Published:Updated:

பசுமை முயற்சி!

பசுமை விகடன்
பிரீமியம் ஸ்டோரி
News
பசுமை விகடன்

அனைவருக்கும் பசுமை வணக்கம்!

‘ஒரு குடம் தண்ணி ஊத்தி ஒரு பூ பூத்துச்சாம்,

ரெண்டு குடம் தண்ணி ஊத்தி ரெண்டு பூ பூத்துச்சாம்...’

-இனி இது பள்ளிக் குழந்தைகள் பாடும் வெறும் பாடலாக மட்டும் இருக்காது; நடைமுறைக் கல்வியாகவும் மாறும் காலம் கனிந்துவிட்டது.

‘நாடு முழுவதுமுள்ள பள்ளிகளில் ஊட்டச்சத்துத் தோட்டம் அமைக்க வேண்டும். அதில் விளையும் காய்கறிகளை மதிய உணவுக்குப் பயன்படுத்த வேண்டும்’ என்ற உத்தரவைப் பிறப்பித்துள்ளது, மத்திய மனிதவள மேம்பாட்டு அமைச்சகம். வெறும் உத்தரவாக மட்டும் பிறப்பிக்காமல், அந்த ஊட்டச்சத்துத் தோட்டம் எப்படி அமைய வேண்டும், வேளாண் அறிவியல் நிலையம், வேளாண் பல்கலைக்கழகம்... போன்ற அமைப்புகள் இதற்கு எப்படி வழிகாட்டியாகச் செயல்பட வேண்டும் என்றெல்லாம் தெளிவாகக் குறிப்பிட்டிருக்கிறது.

`பள்ளிகளில் அமையும் இந்தத் தோட்டங்களில் இயற்கை உரங்களைத்தான் பயன்படுத்த வேண்டும்’ எனக் குறிப்பிடப்பட்டிருப்பது கவனிக்கத்தக்கது. மதிய உணவுக்குக் காய்கறி வழங்கும் தோட்டமாக அல்லாமல் குழந்தைகளுக்கு விவசாயத்தின் மீதும், சுற்றுச்சூழல் மீதும் ஆர்வம் ஏற்படுத்தும் நல்முயற்சிதான் இந்தத் திட்டம். தமிழ்நாட்டில், `வீட்டுத்தோட்டம் அமைக்க வேண்டும்’ என்ற விழிப்புணர்வை ஏற்படுத்த ‘பசுமை விகடன்’ தொடர்ந்து கருத்தரங்குகள், பயிற்சிப் பட்டறைகளைப் பல ஆண்டுகளாக நடத்திவருகிறது. இவற்றின் மூலம் ஊக்கம் பெற்று, இயற்கைவழி முறையில் காய்கறித்தோட்டம் அமைத்து, அதைத் தங்களின் பாடத்திட்டத்தில் ஒரு பகுதியாகச் செயல்படுத்திவரும் முன்மாதிரிப் பள்ளிகள் சென்னை, ஈரோடு, கோயம்புத்தூர், திருவாரூர்... என மாநிலம் முழுவதும் பரவலாக உள்ளன என்பது குறிப்பிடத்தக்கது. மாணவர்களுக்குப் பாடச்சுமையின் மன இறுக்கத்தைக் குறைத்து, மனதில் மகிழ்ச்சியைப் பூக்கவைக்க, பள்ளிகளில் அமையவிருக்கும் ஊட்டச்சத்துத் தோட்டங்கள் சிறந்த களமாகத் திகழட்டும்; மத்திய அரசின் இந்தப் பசுமை முயற்சி தொடரட்டும்!

-ஆசிரியர்