சூடான சூரப்பா... முறுக்கிக்கொண்ட அன்பழகன்! - இது அண்ணா பல்கலைக்கழக குஸ்தி

அ ண்ணா பல்கலைக்கழகத்துக்கும் உயர்கல்வித் துறைக்கும் இடையே எழுந்துள்ள மோதல் உச்சநிலையை அடைந்துள்ளது. உயர்கல்வித் துறை அமைச்சரும் அண்ணா பல்கலைக்கழகத்தின் இணைவேந்தருமான கே.பி.அன்பழகனுக்கும், பல்கலைக்கழகத் துணைவேந்தர் சூரப்பாவுக்கும் இடையே நடைபெறும் மோதல் இதுவரை உயர் கல்வித் துறையில் நடக்காத ஒன்று என்கிறது கிண்டி வட்டாரம்!

அண்ணா பல்கலைக்கழகத்தின் துணைவேந்தராக இருந்த எம்.ராஜாராமின் பதவிக் காலம் 2016-ம் ஆண்டு மே 26-ல் முடிவடைந்தது. துணைவேந்தர் தேர்வுக்காக அமைக்கப்பட்ட எம்.பாஸ்கரன் குழு, ஆர்.எம்.லோதா குழு ஆகியவை சர்ச்சையில் சிக்கிப் பாதியிலேயே கலைக்கப்பட்டன. இறுதியாக, உச்ச நீதிமன்ற முன்னாள் நீதிபதி வி.எஸ்.சிர்புர்கர் தலைமையிலான குழு கர்நாடகத்தைச் சேர்ந்த எம்.கே.சூரப்பாவை புதிய துணைவேந்தராகத் தேர்வுசெய்தது. அதன்படி 2018, ஏப்ரல் 5-ம் தேதி புதிய துணைவேந்தராக சூரப்பாவை கவர்னர் பன்வாரிலால் புரோஹித் நியமித்தார்.

துணைவேந்தராக சூரப்பா பதவியேற்றது முதலே உயர் கல்வித்துறைக்கும் துணைவேந்தருக்குமான உறவில் விரிசல் ஏற்படத் தொடங்கின என்கிறார்கள் பல்கலைக்கழக வட்டாரத்தில்.

. இதுகுறித்து பேசிய மூத்த பேராசிரியர்கள் சிலர், “வழக்கமாக, பல்கலைக்கழகத்தில் பணிபுரியும் ஊழியர்கள் உயர்கல்வித் துறை அமைச்சரின், துறை சார்ந்த மற்றும் தனிப்பட்ட பணிகளுக்காகவும் அனுப்பப்படுவர். பல்கலைக்கழகத்தின் வாகனங்களையும் அமைச்சர் தரப்பினர் பயன்படுத்திவந்தனர். ஆனால், சூரப்பா பதவியேற்றவுடன் இதற்குத் தடை விதித்தார். அமைச்சர் தரப்பிலிருந்து வரும் சிபாரிசுகளும் நிராகரிக்கப்பட்டன. பல்கலைக்கழகத்தின் விருந்தினர் மாளிகைகளில் தனது சொந்த ஊரிலிருந்து வரும் கட்சியினரை உயர்கல்வித் துறை அமைச்சர் தரப்பில் தங்க வைப்பதும் வழக்கம். சூரப்பா அதற்கும் தடை போட்டுவிட்டார்” என்றவர்கள், இதன் பின்பு நடந்த சில சம்பவங்களையும் சொன்னார்கள்.

“கடந்த டிசம்பர் 22-ம் தேதி அண்ணா பல்கலைக்கழக 39-வது பட்டமளிப்பு விழா நடைபெற்றது. அழைப்பிதழை, துணைவேந்தரே நேரில் கொண்டுவந்து உயர்கல்வித் துறை அமைச்சருக்குக் கொடுப்பதுதான் இதுவரை மரபாக இருந்தது. ஆனால், அழைப்பிதழை நேரில் வழங்காமல், பல்கலைக்கழகப் பதிவாளர் குமார் மூலம் அமைச்சருக்குக் கொடுத்து அனுப்பினார் சூரப்பா. இதனால் கோபமடைந்த அன்பழகன் பட்டமளிப்பு விழாவையே புறக்கணித்துவிட்டார். எல்லாவற்றுக்கும் உச்சமாக, பட்டமளிப்பு விழாவில் உயர்கல்வித் துறை அமைச்சர் அமர வேண்டிய இருக்கையில், கவர்னரின் செயலாளர் ராஜகோபால் அமர்ந்தது அமைச்சர் தரப்பை மேலும் கோபமூட்டியது.

கடந்த ஜனவரி 3-ம் தேதி, கஜா புயல் நிவாரணமாக அண்ணா பல்கலைக்கழகம் சார்பில் ரூ. 10.17 லட்ச ரூபாய் முதல்வரின் நிவாரண நிதிக்கு அளிக்கப்பட்டது. இதற்கான காசோலையையும் சூரப்பா நேரில் சென்று முதல்வரிடம் வழங்கவில்லை. பதிவாளர் குமார் மூலமாகவே முதல்வருக்குக் கொடுத்துவிட்டார். துணைவேந்தரின் போக்குக்கு கவர்னர் மாளிகையின் ஆசிர்வாதமும் இருப்பதாகக் கூறப்படுகிறது. இதனால், அமைச்சர் தரப்பால் எதுவும் செய்ய முடியவில்லை. இருவருக்கும் மோதல் அதிகரித்தபடியே செல்கிறது” என்றார்கள்.

சூரப்பா தரப்பில் பேசியவர்களோ, “கடந்த காலத்தில், தான் பணியாற்றிய இடங்களில் எல்லாம் நேர்மையானவர், கண்டிப்பானவர் என்று பெயரெடுத்தவர் சூரப்பா. பெயர் பெற்ற அண்ணா பல்கலைக்கழகத்தில் இப்போது முறைகேடுகளும் ஊழலும் புரையோடிப்போயுள்ளன. இதற்கெல்லாம் ஆளுங்கட்சி பிரமுகர்கள் காரணம் என்று கருதுகிறார் சூரப்பா. விருந்தினர் மாளிகைகளில் கட்சியினர் தங்கத் தடை விதித்தது, அமைச்சரின் தனிப்பட்ட விஷயங்களுக்கு வாகனங்களை அனுமதிக்காதது இவையெல்லாம் சீர்திருத்த நடவடிக்கைகளே. எல்லாவற்றையும்விட, ‘மாணவர்கள் படிக்கும் இடத்தில் கட்சியினருக்கு என்ன வேலை’ என்று கேட்கிறார் சூரப்பா. அவர் கேட்பதில் தவறு என்ன இருக்கிறது?” என்றார்கள்.

அமைச்சர் தரப்பில் பேசினோம். “இருவருக்கும் மனக்கசப்புகள் லேசாக இருப்பது உண்மைதான். ஆனால், ஒருபோதும் பல்கலைக்கழக வாகனங்களை அமைச்சர் தரப்பினர் பயன்படுத்துவது இல்லை. இப்போது எழுந்துள்ள பிரச்னைகள் பேசித் தீர்க்கக்கூடிய அளவில்தான் உள்ளன. பட்டமளிப்பு விழா நடைபெற்ற சமயத்தில் அமைச்சருக்குச் சொந்த ஊரில் சில வேலைகள் இருந்ததால் வர இயலவில்லை. மற்றபடி, இருவருக்கும் பெரிய மோதல் எல்லாம் இல்லை” என்றனர்.

. அண்ணா பல்கலைக்கழகத் துணைவேந்தர் சூரப்பாவையும், பதிவாளர் குமாரையும் அலைபேசியில் பலமுறை தொடர்பு கொண்டோம். இருவருக்கும் குறுந்தகவல் அனுப்பியிருக்கிறோம். துணைவேந்தருக்கு மேற்கண்ட விவரங்களைத் தெளிவாகக் குறிப்பிட்டு மின்னஞ்சலும் அனுப்பியிருக்கிறோம். அவர்களிடமிருந்து பதில் வரும் பட்சத்தில், அதைப் பிரசுரிக்கத் தயாராக இருக்கிறோம்.

- ந.பொன்குமரகுருபரன்