Published:Updated:

பள்ளியில் ஜெயிக்க பக்கா பிளான்!

ஒட்டுமொத்த விகடனுக்கும் ஒரே ஷார்ட்கட்

Use App
பள்ளியில் ஜெயிக்க பக்கா பிளான்!
பள்ளியில் ஜெயிக்க பக்கா பிளான்!

வி.எஸ்.சரவணன் - ஓவியம்: ஜி.ராமமூர்த்தி

பிரீமியம் ஸ்டோரி
பள்ளியில் ஜெயிக்க பக்கா பிளான்!

கோடை விடுமுறை முடிந்து, புதிய வகுப்புக்குச் செல்லும் உற்சாகத்தில் இருக்கிறீர்களா ஃப்ரெண்ட்ஸ்? பள்ளி தொடங்கிய நாளிலிருந்தே நீங்கள் பின்பற்ற வேண்டியவற்றை பக்கா பிளான் போட்டுக் கொடுத்திருக்கிறார் விழுப்புரம், சத்தியமங்கலம் அரசு மேல்நிலைப் பள்ளி ஆசிரியர்   ஸ்ரீதிலீப். அதைக் கடைபிடித்துப் பள்ளியில் ஜெயிக்க வாழ்த்துக்கள்...      

பள்ளியில் ஜெயிக்க பக்கா பிளான்!

• காலைக் கடன்களைக் கழிக்காமல் ஒருபோதும் இருக்கக் கூடாது. குளிக்கும்போது அழுக்குப்போகும் வகையில் நன்றாகத் தேய்த்துக் குளிக்க வேண்டும்.

• சீருடை சுத்தமாக இருக்கிறதா... காலணி (shoes) அணியும் முன்பு அதனுள் பூச்சி ஏதேனும் இருக்கிறதா எனச் சோதித்து அணிந்துகொள்ள வேண்டும். உங்களது வேலைகளை நீங்களே செய்து பழக வேண்டும்.

• புத்தகப் பையில் புத்தகங்களை வைக்கும்போது, அன்றைக்கு என்னென்ன புத்தகங்கள் தேவை என்பதை வகுப்பு அட்டவணையைப் பார்த்து, தேவையான புத்தகம் மற்றும் நோட்டுகளை எடுத்துவைக்க வேண்டும். வீட்டுப்பாட நோட்டைத் தவறாமல் எடுத்துவைத்துக்கொள்ளவேண்டும்.

• பென்சில் பாக்ஸ், ஜியாமெட்ரி பாக்ஸ் போன்றவற்றை எடுத்துவைப்பதுடன், அதில் இருக்கவேண்டிய பொருள்கள் சரியாக உள்ளதா என்று சரி பார்க்க மறக்க வேண்டாம்.

• லன்ச் பாக்ஸ், தண்ணீர் பாட்டில் ஆகியவற்றை எடுத்துவைக்கும்போது, நன்றாக மூடியிருக்கிறதா என்பதைப் பார்க்க வேண்டும்.

பள்ளியில் ஜெயிக்க பக்கா பிளான்!

• பள்ளி தொடங்குவதற்கு 15 நிமிடங்களுக்கு முன்பே பள்ளியில் இருக்கும் வகையில் வீட்டிலிருந்து புறப்பட வேண்டும்.

• பள்ளிக்குள் நுழையும்போது, ‘பள்ளியின் விதிகளை மதித்து, பின்பற்றுவேன்’ என மனதுக்குள் உறுதியெடுத்துச் செல்ல வேண்டும்.

• வகுப்பு ஆசிரியருக்கு வணக்கம் சொன்னால் மட்டும் போதாது. நீங்கள் பார்க்கும் அனைத்து ஆசிரியருக்கும் வணக்கம் சொல்லும் பழக்கத்தைப் பின்பற்ற வேண்டும்.

• பிரேயரின்போது, தேவையற்ற பேச்சு கூடாது. பிரேயரில் திருக்குறள் சொல்வது, செய்திகள் வாசிப்பது போன்ற வாய்ப்புகளைத் தவறவிடக் கூடாது.     

பள்ளியில் ஜெயிக்க பக்கா பிளான்!

• வகுப்புள் ஆசிரியர் நுழைந்ததும் எழுந்து நிற்க வேண்டும். வகுப்பின் நடுவே ஆசிரியர் வந்ததும் வணக்கம் சொல்ல வேண்டும்.

• ஒரு வகுப்பு தொடங்குவதற்கு முன்பே அதற்குரிய புத்தகம், நோட்டு உள்ளிட்டவற்றை எடுத்துத் தயாராக வைத்துக்கொள்ளவும். பாடம் நடத்தும்போது அவற்றை எடுத்தால் கவனம் சிதறும்.
 

