Published:Updated:

நாளை என்ன வேலை? - வாழ்க்கை வழிகாட்டல் - 5 - ‘நீட்’ நிலவரம் என்ன?

நாளை என்ன வேலை?
பிரீமியம் ஸ்டோரி
நாளை என்ன வேலை?

கல்வியாளர் ரமேஷ் பிரபா

நாளை என்ன வேலை? - வாழ்க்கை வழிகாட்டல் - 5 - ‘நீட்’ நிலவரம் என்ன?

கல்வியாளர் ரமேஷ் பிரபா

Published:Updated:
நாளை என்ன வேலை?
பிரீமியம் ஸ்டோரி
நாளை என்ன வேலை?

அகில இந்திய அளவில் நடத்தப்படும் உயர்கல்விக்கான பல்வேறு நுழைவு மற்றும் தகுதித் தேர்வுகளைப் பற்றிப் பார்த்துக்கொண்டு வருகிறோம். இந்த வாரம் இன்னும் சில நுழைவுத்தேர்வுகள் பற்றிய விவரங்கள்...

NEET: தொடக்கத்திலிருந்து இன்றுவரை தமிழகத்தில் கடுமையாக எதிர்க்கப்பட்டுவரும் ஒரு தேர்வு ‘நீட்’. என்றாலும் அது இருக்கும்வரை நாம் கண்டிப்பாக கவனம் செலுத்தி அந்தத் தேர்வை எழுத வேண்டியது அவசியம். தொடக்கத்தில் சி.பி.எஸ்.இ இதை நடத்திக்கொண்டிருந்தது. பிறகு பல்வேறு போட்டித் தேர்வுகளை நடத்தும் நேஷனல் டெஸ்டிங் ஏஜென்ஸி (NTA) எனப்படும் தேசியத் தேர்வு முகமை இதை நடத்தத் தொடங்கியிருக்கிறது. இப்போதைக்கு எம்.பி.பி.எஸ், BDS எனப்படும் பல் மருத்துவம் மற்றும் சித்தா, ஆயுர்வேதா, யுனானி, ஹோமியோபதி ஆகிய மாற்று மருத்துவப் படிப்புகள் போன்றவற்றுக்கு நீட் தேவை. நீட் மதிப்பெண்கள் அடிப்படையில் தமிழக மருத்துவக் கல்லூரிகளைத் தாண்டி, அகில இந்திய அளவில் அரசு மருத்துவக் கல்லூரிகளில் உள்ள இடங்களிலும் 15% அகில இந்தியக் கோட்டாவில் எம்.பி.பி.எஸ் இடம் பிடிக்க முடியும்.

பிளஸ் ஒன் மற்றும் பிளஸ் டூ சிலபஸ் அடிப்படையில் இயற்பியல், வேதியியல், தாவரவியல், விலங்கியல் ஆகிய நான்கு பாடங்களிலும் மொத்தமாக 180 கேள்விகள் இருக்கும். ஒவ்வொரு பாடத்திலும் செக்‌ஷன் A, B என்று இரண்டாகப் பிரிக்கப்பட்டு செக்‌ஷன் A பகுதியில் 35 கேள்விகள் இருக்கும். அனைத்துக்கும் விடை அளிக்கவேண்டும். B பகுதியில் 15 கேள்விகள், பத்துக்கு விடை அளித்தால் போதுமானது. அனைத்துமே MCQ எனப்படும் மல்டிபிள் சாய்ஸ் கேள்விகள்தான். மொத்தக் கால அளவு 200 நிமிடங்கள். சரியான விடைக்கு நான்கு மதிப்பெண், தவறான விடைக்கு -1 மதிப்பெண். விடை அளிக்காவிட்டால் எந்த பாதிப்பும் கிடையாது. இது முழுக்க முழுக்க ஒரு சென்டரில் நீங்கள் போய் எழுதக்கூடிய நேரடித் தேர்வு. இந்தத் தேர்வை ஆங்கிலத்தில் மட்டுமல்லாது தமிழிலும் எழுதலாம்.

நாளை என்ன வேலை? - வாழ்க்கை வழிகாட்டல் - 5 - ‘நீட்’ நிலவரம் என்ன?

NEST: இது பிளஸ் டூ முடித்தவுடன் நேரடியாக ஐந்து வருட Integrated MSc முதுநிலைப் படிப்பில் சேர்வதற்கான நுழைவுத்தேர்வு. புவனேஸ்வரில் உள்ள National Institute of Science Education and Research (NISER) மற்றும் மும்பையில் உள்ள University of Mumbai-Department of Atomic Energy Centre for Excellence in Basic Sciences ஆகிய இரண்டு புகழ் பெற்ற கல்லூரிகளில் இந்தப் படிப்புகள் உள்ளன. மூன்றரை மணி நேரம் நடைபெறும் இது, கணினிவழித் தேர்வாகும். கணிதம், இயற்பியல், வேதியியல், உயிரியல் ஆகிய நான்கு பாடங்களில் தலா 50 கேள்விகள் வீதம் மொத்தம் 200 கேள்விகள் இருக்கும். இதில் உங்களுக்கு ஒரு சிறப்புச் சலுகை உண்டு. இந்த நான்கு பாடங்களில் எந்த மூன்று பாடங்களில் நீங்கள் அதிகமாக மதிப்பெண் வாங்கியிருக்கிறீர்களோ அந்த மதிப்பெண் மட்டுமே கணக்கில் எடுத்துக்கொள்ளப்படும். ஒரு சில கேள்விகளுக்கு மைனஸ் மதிப்பெண் உண்டு. தேர்வை ஆங்கிலத்தில் மட்டுமே எழுத முடியும்.

NCHM JEE: இது கேட்டரிங் மற்றும் ஹோட்டல் மேனேஜ்மென்ட் படிப்புக்கு அகில இந்திய அளவில் நடத்தப்படும் நுழைவுத் தேர்வு. மத்திய அரசின் கீழ் இந்தியா முழுவதும் உள்ள 78 கல்லூரிகளில் BSc (Hospitality & Hotel Administration) படிப்பில் சேர இந்த நுழைவுத்தேர்வு அவசியம். தமிழகத்தில் சென்னை தரமணியில் ஒரு கல்லூரியும் திருச்சி துவாக்குடியில் இன்னொரு கல்லூரியும் உள்ளன. மூன்று மணி நேரத் தேர்வில் MCQ எனப்படும் மல்டிபிள் சாய்ஸ் முறையில் 200 கேள்விகள் கேட்கப்படும். சரியான விடைக்கு 4, தவறான விடைக்கு -1 என்கிற முறையில் மதிப்பெண்கள் வழங்கப்படும். தேர்வு கணினி வழியிலேயே நடைபெறுகிறது. இப்போதைக்கு ஆங்கிலத்திலும் இந்தியிலும் மட்டுமே இந்தத் தேர்வு உள்ளது. கணிதத் திறன், பகுத்தறியும் திறன், பொது அறிவு ஆகியவற்றிற்கு தலா 30 மதிப்பெண், ஆங்கில அறிவுக்கு 60 மதிப்பெண் மற்றும் சர்வீஸ் துறைசார்ந்த ஆப்டிடியூட் டெஸ்டுக்கு 50 மதிப்பெண் என்று கேள்வித்தாள் அமைந்திருக்கும். இன்றைய சூழலில் கேட்டரிங் துறைக்கு மிகப்பெரிய வாய்ப்புகள் இருப்பதால் அரசுக் கல்லூரிகளில் சேர இந்த நுழைவுத் தேர்வை எழுதுவது நல்லது.

நாளை என்ன வேலை? - வாழ்க்கை வழிகாட்டல் - 5 - ‘நீட்’ நிலவரம் என்ன?

ICAR-AIEEA(UG): தமிழகத்தில் கோவை விவசாயப் பல்கலைக்கழகத்தின்கீழ் உள்ள கல்லூரிகளில் விவசாயப் பட்டப்படிப்பு படிக்க பிளஸ் டூ மதிப்பெண்கள் அடிப்படையிலேயே அட்மிஷன் நடைபெறும் என்றாலும், அகில இந்திய அளவில் உள்ள 74 விவசாயப் பல்கலைக்கழகங்களில் படிக்க இந்த நுழைவுத்தேர்வு தேவைப்படுகிறது. இதில் அதிக மதிப்பெண் பெற்றவர்களுக்கு கோவை விவசாயப் பல்கலைக்கழகத்தின் கல்லூரிகளிலும் 15 சதவிகித இட ஒதுக்கீடு உண்டு. இரண்டரை மணி நேரத் தேர்வில் ஒவ்வொரு பாடத்திலும் 50 கேள்விகள் வீதம் மூன்று பாடங்களில் மொத்தம் 150 கேள்விகள் இருக்கும். சரியான விடைக்கு 4 மதிப்பெண், தவறான விடைக்கு -1 மதிப்பெண், விடை அளிக்காவிட்டால் எந்த பாதிப்பும் கிடையாது என்கிற மற்ற நுழைவுத்தேர்வு போன்ற நடைமுறைதான் இதிலும் உள்ளது. ஒரே வித்தியாசம், மூன்று பாடங்களைக் கொண்ட நான்குவிதமான வெவ்வேறு குரூப்பில் ஏதாவது ஒன்றை நீங்கள் தேர்வு செய்து தேர்வு எழுதலாம். இயற்பியல், வேதியியல், உயிரியல் என்பது ஒரு குரூப். இயற்பியல், வேதியியல், கணிதம் என்பது இரண்டாவது குரூப். இயற்பியல், வேதியியல், விவசாயம் என்பது மூன்றாவது குரூப். விவசாயம், உயிரியல், வேதியியல் என்பது நான்காவது குரூப். இந்த நுழைவுத் தேர்வும் இப்போதைக்கு ஆங்கிலத்திலும் இந்தியிலும் மட்டுமே உள்ளது.

