்கூட நம்மால் வளரமுடியாமல் போகலாம்.

ஆனால், இந்த நிலையை நினைத்து நாம் கலங்கிப் போய்விடக்கூடாது என்பதுதான் முக்கியமான விஷயம். உலக நாடுகளின் பிரச்னை எப்படியிருந் தாலும், நம் நாட்டில் வளர்ச்சிக்கான வாய்ப்பு பிரகாசமாகவே இருக்கிறது. உள்கட்டமைப்பு, கல்வி, மருத்துவம், தொழில்நுட்பம், வங்கி என ஒவ்வொரு துறையிலும் நம் நாடு காணவேண்டிய வளர்ச்சி நிறையவே இருக்கிறது. இந்தத் துறைகளில் நாம் செய்யவேண்டிய வேலைகளைப் பட்டியலிட்டு, அந்த வேலைகளைச் சளைக்காமல் செய்தாலே போதும், நம் பொருளாதாரம் தளர்ந்துபோகும் நிலை ஏற்படாது.

சிங்கப்பூரின் பொருளாதார நிலையை ஒரு எச்சரிக்கையாக எடுத்துக்கொண்டு, நமது மத்திய அரசாங்கமும் மக்களும் உற்சாகமாகச் செயல்பட்டால், நம்மால் நிச்சயம் முன்னேற்றம் காணமுடியும் என்பதில் சந்தேகம் இல்லை!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு