Published:Updated:

சமுதாயச் சீர்கேடுகளைத் தடுப்பது எப்படி ?

சமுதாயச் சீர்கேடுகளைத் தடுப்பது எப்படி ?

சமுதாயச் சீர்கேடுகளைத் தடுப்பது எப்படி ?

சமுதாயச் சீர்கேடுகளைத் தடுப்பது எப்படி ?

Published:Updated:
##~##

'பக்தி இயக்கத் துறவிகளால் கண்டிக்கப்பட்ட சமுதாயச் சீர்கேடுகள் இப்போதும் தொடர்கிறதா? அவற்றைத் தடுக்கத் தீர்வுகள் யாவை?’ - இந்தத் தலைப்பில், விழுப்புரம் மாவட்டம் சத்தியமங்கலம் அரசு மேல்நிலைப் பள்ளியின் 7-ம் வகுப்பு மாணவர்களைக்கொண்டு விவாத மேடை நடத்தப்பட்டது.

தலைமை ஆசிரியர் எஸ்.பரந்தாமன் முன்னிலையில் ஆசிரியர்கள் எம்.செல்வம் மற்றும் தி.கல்பனா ஆகியோர் நடத்திய விவாத மேடையில் மாணவர்கள் பேசியவற்றில் இருந்து...

ஒட்டுமொத்த விகடனுக்கும் ஒரே ஷார்ட்கட்!

எஸ்.ஜெயச்சந்துரு: ''மாணிக்கவாசகர் பெரிதும் வலியுறுத்திய 'அன்பு’ ஒன்றே கடவுளை அடைய ஒரே வழி என்பது இப்பொழுது பொய்த்துப்போன ஒன்றாகிவிட்டது.  குடும்பங்களுக்குள் அன்பைக் காண முடிவதில்லையே?''

அ.மகாலட்சுமி: ''ஏன் இல்லை என்கிறீர்கள்? மனிதர்களிடத்தில் அன்பு மிகுந்து காணப்படுகிறது. விலங்குகளிடம்கூட அன்பைக் காண முடிகிறது. நம் ஊருக்கு அருகில் உள்ள கீழ்பென்னாத்தூரில் மின்கம்பத்தில் மின்சாரம் தாக்கி இறந்த குட்டிக் குரங்கைச் சூழ்ந்துநின்று அழுத, ஐந்து குரங்குகளை நீங்கள் மறந்துவிட்டீர்களா?''

சமுதாயச் சீர்கேடுகளைத் தடுப்பது எப்படி ?

ஏ.குமரேஷ்: ''ஆன்மிகப் பெரியவர்கள் 'கடவுள் ஒன்றே’ என்பதை வலியுறுத்தினர். ஆனால் இன்றோ, கடவுளின் பெயரால் பல சமூக அநீதிகள் நடப்பதைத் தினம் தினம் பத்திரிகைச் செய்திகளில் காண முடிகிறதே?''

ர.மஞ்சுமாதேவி: ''இறை உணர்வை வளர்ப்பதன் மூலம் நல்லொழுக்கத்துடன் வாழலாம் என ஆசிரியர் கூறியதை நீங்கள் மறந்துவிட்டுப் பேசுகிறீர்கள். நாம் வளர்க்கும் இறை எண்ணம் என்பது சாதி, மதங்களுக்கு அப்பாற்பட்டதாக இருக்க வேண்டும்.''

வி.விமல்: ''இந்து - முஸ்லிம் ஒற்றுமையைப் பெரிதும் வலியுறுத்திய வல்லபாச்சாரியாரின் எண்ணம் தகர்ந்துவிட்டதா என எனக்கு சந்தேகமாக உள்ளது!''

இ.ராம்குமார்: ''செஞ்சி பகுதியைச் சார்ந்த நீங்கள் இப்படிச் சொல்வது எனக்கு மிகவும் வருத்தமாக உள்ளது. இந்து - முஸ்லிம் ஒற்றுமைக்கும் நட்புக்கும் இலக்கணமாக நம் செஞ்சிக்கோட்டை மன்னர் ராஜாதேசிங்குக்கும் முகமது கானுக்குமான நட்பையும் உலகம் மறக்குமா?''

அ.செந்தமிழ்ச் செல்வி: ''ஏன் ஓர் உதாரணத்தை நாட்டுக்கே உரியதாகச் சொல்கிறீர்கள்? நாடுகளுக்கு இடையே போர் வரக் காரணமாகவும் மதங்களே அமைகின்றன.''

இ.சந்துரு: ''எங்கள் தெருவில், ஏன் எங்கள் சத்தியமங்கலம் கிராமத்தில் இந்து, முஸ்லிம், கிறிஸ்தவர்கள்  ஒற்றுமையோடும் மகிழ்ச்சியோடும் இருந்து அன்பைப் பகிர்ந்துகொண்டு வாழ்கிறோமே!''

சமுதாயச் சீர்கேடுகளைத் தடுப்பது எப்படி ?

வெ.உமாமகேஸ்வரி: ''இந்து, முஸ்லிம் ஒற்றுமைக்கு கபீர் பாடிய வரிகள் சாட்சி!

''ஓ மனிதனே!

என்னை நீ எங்கே தேடுகிறாய்?

உன்னருகே இருக்கிறேன்'' என்னும் வரிகள் எனக்கு மிகவும் பிடித்தவை.''

ஜெ.மாலதி: ''ராமானுஜர், 'உயர்ந்தோர், தாழ்ந்தோர் இல்லை’ என்கின்ற நல்லெண்ணத்தை வலியுறுத்தினார். ஆனால், இன்னமும் சமூகத்தில் இக்கொடுமை உள்ளதைப் 'பரமக்குடி’, 'தர்மபுரி’ சம்பவங்கள் உண்மை என உரைக்கின்றனவே!''

ஆர்.ரூபன்குமார்: ''நீங்கள் கூறியது அரிதாக நடப்பது. ஆனால், சாதி - மதங்களை உடைத்து இன்று கலப்புத் திருமணங்கள் நடப்பதை சமூகம் ஏற்றுக்கொள்கிறதே!''

சமுதாயச் சீர்கேடுகளைத் தடுப்பது எப்படி ?

கோ.அபினா:''உருவ வழிபாட்டையும், மூடநம்பிக்கைகளையும் பெரிதும் எதிர்த்தார் குருநானக். ஆனால், இன்றும் எல்லா மதங்களிலும் இந்த மூடநம்பிக்கைகளில் மக்கள் மூழ்கிக்கிடக்கின்றனர்.''

எம்.அருண்கிளிண்டன்: ''கணினி யுகத்தில், விண்ணைத் தொட்டு இடம்பிடிக்க போட்டியிட்டுக்கொண்டு உள்ளபோது, மூடநம்பிக்கைகளில் மூழ்கியதாகக் கூறுவது ஏற்கத்தக்கது அல்ல.''

சமுதாயச் சீர்கேடுகளைத் தடுப்பது எப்படி ?

மு.செவ்வந்தி: ''ஆனால், அதே கணினிக்குப் பொட்டு வைத்து, பூ வைத்துப் பூஜைபோட்டுத்தானே துவங்குகிறோம்.''

க.பாக்கியலெட்சுமி: ''உண்மைதான். ஆனால், அது நம் கலாசாரத்தைச் சார்ந்தது.''

க.தீபா: ''நம் கலாசாரத்தில் உள்ள பழக்கவழக்கங்கள் பல அறிவியல் சார்ந்தே வகுக்கப்பட்டது. அது தெரியாமல் சிலர் மூடநம்பிக்கை எனக் கருதுகிறார்கள்.''

வி.கோபாலகிருஷ்ணர்:'' 'கடவுள் ஒன்றே’ என்ற எண்ணம் மக்களிடையே இன்று மறைந்துவிட்டது.''

எஸ்.கதிர்வேல்: ''ஆம். ஆனால், அந்த நிலைமை கூடிய விரைவில் மாறும்.''

இறுதியாகப் பேசிய ஆசிரியர்கள், ''நாம் அனைவரும் சாதி, மதம், இனத்தைத் தாண்டி ஒற்றுமையோடு வாழ்ந்தாலே இனி வரும் சமூகம் பக்தத் துறவிகள் எண்ணியது போல அமையும்'' எனக் கூறி முடித்தனர்.

* இதே போல், உங்கள் வகுப்பிலும் பாடத்தை ஒட்டிய தலைப்புகளில் விவாதமேடை நடத்தலாம். மாணவர்களின் ஈடுபாட்டுக்கு ஏற்ப ஆசிரியர்கள் மதிப்பீடு செய்துகொள்ளலாம்.

 -ஸ்ரீ.திலீப், ஆசிரியர்,
அரசு மேல்நிலைப் பள்ளி,
சத்தியமங்கலம், விழுப்புரம் மாவட்டம்.