Published:Updated:

விலை போகாது!

பசுமை விகடன்
பிரீமியம் ஸ்டோரி
News
பசுமை விகடன்

அனைவருக்கும் பசுமை வணக்கம்!

“நானும் மாடு வளர்த்திருக்கிறேன். முதலில் நான் விவசாயி, அப்புறம்தான் முதல்வர்.’’

-இப்படி அமெரிக்காவில் நெகிழ்ந்திருக்கிறார் தமிழக முதல்வர் எடப்பாடி கே.பழனிசாமி. தனது வெளிநாட்டுப் பயணத்தின்போது, அமெரிக்க நாட்டின் பஃபல்லோ நகரில் உள்ள நவீன கால்நடைப் பண்ணையில் உள்ள மாடுகளுக்கு ஆசையுடன் தீவனத்தை எடுத்துக்கொடுத்து, தனது மாடு வளர்ப்பு அனுபவத்தை அருகில் உள்ளவர்களிடம் சிலிர்ப்புடன் சொல்லியிருக்கிறார்.

சேலம் மாவட்டம், தலைவாசலில் அமையவுள்ள ஆசியாவின் பெரிய கால்நடைப் பண்ணையை உருவாக்கத்தான், முதல்வர் இந்தக் கால்நடைப் பண்ணையைப் பார்வையிட்டார் என அரசுத்தரப்பில் அறிக்கை வெளியிடப்பட்டுள்ளது. முதல்வரின் கால்நடைப் பற்றிய ஆர்வத்தையும் ஆசியாவுக்கே முன்னுதாரணமான பண்ணையை உருவாக்கும் திட்டத்தையும் வரவேற்போம்.

அதேசமயம் தமிழ்நாட்டில் உள்ள கால்நடைப் பண்ணைகள் மீதும், அரசு கவனம் செலுத்த வேண்டும். திருவாரூர் மாவட்டம், கொருக்கையில் உள்ள கால்நடைப் பண்ணையில் உம்பளாச்சேரி நாட்டு மாடுகள் உள்ளன. இந்தப் பண்ணையை விரிவுப்படுத்தவும், அந்த மண்ணுக்குச் சொந்தமான உம்பளாச்சேரி மாடுகளை வளர்த்தெடுக்கவும் அரசு ஆர்வம் காட்டாமல் உள்ளது. இதேபோல, கிருஷ்ணகிரி மாவட்டம், ஓசூர் பகுதியில் ஆயிரம் ஏக்கருக்கு மேல் விரிந்துள்ள மத்திகிரி கால்நடைப் பண்ணையும் கவனம் பெறாமல் உள்ளது. இவை மட்டுமல்ல, மாநிலம் முழுவதும் பரவலாக உள்ள மாவட்டக் கால்நடைப் பண்ணைகளின் நிலையும் சொல்லிக்கொள்ளும்படி இல்லை. வெளிநாட்டில் உள்ள கால்நடைப் பண்ணைகளைப் பார்வையிட்டு, பரவசப்பட்ட முதல்வர், தமிழ்நாட்டில் உள்ள பண்ணைகளையும் பார்வையிட்டு, கால்நடை வளம் பெருக நடவடிக்கை எடுக்க வேண்டும். இல்லையேல் ‘உள்ளூர் மாடு விலை போகாது’ என்பது உண்மையாகிவிடும்.

-ஆசிரியர்