• பாடம் நடத்தும்போது கூர்ந்து கவனிப்பதோடு, புத்தகத்தோடு ஒப்பிட்டுப் பார்க்கவும் வேண்டும். புத்தகத்தில் இல்லாத செய்திகளை ஆசிரியர் கூறினால் பென்சிலால் குறிப்பு எடுத்துக்கொள்ளவேண்டும்.
 

• ஆசிரியர் பாடம் நடத்துகையில் சந்தேகம் ஏற்பட்டால், கையை உயர்த்த வேண்டும். ஆசிரியர் அனுமதி தந்ததும் சந்தேகத்தைக் கேட்டுத் தெளிவுற வேண்டும்.

• பாடத்தின் சந்தேகங்களைப் பாடம் நடக்கும்போதே அருகில் இருக்கும் நண்பர்களிடம் கேட்கக் கூடாது. அப்படிக் கேட்கும்பட்சத்தில் நடத்தப்படும் பாடத்தில் கவனம் தவறிவிடும்.

• தண்ணீர் பாட்டிலை எப்போதும் தயாராக வைத்திருக்க வேண்டும். தண்ணீர் குடிக்க அடிக்கடி வெளியே செல்லக் கூடாது.    

பள்ளியில் ஜெயிக்க பக்கா பிளான்!

• இடைவேளையின்போது சிறுநீர் கழிப்பது, தண்ணீர் குடிப்பது போன்ற பழக்கத்தை ஏற்படுத்திக்கொள்ளவும். முடிந்த வரை வகுப்பு நடக்கும்போது அனுமதி கேட்பதைத் தவிர்க்க வேண்டும்.

• மதிய உணவு இடைவேளையில், உணவை வீணாக்காமல், நண்பர்களுடன் பகிர்ந்து சாப்பிடவும். அதன் பிறகு 10 நிமிடங்கள் ஓய்வெடுக்கவும். அப்போது அதிகம் ஓடியாடி விளையாட வேண்டாம்.

• விளையாட்டு வகுப்புகளில் உடற்கல்வி ஆசிரியர் இல்லாமல், விளையாட்டின் விதிகளை முறையாகப் பின்பற்றாமல் விளையாட வேண்டாம். ஒரு விளையாட்டில் ஒருவர் அல்லது ஓர் அணி மட்டுமே வெற்றி அடைய முடியும். இதை உணர்ந்து வெற்றி, தோல்விகளை ஏற்றுக்கொள்ளும் மனப்பக்குவத்தை வளர்த்துக்கொள்ளவும்.

• நூலகம் செல்லும்போது அமைதியாகத் தேவையான புத்தகங்களை மட்டுமே எடுத்துப் படிக்கவும். புத்தகத்தின் பக்கங்கள் கிழிந்துவிடாமல் கவனமாகக் கையாளவும். படித்து முடித்ததும் உரிய இடத்தில் வைக்கவும் தவறாதீர்கள்.    

பள்ளியில் ஜெயிக்க பக்கா பிளான்!

• வகுப்பறையில் உள்ள கரும்பலகை, குப்பைத்தொட்டி, டெஸ்க் உள்ளிட்ட பொருள்களைச் சேதப்படுத்தக் கூடாது. அவற்றைப் பாதுகாப்பது நமது கடமை என உணர வேண்டும்.

• கெட்ட வார்த்தைகள் பேசுவது, உருவம் அடிப்படையில் மற்றவர்களைக் கிண்டல் செய்வது போன்றவை கூடவே கூடாது.

• ஆசிரியர் கொடுக்கும் வீட்டுப் பாடங்களை டைரியில் மறக்காமல் குறித்துக்கொள்ள வேண்டும்.
 

• பள்ளியின் இறுதி மணி அடித்ததும், புத்தகப் பையில் அனைத்தையும் எடுத்துவைத்துள்ளோமா என்பதைச் சரிபார்த்துக்கொண்டு கிளம்ப வேண்டும்.    

பள்ளியில் ஜெயிக்க பக்கா பிளான்!

• பள்ளி முடிந்து சைக்கிளில் வீட்டுக்குச் செல்வோர், சாலை விதிகளை மதித்து, சாலையைக் கடந்து செல்ல வேண்டும். பேருந்தில் செல்பவர்கள், முன்னதாகவே பஸ் பாஸ் அல்லது சில்லறையைத் தயாராக வைத்துக்கொள்ள வேண்டும்.

• பெற்றோர் வந்து அழைத்துச் செல்பவர் எனில், அதுவரை பொறுமையாகக் காத்திருக்க வேண்டும். வேறு யாரேனும் அழைக்க வந்தால், செல்லக் கூடாது. தெரிந்தவராக இருக்கும்பட்சத்தில் ஆசிரியர் அல்லது பள்ளிக் காவலரிடம் சொல்லிவிட்கடுச் செல்ல வேண்டும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு