Published:Updated:

வெளிநாட்டுப் படிப்பு... நிதி ரீதியாகத் தயாராவது எப்படி? பெற்றோர்கள் கவனத்துக்கு...

வெளிநாட்டுப் படிப்பு
பிரீமியம் ஸ்டோரி
வெளிநாட்டுப் படிப்பு

E D U C A T I O N

வெளிநாட்டுப் படிப்பு... நிதி ரீதியாகத் தயாராவது எப்படி? பெற்றோர்கள் கவனத்துக்கு...

E D U C A T I O N

Published:Updated:
வெளிநாட்டுப் படிப்பு
பிரீமியம் ஸ்டோரி
வெளிநாட்டுப் படிப்பு

புதிய கல்வியாண்டு தொடங்கவிருக்கும் நிலையில், பள்ளி வகுப்பை, பட்டப்படிப்பை முடித்த மாணவர்களின் பெற்றோர் உயர்கல்விக்கான திட்டங்களைச் செயல்படுத்த ஆரம்பித்திருப்பார்கள். இதில் வெளிநாட்டுக்குச் சென்று உயர் கல்வியைப் படிப்பதற்கு மாணவர் களும் அவர்களின் பெற்றோர்களும் திட்டமிட்டிருப்பார்கள்.

வெளிநாட்டில் உயர்கல்வியைப் படிப்பதென்பது அதிக பணம் செலவு ஏற்படும் விஷயம். கல்வி உதவித் தொகை கிடைத்து வெளிநாட்டுக்குப் படிக்கச் செல்லும் மாணவர்களுக்கு அதிக பணம் தேவைப்படாது. ஆனால், கல்வி உதவித்தொகை இல்லாமல் சுய முயற்சியில் படிக்கச் செல்பவர்களுக்கு பணத்தேவை அதிகம் இருக்கும். இதுபோன்ற சூழலை எப்படிச் சமாளிப்பது, வெளிநாட்டில் கல்வி கற்கச் செல்ல நிதி ரீதியாகத் தயாராவது எப்படி என்று கல்வியாளர் சோமசுந்தரத்திடம் கேட்டோம்.

வெளிநாட்டுப் படிப்பு...
வெளிநாட்டுப் படிப்பு...

‘‘வெளிநாட்டில் படிக்கச் செல்லும் பல்கலைக்கழகம் அங்கீகாரம் பெற்றதா என்பதை முதலில் தெரிந்து கொள்ள வேண்டும். நிறைய மாணவர் கள் விளம்பரத்தை நம்பி போலியான பல்கலைக்கழகங்களில் சேர்ந்து, ஏமார்ந்துவிடுகின்றனர். பல்கலைக் கழகங்கள் பற்றிய அங்கீகாரத்தை அதனுடைய இணையதளத்தில் படித்துத் தெரிந்துகொள்ளலாம். அல்லது தொலைபேசி மூலம் விசாரித்து சரியான தகவல்களைப் பெற வேண்டியது நம் கடமை.

சில பல்கலைக்கழகங்களில் இணையதளத்தில் குறைவான கட்டணம் குறிப்பிடப்பட்டிருக்கும். அட்மிஷனுக்குப் பிறகு, கூடுதல் கட்டணம் செலுத்தச் சொல்வார்கள். பணம் பறிப்பதுதான் அவர்களின் நோக்கமாக இருக்கும். இதுபோன்ற விஷயங்களையெல்லாம் அங்கு படித்த மாணவர்களிடம் கேட்டுத் தெரிந்துகொள்வது தேவையில்லாமல் பணம் விரயமாவதைத் தடுக்கும்.

வங்கிக் கடன் வாங்கலாமே...

வெளிநாட்டில் உயர்கல்வி படிப்பவர் களுக்கு பல்வேறு வங்கிக் கடன்கள் வழங்கப்படுகின்றன. கல்லூரி குறிப்பிட்டிருக்கும் கட்டணம், விடுதிக் கட்டணம் ஆகிய செலவுகள் மட்டுமே ஏற்படாது. இவை தவிர வேறு கட்டணங்கள், வெளிநாட்டில் தங்குமிடம் அல்லது வெவ்வேறு செலவுகளுக்கு என நிச்சயம் கூடுதல் பணம் தேவைப்படும். கோவிட்-19 போன்ற பெருந்தொற்று காலத்தில் நிச்சயமற்ற சூழல் நிலவுகிறது. அதனால் திடீர்த் தேவைகள் ஏற்படுவதற்கு அதிக வாய்ப்புள்ளது.

ஓராண்டுப் படிப்புக்கு ரூ.5 லட்சம் கட்டணம் தேவை எனில், கூடுதலாக ரூ.2 - ரூ.3 லட்சத்துக்குத் சேர்த்து வங்கியில் மதிப்பீடு (Estimation) கொடுக்க வேண்டும். அப்போதுதான் பெற்றோர், மாணவர் இரண்டு பேரும் கவலை இல்லாமல் செயல்பட முடியும்.

சோமசுந்தரம்
சோமசுந்தரம்

முன்பே திட்டமிடுங்கள்...

இப்போதைய சூழலில், பெரும்பாலான குடும்பங்களில் ஒன்று அல்லது இரண்டு குழந்தைகள்தான் உள்ளனர். பல பெற்றோர், குழந்தை பிறந்தவுடன் அல்லது பள்ளிக்குச் செல்லத் தொடங்கும் போதே தங்கள் வருமானத்தில் 25 சதவிகிதத்தை குழந்தையின் எதிர்காலத்துக்கு என்று சேமிக்கத் தொடங்கிவிடுகின்றனர். குறைந்த வருமானம் உள்ளவர்கள் எனில், 5 - 10 சதவிகிதமாவது சேமிக்க வேண்டும்.

ஆரம்பம் முதலே குறிப்பிட்ட அளவு பணத்தைச் சேமித்து வந்தால், பிள்ளைகள் உயர் கல்விக்குச் செல்லும்போது கணிசமான தொகை கையிருப்பில் இருக்கும். இதன்பிறகு, பணம் தேவைப்பட்டால், சிறிய அளவு கடன் வாங்கினால் போதும். இதனால் பெற்றோரோ, படித்து முடித்த பிறகு, அந்த மாணவரோ எளிதில் வங்கிக் கடனைத் திருப்பிச் செலுத்த முடியும்’’ என்று முக்கியமான பல விஷயங்கள் பற்றிச் சொன்னார் கல்வியாளர் சோமசுந்தரம்.

சா.ராஜசேகரன்
சா.ராஜசேகரன்

தனியாக சேமிக்க வேண்டும்...

பெற்றோர் எப்படி தங்கள் வருமானத்தைச் சேமிக்க வேண்டும் என்று நிதி ஆலோசகர் சா.ராஜசேகரன் விளக்குகிறார்.

‘‘பிள்ளைகளை வெளிநாடு களில் மட்டுல்ல, சிறந்த உயர்கல்வி நிறுவனத்தில் சேர்க்க விரும்பும் பெற்றோர் பிள்ளைகள் சிறுவயதிலிருக்கும்போதே தோராயமான ஓர் இலக்கை நிர்ணயத்துவிட வேண்டும்.

தங்கள் பிள்ளைகளின் எதிர்காலத்துக்காக நிதியைச் சேர்க்க விரும்பும் பெற்றோர் அதை முதலீடு செய்ய வேண்டும். சேமிப்பு என்பது அதற்கான தனி வட்டியை வருடம் வருடம் கொடுக்கும். ஆனால், அந்தச் சேமிப்பு வளராது, முதலீடு மட்டுமே வளர்ச்சிக்கான வாய்ப்பைக் கொடுக்கும். வெளிநாட்டுப் படிப்புக்காகத் திட்டமிடும்பட்சத்தில் முதலீடு செய்வதற்கு மியூச்சுவல் ஃபண்டு சிறந்தது.

சில பெற்றோருக்கு, உதாரண மாக, மருத்துவர் அல்லது தொழில்முனைவோராக இருக்கும் பெற்றோருக்கு தங்கள் பிள்ளைகளையும் தங்கள் தொழிலுக்குக் கொண்டு வர வேண்டும் என்கிற திட்டமிடல் இருக்கும். அதுபோன்ற பெற்றோருக்கு அந்தக் கல்விக்கு ஆகும் செலவு பற்றிய தெளிவு இருக்கும். எனவே, அதற்கேற்ப பிள்ளைகள் சிறிய வயதி லிருக்கும்போதே சேமிக்கவோ, முதலீடு செய்யவோ ஆரம்பித்து விட வேண்டும்.

