Published:Updated:

பத்தாயிரம் கோடியில் சாலை... தேர்வை நடத்த திறன் இல்லை!

ஒட்டுமொத்த விகடனுக்கும் ஒரே ஷார்ட்கட்

Use App
பத்தாயிரம் கோடியில் சாலை... தேர்வை நடத்த திறன் இல்லை!
பத்தாயிரம் கோடியில் சாலை... தேர்வை நடத்த திறன் இல்லை!

தனியாருக்கு டெண்டர் விடும் டி.என்.பி.எஸ்.சி

பிரீமியம் ஸ்டோரி

மிழ்நாடு அரசுப் பணியாளர் தேர்வாணையம் (டி.என்.பி.எஸ்.சி) நடத்தும் போட்டித் தேர்வுகளை ஆன்லைனில் நடத்தும் பொறுப்பைத் தனியாரிடம் விடுவது ஊழலுக்கு வழிவகுக்கும் என்பது போன்ற விமர்சனங்கள் வந்துள்ளபோதிலும், தன் முடிவில் டி.என்.பி.எஸ்.சி உறுதியாக இருக்கிறது.

அரசுப் பணியாளர்களைத் தேர்வு செய்வதற் கானப் போட்டித் தேர்வுகளை ஆன்லைனில் நடத்துவது என்றும், அப்படி ஆன்லைனில் தேர்வை நடத்தும் பொறுப்பைத் தனியாரிடம் விடுவதும் என்றும் டி.என்.பி.எஸ்.சி முடிவுசெய்துள்ளது. அதற்கான நிறுவனங்களைத் தேர்வு செய்வதற்கான டெண்டரையும் டி.என்.பி.எஸ்.சி வெளியிட்டுள்ளது. அரசுப் பணிகளுக்கான அனைத்துத் தேர்வுகளையும் டி.என்.பி.எஸ்.சி-யே நேரடியாகக் கண்காணித்து நடத்தும்போதே வினாத்தாள் லீக் ஆவது, தேர்வு முறைகேடு எனப் பல பிரச்னைகள் வருகின்றன. அவற்றைத் தடுப்பதற்கான நடவடிக்கைகளை எடுக்காமல், ஆன்லைன் தேர்வை நடத்தும் பொறுப்பைத் தனியாரிடம் ஒப்படைப்பது நல்லதல்ல என்று தி.மு.க., பா.ம.க உள்ளிட்ட கட்சிகள் விமர்சித்துள்ளன.

பத்தாயிரம் கோடியில் சாலை... தேர்வை நடத்த திறன் இல்லை!

‘‘தேர்வு வினாத்தாள்களைக் கணினிகளில் பதிவேற்றம் செய்வதற்காக அவை ஓரிரு நாள்களுக்கு முன்பே தனியார் நிறுவனத்திடம் ஒப்படைக்கப்பட வேண்டும். அப்படிச் செய்யும்போது, வினாத்தாள்கள் கசிய வாய்ப்புள்ளது. கடந்த காலங்களில் தேசிய அளவில் நடத்தப்பட்ட பல ஆன்லைன் தேர்வுகளுக்கான வினாத்தாள்கள் அவ்வாறுதான் கசிந்தன. தமிழ்நாட்டில் எழுத்து மூலம் நடத்தப்படும் போட்டித் தேர்வுகளிலேயே சில தனியார் பயிற்சி நிறுவனங்கள் தங்களின் செல்வாக்கைப் பயன்படுத்தி வினாத்தாள்களை முன்கூட்டியே கைப்பற்றித் தங்களிடம் படிப்பவர்களுக்கு மட்டும் வழங்குவது, விடைத்தாள் களை மாற்றுவது உள்ளிட்ட முறைகேடுகளில் ஈடுபட்டன. அது குறித்த வழக்கு உயர் நீதிமன்றத்தில் நடைபெற்று வருகிறது. இந்தச் சூழலில் தேர்வுகளை நடத்தும் பொறுப்பைத் தனியாரிடம் ஒப்படைத்தால், கடந்த காலங்களில் முறைகேடுகளில் ஈடுபட்ட தனியார் பயிற்சி நிறுவனங்களே தங்களின் பினாமிகள் மூலம் இந்த ஒப்பந்தத்தைப் பெற்று முறைகேடுகளைச் செய்வதற்கு வாய்ப்புள்ளது’’ என்று கடுமையாக விமர்சிக்கிறார் பா.ம.க நிறுவனர் ராமதாஸ்.

இந்த விவகாரம் குறித்து சங்கர் ஐ.ஏ.எஸ் அகாடமியின் நிறுவன இயக்குநர் சங்கரிடம் கேட்டோம். ‘‘ஆன்லைன் முறையில் போட்டித் தேர்வுகளை நடத்தினால் நேரம் மிச்சமாகும் என்ற அடிப்படையில், இது ஒரு நல்ல முயற்சியாக இருக்கும். தேர்வு முடிவுகள் சீக்கிரமே வெளியாக இது உதவும். மத்திய அரசின் பதவிகளுக்குப் போட்டித்தேர்வுகளை நடத்தும் எஸ்.எஸ்.சி அமைப்பின் சார்பில் இதுபோல ஒருமுறை ஆன்லைனில் தேர்வு நடத்தினர். மாணவர்கள் தேர்வெழுதிக்கொண்டிருந்தபோது, பலருக்கு கம்ப்யூட்டர் இயங்காமல் போய்விட்டது. பலருக்கு இணையதளம் ஓப்பன் ஆகவில்லை. இது தொடர்பாக வழக்குகளும் தொடரப்பட்டுள்ளன. ஆன்லைன் தேர்வைத் தனியார் மூலம் நடத்தாமல் அரசே நடத்த வேண்டும். ஏற்கெனவே, டி.என்.பி.எஸ்.சி அமைப்பின் மீது பல குற்றச்சாட்டுகள் உள்ளன. தனியாரிடம் கொடுப்பது பாதுகாப்பாக இருக்காது” என்றார்.

அரசுப் பணியாளர் தேர்வாணையம் வெளியிட்டுள்ள ஒப்பந்தப்புள்ளி அறிவிக்கையில், ‘வினாத்தாள்களைத் தயாரித்து வழங்குவது மட்டும்தான் தேர்வாணையத்தின் பணி. அதைக் கணினியில் ஏற்றித் தேர்வை நடத்துவதில் தொடங்கி அனைத்துமே தேர்வு நடத்தும் நிறுவனத்தின் பொறுப்பு. அரசுப் பணியாளர் தேர்வாணையத்திலிருந்து ஒரு தேர்வு மையத்திற்கு ஒரே ஒரு பார்வையாளர் மட்டுமே அனுப்பி வைக்கப்படுவார்’ என்று கூறப்பட்டுள்ளது. இத்தகைய சூழலில் நடைபெறும் தேர்வுகளில் எந்த முறைகேடும் நடக்காது என்று எப்படி நம்ப முடியும்?

டி.என்.பி.எஸ்.சி-யில் பணியாற்றிய உயர் அதிகாரி ஒருவரிடம் பேசினோம். “ஆன்லைன் முறை தேர்வை மக்கள் ஏற்றுக்கொள்வதற்கும் புரிந்து கொள்வதற்கும் சிறிது காலதாமதம் ஆகலாம். தேர்வு நடத்துவதைத் தனியாரிடம் விடலாம். ஆனால், தேர்வுகளைக் கண்காணிக்க டி.என்.பி.எஸ்.சி அதிகாரிகள், தேசியத் தகவல் தொழில்நுட்ப மைய அதிகாரிகளை நியமிக்க வேண்டும்” என்றார். 

பத்தாயிரம் கோடியில் சாலை... தேர்வை நடத்த திறன் இல்லை!

இது குறித்த சந்தேகங்களை டி.என்.பி.எஸ்.சி-யின் தேர்வுக் கட்டுப்பாட்டு அதிகாரி சுதனிடம் கேட்டோம். “டி.என்.பி.எஸ்.சி சார்பில் 2012-லிருந்து ஆன்லைனில் தேர்வுகள் நடத்திவருகிறோம். இதுவரை ஆன்லைன் முறையில் 27 தேர்வுகள்வரை வெற்றிகரமாக நடத்தப்பட்டுள்ளன. அதிகபட்சமாக ஒரு தேர்வில் 11 ஆயிரம் தேர்வர்கள் வரை பங்கேற்றுள்ளனர். ஒன்பது தேர்வு மையங்களில் ஆன்லைன் தேர்வுகள் நடத்தியிருக்கிறோம். எந்தப் புகாரும் எழாதபடி, எந்த முறைகேடும் செய்யமுடியாதபடி, ஆன்லைன் தேர்வுகள் நடைபெறும். ஆன்லைன் முறையில் தேர்வுகள் நடத்துவதற்கான டெண்டரில் பல கடுமையான விதிமுறைகளை விதித்திருக்கிறோம். நல்லமுறையில் இயங்கும் கம்ப்யூட்டர்களைக் கொண்ட ஆய்வகங்கள், குளிர்சாதன வசதி எல்லாம் உள்ள மையங்களைத் தான் தேர்வு செய்வோம். தேர்வர்கள் எண்ணிக்கை 60 ஆயிரத்துக்குள் இருந்தால்தான் ஆன்லைன் தேர்வு நடத்த முடியும். குரூப் 4, வி.ஏ.ஓ உள்ளிட்ட அதிகத் தேர்வர்கள் பங்கேற்கும் தேர்வுகளை இப்போதைக்கு ஆன்லைனில் நடத்தும் திட்டம் இல்லை. தொழில்நுட்பத்தைப் பயன்படுத்த வேண்டும். அதே நேரம், கட்டுப்பாடும் இருக்க வேண்டும் என்பதுதான் எங்கள் நோக்கம்” என்றார் உறுதியாக.

ஆன்லைன் தேர்வு என்பதுத் தொழில்நுட்ப வளர்ச்சியின் அடையாளம்தான். ஆனால், அதற்கான கட்டமைப்புகளை டி.என்.பி.எஸ்.சி உருவாக்கி செய்ய வேண்டும். எட்டுவழி பசுமைச் சாலைக்காக ரூ.10 ஆயிரம் கோடியைச் செலவு செய்ய முடியும். ஆன்லைன் தேர்வுக்கு அடிப்படை வசதிகளை உருவாக்க முடியாதா?

- கே.பாலசுப்பிரமணி
படம்: என்.ஜி.மணிகண்டன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு