Published:Updated:

பொருளாதார வளர்ச்சியைத் துரிதப்படுத்துங்கள்!

ஹலோ வாசகர்களே..!

பிரீமியம் ஸ்டோரி

த்திய ரிசர்வ் வங்கி இப்போது ரெப்போ விகிதத்தை 0.35% குறைத்துள்ளது. பொருளாதார வளர்ச்சி குறைந்து வருவதைக் காரணம் காட்டித்தான் ரிசர்வ் வங்கி வட்டி விகிதத்தைத் தற்போது குறைத்துள்ளது.

ஆனால், ரிசர்வ் வங்கியானது வட்டி விகிதத்தைக் குறைக்கிற அளவுக்குப் பொதுத்துறை மற்றும் தனியார் வங்கிகள் குறைக்கிறதா என்றால், குறைப்பதில்லை என்பதே சரியான பதில். கடந்த ஆறு மாதங்களில் ரிசர்வ் வங்கி 0.75% வட்டி விகிதத்தைக் குறைத்தாலும் வங்கிகள் 0.29% என்கிற அளவுக்கு மட்டுமே வட்டி விகிதத்தைக் குறைத்துள்ளன. இந்த வட்டியையும் தனியார் வங்கிகள் 0.37% குறைத்துள்ள நிலையில், பொதுத்துறை வங்கிகளோ 0.22% அளவுக்கே குறைத்துள்ளன.

பொருளாதார வளர்ச்சியைத் துரிதப்படுத்துங்கள்!

நிலையான மூலதன உருவாக்கமானது முன்பு நமது ஜி.டி.பி-யில் 35% என்கிற அளவில் இருந்தது, தற்போது 29% என்கிற அளவுக்குக் குறைந்திருப்பது பொருளாதார வளர்ச்சியானது சுணங்கத் தொடங்கியிருக்கிறது என்பதையே காட்டுகிறது. தவிர, கடந்த 2018-ம் ஆண்டில் பிப்ரவரி முதல் ஜூலை வரையிலான ஆறு மாதங்களில் வங்கிகள் வழங்கிய கடன் ரூ.3.76 லட்சம் கோடியாக இருந்தது; ஆனால், நடப்பு 2019-ம் ஆண்டில் அதே காலகட்டத்தில் அது ரூ.2.27 லட்சம் கோடியாகக் குறைந்திருப்பதும் பொருளாதாரத்தின் வளர்ச்சி மட்டுபடத் தொடங்கியிருப்பதற்கான இன்னொரு அடையாளம்.

இந்த நிலையில், பொருளாதார வளர்ச்சியைத் துரிதப்படுத்த மத்திய அரசாங்கம் முக்கியமான பல நடவடிக்கைகள் எடுக்க வேண்டும் என மஹிந்திரா & மஹிந்திரா நிறுவனத்தின் தலைவர் ஆனந்த் மஹிந்திரா சொல்லியிருப்பது கவனிக்கத்தக்கது. பொருளாதாரத்தின் போக்கினைத் துல்லியமாக எடுத்துச்சொல்லும் ஆட்டோமொபைல் துறையானது கடந்த சில மாதங்களாகக் கடுமையாகப் பாதிப்படைந்துள்ளது. கார் வாங்குபவர்களின் எண்ணிக்கை குறைந்ததால், உற்பத்தி குறைந்து, பல ஆயிரம் பேர் வேலை இழக்கவேண்டிய கட்டாயம் ஏற்பட்டுள்ளது. காருக்கான ஜி.எஸ்.டி வரியைக் குறைந்தபட்சம் 5% அளவுக்காவது குறைத்தால், அந்தத் துறை மீண்டும் வளர்ச்சிப் பாதையில் செல்லும் என்று சொல்லியிருக்கிறார் அவர்.

இதேபோல, ஐ.டி.சி-யின் சஞ்சீவ் புரி, விப்ரோவின் ரிசாத் பிரேம்ஜி, வோடபோனின் பாலேஷ் சர்மா ஆகியோரும் நலிந்துகொண்டிருக்கும் பல்வேறு துறைகளை ஊக்குவிக்கத் தேவையான நடவடிக்கைகளை மத்திய அரசாங்கம் வேகமாக எடுக்க வேண்டும் என்று வேண்டுகோள் வைத்திருக்கின்றனர்.

வெளிநாட்டு போர்ட்ஃபோலியோ முதலீட்டாளர்களுக்கான வரி உயர்வை நீக்கப் பரிசீலித்து வருவதாகச் செய்தி வெளியிட்டு பங்குச் சந்தை இறங்குதைத் தடுத்ததுபோல, பொருளாதார வளர்ச்சியை வேகப்படுத்து வதற்கான வேலையையும் மத்திய அரசாங்கம் கட்டாயம் செய்ய வேண்டும். இதற்கான அறிவிப்புகளை இனி எதிர்பார்ப்போம்!

- ஆசிரியர்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு