Published:Updated:

“புதுச்சேரி மாணவர்களுக்கு இடஒதுக்கீடு கிடையாது!”

ஒட்டுமொத்த விகடனுக்கும் ஒரே ஷார்ட்கட்

Use App
“புதுச்சேரி மாணவர்களுக்கு இடஒதுக்கீடு கிடையாது!”
“புதுச்சேரி மாணவர்களுக்கு இடஒதுக்கீடு கிடையாது!”

கொந்தளிக்க வைத்த பல்கலைக்கழக துணைவேந்தர்

பிரீமியம் ஸ்டோரி

‘‘புதுச்சேரி மத்தியப் பல்கலைக்கழகத்தில் புதிதாகத் தொடங்கப்பட இருக்கும் பாடப் பிரிவுகளில் உள்ளூர் மாணவர்களுக்கு 25 சதவிகித இடஒதுக்கீடு கிடையாது” என்ற பல்கலைக்கழகத் துணைவேந்தர் குர்மீத் சிங்கின் அறிவிப்பால் கொதித்துக் கிடக்கிறது புதுச்சேரி. ஏற்கெனவே புதுச்சேரியில் மாநில அரசின் அதிகாரங்களை மத்திய அரசு பறிப்பதாகக் குற்றச்சாட்டுகள் சூறாவளியாகச் சுழன்றடிக்கும் நிலையில், துணைவேந்தரின் நிலைப்பாடு மாணவர்களை மட்டுமல்லாமல், மாநில அரசையும் கொந்தளிக்க வைத்திருக்கிறது.

புதுச்சேரி மாநிலத்தின் காலாப்பட்டில் இயங்கிவரும் மத்தியப் பல்கலைக்கழகத்தில் சுமார் ஆறாயிரம் மாணவர்கள் படிக்கிறார்கள்; இதன் உறுப்புக் கல்லூரி மற்றும் தொலைதூரக் கல்வி நிலையங்களில் சுமார் 60,000 மாணவர்கள் படிக்கிறார்கள். பேராசிரியர்களுக்குள் மோதல், நிரந்தரத் துணைவேந்தர் இல்லாதது, பல்கலைக்கழகத்துக்குள் இந்துத்துவா திணிப்பு என்று தொடர்ச்சியாகச் சர்ச்சைகளில் சிக்கிவரும் புதுச்சேரிப் பல்கலைக்கழகத்துக்கு சில மாதங்களுக்கு முன்புதான் நிரந்தரத் துணைவேந்தராக குர்மீத் சிங் நியமிக்கப்பட்டார். ஆனால், இடஒதுக்கீடு குறித்த அவரது நிலைப்பாடு புதுச்சேரியைத் தகிக்க வைத்திருக்கிறது.

“புதுச்சேரி மாணவர்களுக்கு இடஒதுக்கீடு கிடையாது!”

இதுகுறித்து நம்மிடம் பேசினார் இந்திய மாணவர் சங்கத்தின் மத்தியக் குழு உறுப்பினர் ஆனந்த். ‘‘மத்திய அரசின் ஜிப்மர் மருத்துவக் கல்லூரி, காரைக்காலில் இருக்கும் என்.ஐ.டி (National Institute of Technology), கடந்த ஆண்டு காரைக்காலில் தொடங்கப்பட்ட ஜிப்மர் பிரிவு இங்கெல்லாம் உயர்கல்வியில் 27 சதவிகிதம் இடஒதுக்கீடு புதுச்சேரி மாணவர்களுக்கு இருக்கிறது. புதுச்சேரி மத்தியப் பல்கலைக்கழகத்தில் ஆரம்பத்தில் தொடங்கிய பிரிவுகளுக்கு 25 சதவிகித இடஒதுக்கீடு அமலில் இருக்கிறது. அப்படி இருக்கும்போது, ‘25 சதவிகித இடஒதுக்கீட்டை இனி வழங்க முடியாது’ என்று புதுச்சேரிப் பல்கலைக்கழகத் துணைவேந்தர் கூறுவதை ஏற்க முடியாது; அதற்கான அதிகாரமும் அவருக்கு இல்லை. இந்தியாவின் அனைத்து மாநிலங்களிலும் மாநில அரசின் கட்டுப்பாட்டின்கீழ் பல்கலைக்கழகங்கள் இயங்கி வருகின்றன. தமிழகத்திலும் மத்திய, மாநிலப் பல்கலைக்கழகங்கள் மற்றும் தனியார் பல்கலைக்கழகங்கள் என 64 பல்கலைக்கழகங்கள் இருக்கின்றன. அப்படியான சூழல் இங்கு இல்லை. மத்தியப் பல்கலைக்கழகம் இருக்கிறது என்பதால்தான், புதுச்சேரி அரசு தனியாகப் பல்கலைக்கழகம் தொடங்க வில்லை. அதனால், உயர்கல்வியைப் பொறுத்தவரை புதுச்சேரி மாணவர்கள் மத்தியப் பல்கலைக்கழகத்தை மட்டுமே நம்பியிருக்கின்றனர். புதுச்சேரி மாணவர்கள் பயன்பெறுவார்கள் என்ற வாக்குறுதியின் அடிப்படையில் தான் புதுச்சேரி பல்கலைக்கழகத்துக்குச் சுமார் 82 ஏக்கர் விவசாய நிலத்தைக் குறைந்த விலையில் மாநில அரசு கையகப்படுத்திக் கொடுத்தது. இலவச குடிநீர், வரிச்சலுகையுடன் மின்சாரம், பாதுகாப்பு என அனைத்தையும் புதுச்சேரியில் அனுபவித்துக்கொண்டு, புதுச்சேரி மாணவர்களுக்குத் துரோகம் இழைக்க நினைக்கிறது பல்கலைக்கழக நிர்வாகம். துணைவேந்தரின் கருத்தை வாபஸ் பெறாவிட்டால் மிகப் பெரிய போராட்டத்தை முன்னெடுப்போம்” என்றார்.

இந்திய கம்யூனிஸ்ட் கட்சியின் புதுச்சேரி மாநிலச் செயலாளர் சலீமிடம் பேசினோம். “இடஒதுக்கீடு முறை இந்தியாவில் எந்தப் பல்கலைக்கழகத்திலும் இல்லை என்ற தவறான கருத்தைத் தெரிவித்திருக்கிறார் துணைவேந்தர். திருவாரூர் மத்தியப் பல்கலைக்கழகத்தில் 50 சதவிகிதம், திருவனந்தபுரம் பல்கலைக்கழகத்தில் 25 சதவிகிதம் என உள்ளூர் மாணவர் களுக்கு இடஒதுக்கீடுகள் இருக்கின்றன. பல்கலைக்கழகச் சட்டங்களின்படி கொடுக்கப்படும் இந்த இடஒதுக்கீடு களுக்கு மத்திய அரசின் அனுமதி தேவையில்லை. இந்திய அரசியலமைப்புச் சட்டம் 16(1)-ன் கீழ் பல்கலைக்கழக நிர்வாகமே அளிக்கலாம். இந்தப் பல்கலைக்கழகம் அமைவதற்கு, மாநில அரசுதான் முன்பணம் செலுத்தியது. 1984-ல் தொடங்கப்பட்ட பல்கலைக்கழகத்தின் முதல் துணைவேந்தரான வெங்கட சுப்பிரமணியன், அவராகவே புதுச்சேரியின் நலன் கருதி 25 சதவிகித ஒதுக்கீட்டை வழங்கினார். அதுதான் தற்போதுவரை தொடர்கிறது. ஆனால், அதன்பிறகு ஆரம்பிக்கப்பட்ட எந்தப் பிரிவுக்கும் இடஒதுக்கீடு தர மறுக்கிறார்கள். அதற்காக நாங்கள் போராடிக்கொண்டிருக்கும்போது வெந்த புண்ணில் வேல் பாய்ச்சியிருக்கிறார் துணைவேந்தர்’’ என்றார்.

“புதுச்சேரி மாணவர்களுக்கு இடஒதுக்கீடு கிடையாது!”

துணைவேந்தர் சார்பில் பேசிய பல்கலைக்கழக மக்கள்தொடர்பு அதிகாரி மகேஷ், “துணை வேந்தரின் கருத்து தவறாகப் புரிந்துகொள்ளப் பட்டிருக்கிறது. புதுச்சேரி மாணவர்களின் வேலைவாய்ப்புகள் சார்ந்த 21 பாடப் பிரிவுகளுக்குக் கொடுத்துவரும் இடஒதுக்கீடு தொடரும்; புதிதாக ஆரம்பிக்கும் பிரிவுகளுக்குத் தர முடியாது என்றுதான் சொன்னார். இடஒதுக்கீடு குறித்துப் பல்கலைக் கழகத்துக்கும் மாநில அரசுக்கும் சட்டபூர்வமான ஒப்பந்தம் இருக்கிறதா என்ற நிருபர்களின் கேள்விக்குத்தான் அவர் ‘இல்லை’ என்று பதிலளித்தார். 25 சதவிகித இடஒதுக்கீட்டைப் பல்கலைக்கழக நிர்வாகக் குழு முடிவு செய்துதான் தருகிறதே தவிர, இதற்காக எந்தச் சட்டமும் இல்லை. இது தொடர்பாக மாநில அரசுதான்‑ மத்திய அரசை அணுக வேண்டும். மனிதவள மேம்பாட்டு அமைச்சகம் உத்தரவிட்டால் அதை நிறைவேற்றத் தயாராக இருக்கிறோம்” என்றார்.

பல்கலைக்கழகத்தில் அனைத்துப் பாடப் பிரிவுகளிலும் 25 சதவிகித இடஒதுக்கீடு தர வேண்டும் என்று புதுச்சேரி சட்டமன்றத்தில் ஒருமனதாகத் தீர்மானம் நிறைவேற்றப்பட்டிருக்கிறது. அரசியல் கட்சிகள் இந்த விவகாரத்தில் ஒன்றிணைந்து போராடுவதே இதற்கான தீர்வாக அமையும்.

 - ஜெ.முருகன்
படங்கள்: அ.குரூஸ்தனம்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு