Published:Updated:

'இன்று ஐ.ஏ.எஸ் தேர்வில் தோற்ற நாள்...!' -மாநகராட்சி கமிஷனரின் ஃபேஸ்புக் நினைவுகள்

'இன்று ஐ.ஏ.எஸ் தேர்வில் தோற்ற நாள்...!'  -மாநகராட்சி கமிஷனரின் ஃபேஸ்புக்  நினைவுகள்
'இன்று ஐ.ஏ.எஸ் தேர்வில் தோற்ற நாள்...!' -மாநகராட்சி கமிஷனரின் ஃபேஸ்புக் நினைவுகள்

'இன்று ஐ.ஏ.எஸ் தேர்வில் தோற்ற நாள்...!' -மாநகராட்சி கமிஷனரின் ஃபேஸ்புக் நினைவுகள்

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

கோவை மாநகராட்சி கமிஷனர் விஜய் கார்த்திகேயனின் ஃபேஸ்புக் பதிவில், ' இன்று நான் ஐ.ஏ.எஸ் தேர்வில் தோற்றதை ஃபேஸ்புக் மெமரி சுட்டிக் காட்டுகிறது. கனவுகள் நனவானதில் கடவுளுக்கு நன்றி' என குறிப்பிட்டு நெகிழ்ந்துள்ளார்.

மாணவர்களிடையே தன்னம்பிக்கை ஊட்டும் விதத்தில் பேசுவதிலும், அரசின் திட்டங்களை முன்னெடுப்பதிலும் கோவை மாநகராட்சி கமிஷனர் விஜய் கார்த்திகேயனின் பணி குறிப்பிடத்தகுந்தது. பிளஸ் 2 பொதுத் தேர்வு முடிவுகள் வெளியான நேரத்தில், ' தோற்றவர்களுக்கு என்னுடைய வாழ்த்துக்கள்' என ஃபேஸ்புக்கில் கமெண்ட் பதிவு செய்தார். இன்று காலையில், ஃபேஸ்புக் மெமரியில், 2009 ஆகஸ்ட் 4-ம் தேதி ஐ.ஏ.எஸ் முதல்நிலைத் தேர்வில் தோற்றதைக் குறிப்பிட்டு, 'டவுன்...பட் நாட் அவுட்' என எழுதியிருந்தார். அதை முகநூல் பக்கம் சுட்டிக் காட்டியதைக் குறிப்பிட்டு, 'கடவுளுக்கு நன்றி' என எழுதியிருக்கிறார் விஜய் கார்த்திகேயன்.

" ஐ.ஏ.எஸ் தேர்வு என்பது லட்சக்கணக்கான இளைஞர்களின் கனவாக இருக்கிறது. இத்தனைக்கும் விஜய் கார்த்திகேயன் எம்.பி.பி.எஸ். படித்தவர். 'ஏழை எளிய மக்களுக்கு மருத்துவ சேவை செய்ய வேண்டும்' என்பதுதான் தொடக்ககால கனவாக வைத்திருந்தார். அவருடைய அப்பா கண்ணன் வனத்துறையில் உயர் அதிகாரியாகப் பணிபுரிகிறார். அதனால் இயல்பாகவே, 'ஐ.ஏ.எஸ் படித்தால் இன்னும் நிறைய பேருக்கு சேவை செய்ய முடியும்' என்ற லட்சியத்தை வளர்த்துக் கொண்டார்"  என நம்மிடம் விவரித்த மாநகராட்சி அதிகாரி ஒருவர், " மதுரையில் எம்.பி.பி.எஸ் முடித்த கையோடு ஐ.ஏ.எஸ் முதல்நிலைத் தேர்வு எழுதினார். தேர்வில் தோற்ற அன்று அவரது அம்மாவிடம், ' நான் தோற்றதற்கான காரணத்தைக் கண்டுபிடித்துவிட்டேன். அடுத்தமுறை ஐ.ஏ.எஸ் தேர்வில் உறுதியாக வெற்றி பெறுவேன்' எனக் கூறினார்.

தோல்விக்கு மிக முக்கிய காரணமே, முதல்நிலைத் தேர்வுக்கு அவர் தேர்வு செய்த பாடம்தான். மருத்துவம் படித்ததால் மருத்துவ அறிவியலைத் தேர்வு செய்தார். இவரைவிட, மருத்துவத்தில் முதுகலைப் படிப்பு முடித்தவர்களோடு ஐ.ஏ.எஸ் முதல்நிலைத் தேர்வில் போட்டிப் போட முடியவில்லை. தவிர, பாடத் திட்டம் மிகக் கடுமையாக இருந்தது. இதையடுத்து, மானுடவியல் பாடத்தைத் தேர்வு செய்தார். அந்த வருடம் வெளியான ஐ.ஏ.எஸ் தேர்வில் மானுடவியல் படிப்பில் முதல் மதிப்பெண் வாங்கினார். அகில இந்திய குடிமைப் பணித் தேர்வில் இந்திய அளவில் 22-வது இடமும் பிடித்தார். 'தோல்வியில் இருந்து வெற்றியைத் தொடங்க வேண்டும்' என்றுதான் பல இடங்களிலும் அவர் பேசுவார். அவருடைய பேச்சைக் கேட்பதற்கு என தனிக் கூட்டமே உண்டு" என்றார் உற்சாகத்தோடு.

" தங்களுடைய முயற்சிகளில் தோற்றவர்கள் ஒரு நிமிடம் நிதானமாக அமர்ந்து, ' எந்த இடத்தில் நாம் தோற்றோம்' என்பதைக் கண்டுபிடித்துவிட்டால், வெற்றிக் கோட்டை அடைவது மிக சுலபம். எல்லாம் கொஞ்ச காலம்தான்" என உற்சாகப்படுத்துகிறார் விஜய் கார்த்திகேயன் ஐ.ஏ.எஸ்.

-ஆ.விஜயானந்த்
 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு