Published:Updated:

நாடற்றவர்கள் நலன் காக்க வேண்டும்!

தலையங்கம்
பிரீமியம் ஸ்டோரி
தலையங்கம்

இனக் கலவரங்கள் நிகழ்ந்த 1983-ம் ஆண்டு முதல் இறுதிக்கட்டப் போர் நடந்த 2009 வரை 3.4 லட்சம் இலங்கைத் தமிழர்கள் அகதிகளாகத் தமிழகத்துக்கு வந்தனர்

நாடற்றவர்கள் நலன் காக்க வேண்டும்!

இனக் கலவரங்கள் நிகழ்ந்த 1983-ம் ஆண்டு முதல் இறுதிக்கட்டப் போர் நடந்த 2009 வரை 3.4 லட்சம் இலங்கைத் தமிழர்கள் அகதிகளாகத் தமிழகத்துக்கு வந்தனர்

Published:Updated:
தலையங்கம்
பிரீமியம் ஸ்டோரி
தலையங்கம்

தாலிபன்கள் பிடியில் ஆப்கானிஸ்தான் சிக்கியுள்ள நிலையில், ஆயிரக்கணக்கான மக்கள் அங்கிருந்து அச்சத்துடன் வெளியேறிவருகிறார்கள். ‘அடுத்த நான்கு மாதங்களில் ஏறத்தாழ ஐந்து லட்சம் ஆப்கன் மக்கள் அகதிகளாக வெளியேறலாம்’ என்று ஐ.நா தெரிவித்துள்ளது. ஆப்கன் அகதிகளை உலக நாடுகள் அரவணைத்துக்கொள்ள வேண்டும் என வேண்டுகோள்கள் எழுந்துள்ளன.

இப்படி உலகெங்கும் அகதிகள் குறித்த அக்கறை விவாதங்கள் எழுந்திருக்கும் நிலையில், தமிழகத்தில் வசிக்கும் இலங்கைத் தமிழர்களின் வாழ்வாதார நலனுக்காக 10 திட்டங்களை அறிவித்திருக்கிறார் தமிழ்நாட்டு முதல்வர் ஸ்டாலின். முகாம்களில் வசிப்பவர்களுக்கு வழங்கப்பட்டு வந்த பணக்கொடையை உயர்த்தியது, வீடுகளைச் சீரமைப்பதற்கு நிதி ஒதுக்கியது, இலங்கைத்தமிழ் மாணவர்களின் கல்விச்செலவைத் தமிழக அரசே ஏற்பது உள்ளிட்ட நம்பிக்கையும் ஆறுதலும் தரும் அறிவிப்புகளை வெளியிட்டிருக்கிறார்.

இனக் கலவரங்கள் நிகழ்ந்த 1983-ம் ஆண்டு முதல் இறுதிக்கட்டப் போர் நடந்த 2009 வரை 3.4 லட்சம் இலங்கைத் தமிழர்கள் அகதிகளாகத் தமிழகத்துக்கு வந்தனர். பலர் தாயகம் திரும்பிவிட்ட நிலையில், 58,822 இலங்கைத் தமிழர்கள் 108 முகாம்களில் தங்க வைக்கப்பட்டுள்ளனர். சுமார் 35,000 பேர் உரிய பதிவுகளைப் பெற்று முகாம்களுக்கு வெளியில் வசித்துவருகிறார்கள். நார்வே, கனடா, பிரிட்டன் என்று பல நாடுகளுக்குச் சென்ற இலங்கைத் தமிழர்களின் அடுத்த தலைமுறை அங்கே கண்ணியமான வாழ்க்கை நிலைக்கு மாறிவிட்டது. இங்கே 38 ஆண்டுகள் கடந்தும் அவர்களின் நிலை மாறவில்லை. ஒரு தலைமுறை அகதி வாழ்க்கையை வாழ்ந்து முடித்திருக்கிறது. அடுத்த தலைமுறையும் அகதி அடையாளத்துடனேயே வாழ நேர்ந்திருக்கிறது.

தலையங்கம்
தலையங்கம்

தங்களுக்கு இந்தியாவில் குடியுரிமை வழங்கவேண்டும்; சுதந்திரமாக வாழ அனுமதிக்கவேண்டும். கல்வி, வேலைவாய்ப்புகளை வழங்க வேண்டும் என்று நீண்டகாலமாகக் கோரிவருகிறார்கள் இலங்கைத் தமிழர்கள். இப்போது ஆப்கானிஸ்தானில் பாதிக்கப்பட்ட மக்களைக்கூட இந்தியாவுக்குள் அனுமதிக்கிறது மத்திய அரசு. இலங்கைத் தமிழ் அகதிகளையோ, ‘அவர்கள் சட்டவிரோதமாகக் குடியேறியவர்கள். அவர்களுக்குக் குடியுரிமை வழங்க முடியாது’ என்கிறது.

ஒலிம்பிக் போட்டிகளில்கூட நாடற்றவர்கள் அணி பங்கேற்கும் அளவுக்கு உலகெங்கும் அகதிகள் குறித்த பார்வை மாறியிருக்கிறது. இந்த மாற்றத்தில் இந்தியாவும் இணைய வேண்டும்.

கடந்த காலங்களில் தி.மு.க மற்றும் அ.தி.மு.க அரசுகள், ‘தமிழகத்தில் வசிக்கும் இலங்கைத் தமிழர்களுக்கு இரட்டைக் குடியுரிமை வேண்டும்’ என வலியுறுத்தின. இரட்டைக் குடியுரிமை என்றால் அவர்களுக்கு இலங்கைக் குடியுரிமையும் வேண்டும், இந்தியக் குடியுரிமையும் வேண்டும். இந்தியாவில் அதற்கான சட்டங்கள் இல்லை. குடியுரிமைத் திருத்தச் சட்டத்தில் பாகிஸ்தான், ஆப்கானிஸ்தான், வங்காளதேசம் போல இலங்கையும் சேர்க்கப்பட்டால் மட்டுமே இவர்களுக்குக் குடியுரிமை வழங்க முடியும் என்ற நிலை உள்ளது. மத்திய அரசு இதைச் செய்ய வேண்டும். அதற்காகத் தமிழக அரசு செய்யும் முயற்சிகளுக்கு மக்கள் ஆதரவாக நிற்பார்கள். இலங்கை அகதிகளுக்குக் குடியுரிமை உள்ளிட்ட கண்ணியமான வாழ்வைப் பெற்றுத் தருவதே நிரந்தரத் தீர்வாக இருக்கும்.

ஒட்டுமொத்த விகடனுக்கும் ஒரே ஷார்ட்கட்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism