மாத்தி யோசிக்குமா மத்திய அரசு?

அ னைவருக்கும் பசுமை வணக்கம்!

‘இந்திய உணவுக் கழகத்தில் கையிருப்பில் இருக்கும் அரிசி கிருமிநாசினி தயாரிக்க வழங்கப்படும்.’

- இப்படி ஓர் அறிவிப்பை வெளியிட்டு, நாட்டு மக்களை அதிர்ச்சியில் ஆழ்த்தியிருக்கிறது மத்திய அரசு. ‘`நாடு முழுவதும் கொரோனா பாதிப்பால் கிருமி நாசினிக்குத் தட்டுப்பாடு அதிகரித்திருக்கிறது. இந்திய உணவுக் கழகச் சேமிப்புக் கிடங்குகளில் உபரியாக உள்ள அரிசியைப் பயன்படுத்தி எத்தனால் தயாரிக்க முடிவு செய்யப்பட்டுள்ளது. இதன் மூலம் கிருமிநாசினி தயாரிக்கவும், எஞ்சிய எத்தனாலை பெட்ரோலுடன் கலக்கவும் முடிவு செய்யப்பட்டுள்ளது’’ என்று மத்திய அரசு தரப்பில் நீளமான விளக்கம் கொடுத்திருக்கிறார்கள்.

. செவ்வாய்க் கிரகத்துக்குச் செயற்கைக்கோள் அனுப்பிய நாடுகளே `கொரோனா தாக்குதல் இன்னும் எவ்வளவு காலத்துக்கு நீடிக்குமோ...’ என்று கலங்கி நிற்கின்றன. இந்தச் சமயத்தில் நாட்டு மக்களின் உணவுத் தேவைக்காக வைத்திருக்கும் தானியத்தை எடுத்து, கிருமிநாசினி தயாரிக்க முன்வந்திருப்பதற்குப் பல தரப்புகளிலுமிருந்தும் எதிர்ப்புகள் எழுந்த வண்ணம் உள்ளன. இந்தியாவில் இன்னும்கூட 30 கோடிக்கும் மேற்பட்டவர்களுக்கு போதுமான அளவு உணவு கிடைக்கவில்லை. இதை அரசு உணரவில்லை என்பதையே இது காட்டுகிறது.

இயற்கை வளமும், அறிவு வளமும் குறைவாகவிருக்கும் நாடுகள்தான் வேறு வழியில்லாமல் உணவுப் பொருளைக்கொண்டு கிருமிநாசினி உற்பத்தி செய்வார்கள். ஆனால் நம்மிடமோ, கிருமிநாசினி தயாரிக்க வேம்பு, மஞ்சள்... என ஏராளமான பொருள்கள் இருக்கின்றன. அதுமட்டுமா... மத்தியில் ஆளும் பி.ஜே.பி அரசின் துணை அமைப்பான ஆர்.எஸ்.எஸ் அமைப்பினர், ‘‘கோமாதா, எங்கள் குலமாதா. பசுவில் கிடைக்கும் பஞ்சகவ்யா பொருள்கள் அற்புதமான மருந்துகள்’’ என்று பிரசாரமே செய்துவருகிறார்கள். பசு மாட்டின் பால், தயிர், சாணம், சிறுநீர் போன்றவற்றைப் பயன்படுத்தி சோப்பு, ஷாம்பூ, பற்பொடிகள் தயாரித்துவருகிறார்கள். ஆக, பசுவின் பொருள்களைப் பயன்படுத்திக் கிருமிநாசினியையும் நிச்சயம் தயாரிக்க முடியும். இதைச் செயல்படுத்தினால், லட்சக்கணக்கான விவசாயிகளும் பயன்பெறுவார்கள்; கோடிக்கணக்கான மக்களுக்கு உணவும் கிடைக்கும். மத்திய அரசு மாத்தி யோசிக்க வேண்டிய நேரம் இது.

- ஆசிரியர்