Published:Updated:

சரியான கோரிக்கை வைத்த முதல்வருக்கு சபாஷ்!

தலையங்கம்
பிரீமியம் ஸ்டோரி
தலையங்கம்

தலையங்கம்

சரியான கோரிக்கை வைத்த முதல்வருக்கு சபாஷ்!

தலையங்கம்

Published:Updated:
தலையங்கம்
பிரீமியம் ஸ்டோரி
தலையங்கம்

‘‘ரூ.5 கோடி வரை நிலுவையைக் கொண்டுள்ள அனைத்து சிறு கடனாளர்களுக்கும் குறைந்த அளவு 2021-22-ம் ஆண்டின் முதல் இரண்டு காலாண்டுகளுக்கு கடன்களைத் திருப்பிச் செலுத்துவதற்கு ஒன்றிய அரசு கூடுதல் அவகாசம் அளிக்க வேண்டும்’’ என்கிற கோரிக்கையை முன்வைத்திருக்கிறார் தமிழக முதல்வர் மு.க.ஸ்டாலின். கூடவே, ‘இந்தக் கோரிக்கையை ஒன்றிய அரசிடம் வலியுறுத்த வேண்டும்’ என 12 மாநில முதல்வர்களுக்குக் கடிதமும் எழுதியிருக்கிறார்.

மிகச் சரியான நேரத்தில் மிகச் சரியான கோரிக்கையைத்தான் முன்வைத்திருக் கிறார் முதல்வர். காரணம், இன்றைக்குத் தொழில் நிறுவனங்கள் சொல்லித் தீர்க்க முடியாத பெரும் சிக்கலில் இருக்கின்றன. கடந்த ஆண்டு ஏறக்குறைய நான்கு மாதங்கள் வரை ஊரடங்கு நடவடிக்கைகள் நீண்டதில் தொழில் நிறுவனங்கள் செயல்பட முடியாமல் போயின. கடும் நெருக்கடியையும் சமாளித்து, மீண்டும் நல்லபடியாகத் தொழில் செய்யத் தொடங்கிவிடலாம் என நம்பிக்கையுடன் எழுந்த சமயத்தில், கோவிட் இரண்டாவது அலை வந்து அனைத்துத் தொழில்களையும் முடக்கிவிட்டது.

இதனால் ஏற்பட்ட பாதிப்புகளைத் தாங்கிக்கொள்ள முடியாத பல நிறுவனங்கள் ‘போதும் தொழில் செய்தது...’ என்று இழுத்து மூடும் அளவுக்கு கடுமையான முடிவை எடுத்து வருகின்றன. சென்னையில் கடந்த 70 ஆண்டுகளாக சிறப்பாகச் செயல்பட்டு வந்த விட்கோ நிறுவனம் சில நாள்களுக்கு முன்பு மூடப் பட்டது. ஆனால், ஒரு விட்கோ மூடப்பட்ட செய்திதான் வெளியே வந்திருக்கிறது. ‘வெளியே சொன்னால் அவமானம்’ என்று நினைத்து, காதோடு காதாக பூட்டைத் தொங்கவிட்டு, இடத்தைக் காலி செய்த நிறுவனங்கள் பல ஆயிரம்.

கடந்த ஆண்டு அறிவிக்கப்பட்ட ஆத்மநிர்பார் திட்டத்தின்கீழ் தந்த சில கடனுதவிகள் சிலருக்கு மட்டுமே கிடைத்தன. அந்தச் சிறு உதவிகூட இந்த ஆண்டு கிடைக்கிற மாதிரி இல்லை. இந்த நிலையில், சிறு தொழில் நிறுவனங்களுக்கு அரசாங்கம் செய்யக்கூடிய ஒரே உதவி, கடனைத் திரும்பக் கட்டுவதற்கான கால அவகாசம் தருவதுதான். காரணம், கடன் வாங்கி நிறுவனங்கள் 90 நாள்களுக்குள் கடன் தவணையைக் கட்டாவிட்டால், அதை வாராக்கடன் பட்டியலில் வங்கிகள் சேர்த்துவிடுகின்றன. தொழில் சிக்கலில் இருக்கும் நிலையில், இந்த வாராக்கடன் பிரச்னையையும் சமாளிப்பது பெரும்பாடாக இருக்கிறது. இந்த நிலையில், அவர்களுக்குக் கிடைக்கும் கால அவகாசமானது மீண்டும் நம்பிக்கையுடனும் புதிய உற்சாகத்துடனும் தொழிலை செய்ய வழிவகுக்கும்.

இது தொழில் நிறுவனங்களுக்கு மட்டுமல்ல, அந்தத் தொழில் நிறுவனங்களை நம்பியிருக்கும் பல லட்சம் தொழிலாளர்களுக்கும் மனிதாபிமான முறையில் செய்யப்படும் உதவி என்றே பார்க்க வேண்டும். இதற்குத் தேவையான நடவடிக்கைகளை மத்திய நிதி அமைச்சகமும் ஆர்.பி.ஐ-யும் உடனடியாக எடுத்தால் மட்டுமே பொருளாதார வளர்ச்சி மீண்டும் உருவாகும் என்பது நிச்சயம்!

- ஆசிரியர்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism