Published:Updated:

மழைக் காலம் வரப்போகுது !

யுவா முத்து

மழைக் காலம் வரப்போகுது !

யுவா முத்து

Published:Updated:
##~##

காட்சி-1: இடம்: வீடு.

(கதாபாத்திரங்கள்: அப்பாவாக ஒரு சிறுவன், அம்மாவாக ஒரு சிறுமி, மகனாக ஒரு சிறுவன், மகளாக ஒரு சிறுமி)

ஒட்டுமொத்த விகடனுக்கும் ஒரே ஷார்ட்கட்!

(காட்சி: அப்பா உள்ளே வருகிறார். விளையாடிக்கொண்டு இருக்கும் மகனும் மகளும் ஓடி வருகிறார்கள்.)  

மகன்: ''ஹேய்ய்ய்... அப்பா வந்தாச்சு.''

அப்பா (நாற்காலியில் அமர்ந்தவாறு): ''என்ன ரெண்டு பேரும் படிச்சீங்களா, இல்லையா?''

அம்மா: (உள்ளே இருந்து வந்தவாறு): ''எங்கே படிச்சாங்க... காலையில் இருந்து கார்ட்டூன் சேனலைப் பார்த்தாங்க. அப்புறம் விளையாட ஆரம்பிச்சாங்க. புத்தகத்தையே தொடலை.''

மழைக் காலம் வரப்போகுது !

மகள்: ''அப்பா... ஹோம் வொர்க் எல்லாத்தையும் நேத்தே முடிச்சுட்டோம். அதெல்லாம் எங்களுக்கு ஜுஜூபி.''

மகன்: ''அப்பா, ஆபீஸ்ல இருந்து வரும்போது கேக் வாங்கிட்டு வரச் சொன்னேனே எங்கே?''

அப்பா: ''நாளைக்கு சண்டே. ஷாப்பிங் போய் மளிகை சாமான் வாங்க வேண்டியது இருக்கு. கேக், பிஸ்கெட் எல்லாம் அப்போ வாங்கிக்கலாம்.''

அம்மா: ''மழைக் காலம் ஆரம்பிக்கப் போகுதுங்க. இருக்கிற ரெண்டு குடையும் சரியில்லே. புதுசு வாங்கணும்.''

அப்பா: ''நானும் ஒரு ரெயின் கோட் வாங்கிக்கணும்.''

மகன்: ''அப்பா, என்னோட ரெயின் கோட்டும் கிழிஞ்சுபோச்சு.''

அம்மா: ''போன வருஷம்தானே வாங்கினோம் அதுக்குள்ளே கிழிச்சுட்டியா?''

மகள்: ''இவன் எப்பவும் இப்படித்தான். என்னோடது அப்படியே இருக்கு.''

மகன்: ''நீ யூஸ் பண்ணினாத்தானே கிழியும். பக்கத்து வீட்டு ஆன்ட்டி, எதிர் வீட்டு அங்கிள்னு யார் கிடைக்கிறாங்களோ, அவங்களோட குடையில் ஒட்டிக்கிட்டு வந்துருவே.''

அப்பா: ''சரி, சரி சண்டை போடாதீங்க. நாளைக்குப் புதுசு வாங்கிடுவோம்.''

அம்மா: ''சரி, எல்லோரும் சாப்பிட வாங்க!''

(எல்லோரும் எழுந்து செல்கிறார்கள்.)

காட்சி-2: இடம்: சாலை.  

(கதாபாத்திரங்கள்: அப்பா, அம்மா, மகன், மகள், தாத்தா வேடத்தில் ஒரு சிறுவன்)

(காட்சி: கடைக்குச் சென்று வாங்கிய பொருட்களுடன் நடந்து வருகிறார்கள். மகன், மகள் இருவர் கையிலும் ஐஸ்க்ரீம். அதைச் சுவைத்தவாறு நடந்து வருகிறார்கள்)

அப்பா: ''விலைவாசி ஏறிட்டேபோகுது. போன முறை 60 ரூபாய்க்கு வாங்கின குடை இப்போ 95 ரூபாய்.''

அம்மா: ''அந்த நேரத்துக்கு யூஸ் பண்ணிட்டு தூக்கி ஒரு மூலையில் போடாமல், சரியா எடுத்துவெச்சா ரொம்ப நாளைக்கு இருக்கும்.''

மகன்: ''புவனா, அம்மா உனக்குத்தான் சொல்றாங்க கேட்டுக்க.''

மழைக் காலம் வரப்போகுது !

அப்பா: ''கிஷோர், உனக்கும் சேர்த்துதான் சொல்றோம்.''

(அப்போது எதிரே கையில் கறுப்புக் குடையுடன் தாத்தா வருகிறார்)

மகள்: ''அப்பா, அங்கே பாருங்க... எதிர் வீட்டுத் தாத்தா வர்றார்.''

அம்மா: ''அவர் கையில் இருக்கிற குடை எத்தனை வருஷமா இருக்கு தெரியுமா?''

மகன்: ''வணக்கம் தாத்தா!''

தாத்தா: ''அடடே... குடும்பத்தோடு எங்கே போய்ட்டு வர்றீங்க?''

அப்பா: ''ஷாப்பிங். நீங்க எங்கே போறீங்க?''

தாத்தா: ''ஜெராக்ஸ் கடைக்கு. மழைக் காலம் வரப்போகுது. நம்ம தெரு நிறைய இடத்துல பள்ளமா இருக்கு. அதை எல்லாம் சரி பண்ணச் சொல்லி கார்ப்பரேஷனுக்குக் கடிதம் எழுதி இருக்கேன். ஜெராக்ஸ் எடுத்துக்கிட்டு நாளைக்குக் கொண்டுபோகணும். சரி வரட்டுமா...''

(கை அசைத்தவாறு கடந்து செல்கிறார் தாத்தா. அவரைத் திரும்பித் திரும்பிப் பார்த்தவாறு நடக்கிறார்கள் கிஷோரும் புவனாவும்)

காட்சி-3 இடம்: வீடு.

(கதாபாத்திரங்கள்: அப்பா, அம்மா, மகன், மகள்.)

(காட்சி: கொண்டுவந்த பையை ஒரு பக்கமாக வைத்துவிட்டு அப்பா நாற்காலியில் அமர்கிறார். அம்மா சமையல் அறை நோக்கிச் செல்கிறார்.)

அப்பா: ''உஷ்... நாலு தெரு தள்ளி இருக்கிற கடைக்குப் போய்ட்டு வரவே அலுப்பாயிருது.''

அம்மா: ''இருங்க காபி கொண்டு வர்றேன்.''

அப்பா: ''என்ன பசங்களா... ரெண்டு பேரும் என்னமோ ரகசியம் பேசிட்டே வந்தீங்க. திடீர்னு அமைதியா இருக்கீங்க!''

மகன்: ''எதிர் வீட்டுத் தாத்தாவைப் பற்றிதான் பேசினோம்.''

அப்பா: ''அவரைப் பற்றி என்ன பேசினீங்க?''

மகள்: ''நம்ம தெருவில் 30 வீடுகள் இருக்கு. ஆனா, ஒரு பொதுப் பிரச்னைனா அந்த தாத்தா மட்டும்தான் கார்ப்பரேஷன் அது இதுனு போறார்.''

மகன்: ''போன வருஷம் மழை வந்தப்ப, நம்ம தெரு சாக்கடை அடைச்சுக்கிட்டு ரெண்டு நாளா அசுத்தமான தண்ணி ரோட்டில் ஓடிச்சு. நாம எல்லோரும் மூக்கைப் பொத்திக்கிட்டு ஸ்கூல், ஆபீஸ்னு போனோம்.''

மகள்: ''தாத்தாதான் அப்பவும் கார்ப்பரேஷனுக்குப் போய் ஆட்களைக் கூட்டிட்டுவந்தார்.''

அப்பா: ''இப்ப நீங்க என்ன சொல்ல வர்றீங்க?''

மகன்: ''மழைக் காலம் வரப்போகுதுனு நமக்குத் தேவையான குடை, ரெயின் கோட்டை மட்டும் வாங்கிட்டு வந்தோம்.''

அப்பா: ''புரியுது... புரியுது... இப்படி எல்லோரும் அவங்க சொந்தத் தேவைகளை மட்டும் கவனிச்சுக்கிறோம். ஊரும் தெருவும் எப்படி இருந்தாலும் கவலைப்படுறது இல்லைனு சொல்றீங்க அதானே?''

மழைக் காலம் வரப்போகுது !

மகன், மகள்: ''அதேதான் அப்பா! இந்தத் தெரு பிரச்னையில் நமக்கும்தானே பங்கு இருக்கு?''

அம்மா (காபியுடன் வருகிறார்): நிச்சயமா! நானும் நீங்க பேசுறதைக் கேட்டுக்கிட்டேதான் வந்தேன். தாத்தாவோடு நானும் அப்பாவும் நாளைக்கு கார்ப்பரேஷனுக்குப் போறோம்.''

அப்பா: ''ஊர் கூடி ஒரு விஷயத்தைச் செய்யும்போது அது இன்னும் சீக்கிரமாகவும் சிறப்பாகவும் முடியும்.''

அம்மா: ''பரவாயில்லை பசங்களா... அரட்டையும் சேட்டையுமா இருந்தாலும் நல்ல விஷயங்களையும் யோசிக்கிறீங்க.''

மகன், மகள்: ''ஏன்னா, நாங்க உங்க பசங்க ஆச்சே!'' (என்றவாறு அம்மாவை ஒருவரும் அப்பாவை ஒருவரும் அணைத்துக்கொள்கிறார்கள்)

அப்பா: ''ஆகா... நாம வாங்கிக் கொடுத்த ஐஸை நமக்கே திருப்பிவைக்கிறாங்களே!''

(எல்லோரும் சிரிக்கிறார்கள்.)

மாணவர்களுக்கு: நீங்களே குழு அமைத்து, இந்த நாடகத்தை வகுப்பில் அரங்கேற்றுங்கள் அல்லது இந்த வடிவத்தை அடிப்படையாகவைத்து, நீங்களே ஒரு நாடகத்தை எழுதுங்கள்.

ஆசிரியர்களுக்கு: வகுப்பு மாணவர்களைப் பல்வேறு குழுக்களாகப் பிரித்து, இந்த நாடகத்தை நடிக்கச் சொல்லுங்கள். ஒவ்வொருவரின் பங்கேற்பு மற்றும் ஆர்வத்திற்கு ஏற்ப மதிப்பீடு செய்யலாம்.