சில பிள்ளைகள் வளர்ந்துவரும் நிலையில் அவர்களுக்கு எந்தத் துறையில் ஆர்வம் இருக்கிறதோ, எந்த பாடத்தில் சிறந்து விளங்குகிறார்களோ அதன் அடிப்படையில் தோராயமான இலக்கு நிர்ணயித்து பணத்தைச் சேமிக்க வேண்டும். குழந்தை சிறு வயதி லிருக்கும்போதே திட்டமிட்டு, இலக்கை நிர்ணயித்து, ஒரு மாதத்துக்கு ரூ.1,000 சேர்க்க வேண்டும் எனில், அதே குழந்தை வளர்ந்து 5 அல்லது 6-வது படிக்கும்போது சேமிக்கத் தொடங்கினால் மாதம் ரூ.2,000 அதாவது, இரட்டை மடங்கு சேமிக்க வேண்டும்.

திடீர் திட்டமிடல்...

பெற்றோரின் கையில் பணம் இல்லாதபட்சத்தில் திடீரென்று வெளிநாட்டுக்கு படிக்கச் செல்லும் சூழல் ஏற்பட்டால், வங்கிக் கடன்தான் நிதிக்கான ஒரே வாய்ப்பு. வீடு, நிலம் போன்ற சொத்துகள் இருந்தால், அதை அடமான மாக வைத்து வங்கியில் கடன் பெறலாம். சொத்துகள் இல்லை எனில், தேர்ந் தெடுத்துள்ள படிப்பை வைத்து, மாணவர் பெயரில் கல்விக் கடன் பெறலாம். அதன்மூலம் பெற்றோர் வட்டிப் பணத்தை மட்டும் கட்டினால் போதும். அதிக பட்சம் எட்டு ஆண்டுகள் வட்டி கட்டலாம். அடுத்த எட்டு ஆண்டுகளில் அந்த மாணவர் அசலையும் வட்டியையும் சேர்த்து அடைக்க வேண்டும்’’ என்றார்.

வெளிநாட்டில் படிப்பு என்கிற இலக்கை நிர்ணயித்து ஆரம்பம் முதலே முதலீடு செய்யத் தொடங்கினால், பெரிய அளவில் கடன் வாங்காமலே அதைச் செய்து முடிக்க முடியும். உங்கள் குழந்தையை வெளிநாட்டில் படிக்க வைக்க விரும்பினால், அதற்கான முயற்சியை இன்றே தொடங்குங்கள்!

வெளிநாட்டுப் படிப்பு...
வெளிநாட்டுப் படிப்பு...

பார்ட் டைம் வேலை மூலம் சம்பாதிக்கலாம்...

‘‘நம் நாட்டில் நடுத்தரக் குடும்பத்தினர்தான் அதிகம். இவர்களில் பலர் தங்கள் பிள்ளைகளை வெளிநாட்டுக்கு அனுப்பி, படிக்க வைக்க விரும்புகிறார்கள். இதற்கு வங்கிக் கடன் வாங்கியோ, சொத்துகளை அடகு வைத்தோதான் படிப்புக்கான பணத்தைத் திரட்டுகிறார்கள். நம் நாட்டுடன் ஒப்பிடுகையில், வெளிநாடுகளில் வகுப்புகளுக்கான நேரம் குறைவு. அதனால் அங்கு படிக்கச் செல்லும் மாணவர்கள் ஏதாவது பார்ட் டைம் வேலை பார்த்து, கொஞ்சம் சம்பாதிக்கலாம். பல மாணவர்கள் இதுபோன்று வெளிநாடுகளில் வேலை பார்த்துக்கொண்டே தங்கள் கல்வியைத் தொடர்கின்றனர். எனவே, இதற்கான வாய்ப்புகளையும் ஆரம்பம் முதலே நாம் ஆராய்ந்து தெரிந்து வைத்திருக்கும்பட்சத்தில், முடிந்தளவு செலவைக் குறைக்க முடியும்!’’ என்றார் சோமசுந்தரம்.