NID DAT: டிசைன் துறையில் சிறந்த படிப்பான B.Des. படிப்பதற்குப் புகழ்பெற்ற கல்லூரி, அகமதாபாத்தில் உள்ள நேஷனல் இன்ஸ்டிடியூட் ஆஃப் டிசைன் (NID) என்பது பலருக்குத் தெரியும். இதே என்.ஐ.டி கல்லூரி ஆந்திராவில் விஜயவாடா, மத்தியப்பிரதேசத்தில் போபால், ஹரியானாவில் குருஷேத்ரா, அசாமில் ஜோர்ஹாட் ஆகிய இடங்களிலும் உள்ளது. இந்தக் கல்லூரிகளில் நான்கு வருட B.Des. படிப்பில் சேர்வதற்கு நடத்தப்படும் நுழைவுத்தேர்வுதான் NID DAT. இது DAT Prelims, DAT Mains என்று இரண்டு நிலைகளில் நடத்தப்படுகிறது. Prelims பொறுத்தவரை பார்ட் 1, பார்ட் 2 என்று இரண்டு பகுதிகளாகத் தேர்வு நடக்கும். முதல் பகுதியானது, ஒரு மதிப்பெண் கேள்விகள் 12, 2 மதிப்பெண் கேள்விகள் 9 என மொத்தம் 30 மதிப்பெண்ணுக்கு இருக்கும். அனைத்துமே MCQ எனப்படும் மல்டிபிள் சாய்ஸ் முறையில் அமைந்தவை. இரண்டாம் பகுதியில் ஆறு கேள்விகள். ஒவ்வொன்றுக்கும் 5 முதல் 15 வரை தனித்தனியான மதிப்பெண்கள் உள்ளன. இவை அனைத்துமே வடிவமைப்பு மற்றும் காட்சிப்படுத்துதல் சார்ந்து அமைக்கப்பட்டிருக்கும். Prelims மதிப்பெண் அடிப்படையில் தங்களுக்குப் பிடித்த கல்லூரி மற்றும் பாடப் பிரிவிற்கு விண்ணப்பிக்க வேண்டும். பிறகு அதிலிருந்து தேர்ந்தெடுக்கப்பட்ட மாணவர்கள் மட்டும் DAT Mains தேர்வுக்கு அழைக்கப்படுவார்கள். இந்தத் தேர்வு ஸ்டூடியோ சார்ந்த டெஸ்ட் மற்றும் இன்டர்வியூ என இரண்டு நிலைகளில் நடத்தப்படுகிறது. அட்மிஷனைப் பொறுத்தவரை Prelims தேர்வுக்கு 40%, Mains தேர்வுக்கு 60% வெயிட்டேஜ் எனக் கணக்கிடப்படுகிறது.

அகில இந்திய அளவில் முக்கியத்துவம் வாய்ந்த இன்னும் சில நுழைவுத் தேர்வுகளை அடுத்த வாரம் பார்ப்போம்.

- படிப்பு தொடரும்..

*****

எத்தனை மருத்துவக் கல்லூரிகள்?

இந்திய அளவிலும் தமிழக அளவிலும் உள்ள மருத்துவக் கல்லூரிகள் எத்தனை? அவற்றில் MBBS சீட்கள் எத்தனை? புள்ளிவிவரம் இதோ:

நாளை என்ன வேலை? - வாழ்க்கை வழிகாட்டல் - 5 - ‘நீட்’ நிலவரம் என்ன?

எங்கே மருத்துவக் கல்லூரிகள் அதிகம்?

தமிழகம் நீட் தேர்வை எதிர்ப்பதற்குச் சொல்லப்படும் முக்கியமான காரணங்களில் ஒன்று, இந்தியாவில் அரசு மருத்துவக் கல்லூரிகள் அதிகம் உள்ள மாநிலம் தமிழ்நாடு. நம் மாணவர்களுக்குக் கிடைக்க வேண்டிய 15% தமிழக அரசுக் கல்லூரிகளின் இடங்கள் மற்றவர்களுக்குப் போகிறது என்பதுதான். இந்திய அளவில் அதிக அரசு மருத்துவக் கல்லூரிகள் கொண்ட டாப் 10 மாநிலங்கள்:

நாளை என்ன வேலை? - வாழ்க்கை வழிகாட்டல் - 5 - ‘நீட்’ நிலவரம் என்ன?

டிசைன் டிசைனாக படிப்புகள்!

NID கல்லூரிகள் ஐந்துமே சிறந்தவை என்றாலும் அகமதாபாத் கல்லூரி மிகப்பழைமை வாய்ந்தது. அதில் B.Des. - Film & Video Communication, Exhibition Design, Animation Film Design, Graphic Design, Ceramic & Glass Design, Furniture & Interior Design, Product Design மற்றும் Textile Design ஆகிய எட்டு விதமான சிறப்புப் பாடப் பிரிவுகள் உள்ளன.

விஜயவாடா, போபால், குருஷேத்ரா, ஜோர்ஹாட் ஆகிய மற்ற நான்கிலும் B.Des. - Industrial Design, Communication Design, Textile & Apparel Design என்ற மூன்று விதமான பாடப்பிரிவுகள் உள்ளன.

இந்தக் கட்டுரையை வீடியோ வடிவில் காண கீழே இருக்கும் லிங்க்கை க்ளிக் செய்யவும் https://bit.ly/3vEihHU