Published:Updated:

+2-க்குப் பிறகு… கலக்கல் வேலை... கைநிறைய சம்பளம்... வாய்ப்புகளை வாரி வழங்கும் படிப்புகள்!

+2-க்குப்  பிறகு…
பிரீமியம் ஸ்டோரி
+2-க்குப் பிறகு…

கவர் ஸ்டோரி

+2-க்குப் பிறகு… கலக்கல் வேலை... கைநிறைய சம்பளம்... வாய்ப்புகளை வாரி வழங்கும் படிப்புகள்!

கவர் ஸ்டோரி

Published:Updated:
+2-க்குப்  பிறகு…
பிரீமியம் ஸ்டோரி
+2-க்குப் பிறகு…

ப்ளஸ் டூ தேர்வு முடிவுகள் வந்துவிட்டன. மாணவர்களில் பலரும் ‘கல்லூரியில் எந்த சப்ஜெக்ட் படிக்க வேண்டும், அதை எந்தக் கல்லூரியில் படிக்க வேண்டும், எதிர்காலத்தில் என்ன வேலை பார்க்க வேண்டும்’ என்பதை மனதளவில் தேர்ந்தெடுத்து அதற்கான முயற்சி களில் இருக்கிற நேரம் இது.

வெறும் பட்டப்படிப்பு மட்டும் போதாது; அதுசார்ந்த தொழில்நுட்ப படிப்பும் இருந் தால்தான் கைநிறைய சம்பளம் வாங்கக்கூடிய வேலைவாய்ப்பு கிடைக்கும் என்கிற கால கட்டத்தில் வாழ்ந்துகொண்டிருக்கிற மாணவர் களுக்கு, வாய்ப்புகளை வாரி வழங்கும் படிப்புகள் பற்றி விளக்குகிறார்கள் கல்வியாளர் களான ரமேஷ் பிரபா, ஜெயபிரகாஷ் காந்தி மற்றும் ராஜம்மாள்.

 +2-க்குப்  பிறகு… கலக்கல்  வேலை...  கைநிறைய  சம்பளம்... வாய்ப்புகளை  வாரி  வழங்கும்  படிப்புகள்!

நீட் தேர்வு தேவைப்படாத மருத்துவப் படிப்புகள்...

‘மருத்துவம் படிக்க வேண்டும். ஆனால், நீட் தேர்வு எழுதாமல்’ என்று நினைக்கும் மாணவர் களுக்கு ஏற்ற படிப்பு பி.என்.ஒய்.எஸ் (Bachelor of Naturopathy and Yogic Sciences). கொரோனாவுக்குப் பிறகு இயற்கை மருத்துவம் மீதான நம்பிக்கை மக்களிடையே அதிகரித் திருப்பதால், அரசு மற்றும் தனியார் மருத்துவ மனைகளில் இந்தப் படிப்பு படித்தவர்களுக்கு உடனடியாக வேலை கிடைக்க வாய்ப்புண்டு.

கார்ப்பரேட் மருத்துவமனைகளிலும், ரத்தப் பரிசோதனைக் கூடங்களிலும் வேலை வாய்ப்பு தரும் பி.எஸ்ஸி பட்டப்படிப்புகள் கிட்டத்தட்ட 21 இருக்கின்றன. இவை எதற்குமே நீட் தேர்வு தேவையில்லை. கார்டியாக் கேர் டெக்னாலஜி, டயாலிசிஸ் டெக்னாலஜி, கிரிட்டிக்கல் கேர் டெக்னாலஜி, ரேடியாலஜி அண்ட் இமேஜிங் டெக்னாலஜி, மெடிக்கல் சோசியாலஜி, அனஸ்தீஷியா என நீளும் இந்தப் படிப்புகள் அரசு மற்றும் தனியார் கல்லூரிகள் இரண்டிலும் இருக்கின்றன. படிப்பு முடிந்தவுடன் மருத்துவர் களுக்கு உதவியாளராக வேலை கிடைக்க நிறைய வாய்ப்புண்டு.

 +2-க்குப்  பிறகு… கலக்கல்  வேலை...  கைநிறைய  சம்பளம்... வாய்ப்புகளை  வாரி  வழங்கும்  படிப்புகள்!

பாராமெடிக்கலில் சில முக்கியமான படிப்புகள்...

இளங்கலை மருந்தியல் (Bachelor of Pharmacy), இளங்கலை இயன்முறை மருத்துவம் (Bachelor of Physiotherapy) ஆகிய படிப்புகள் நேற்று, இன்று, நாளை என எல்லாக் காலத்திலும் வேலைவாய்ப்புகள் அதிகமிருக்கிற துறைகள். கண் மருத்துவத்தில் பட்டப்படிப்பு இருப்பது பல மாணவர்களுக்கும் தெரியவில்லை. மல்ட்டி ஸ்பெஷாலிட்டி மருத்துவமனைகள் பெருகிவிட்டதால், Bachelor of Optometry என்ற கண் மருத்துவப் பட்டப்படிப்பும், படித்த உடனே வேலைவாய்ப்பும் தருகிற படிப்புதான்.

உலகின் அனைத்து நாடுகளிலும் இந்திய செவிலியர்களுக்கு அதிக வரவேற்பு இருப்பதால், 4 வருட படிப்பான ‘பி.எஸ்ஸி நர்சிங்’கும் உடனடி வேலைவாய்ப்பு தருகிற படிப்புதான். கொரோனாவுக்குப் பிறகு, அதற்கு எதிரான தடுப்பூசிகள், மருந்துகள் தொடர்பான ஆய்வுகள் அதிகரித்திருக்கின்றன. இதில் உங்களுடைய பங்களிப்பும் வேண்டும் என்கிற லட்சியம் கொண்டவர்கள் பயோ மெடிக்கல், பயோ இன்ஃபர்மேட்டிவ், பயோ டெக்னாலஜி போன்ற பட்டப்படிப்புகளைப் படிக்கலாம். இந்தப் படிப்புகளைப் படிக்கிறவர்களுக்கும் உடன டியாக வேலை கிடைக்க வாய்ப்புண்டு.

கம்ப்யூட்டர் சயின்ஸில் புது அறிமுகங்கள்...

பொறியியல் படிப்புகளைப் பொறுத்தவரை, தொடர்ந்து பல வருடங்களாக கம்ப் யூட்டர் சயின்ஸ் தொடர்பான பட்டப்படிப்புகளையே நம் மாணவர்கள் அதிகம் தேர்ந்தெடுத்து வருகிறார்கள். இதில் புதிதாக அறிமுகப் படுத்தப்பட்டுள்ள ஆர்ட்டி ஃபிஷியல் இன்டலிஜென்ஸ் அண்ட் மெஷின் லேர்னிங், ஆர்ட்டிஃபிஷியல் இன்டலி ஜென்ஸ் அண்ட் டேட்டா சயின்ஸ், கம்ப்யூட்டர் சயின்ஸ் அண்ட் பிசினஸ் சிஸ்டம், பிசினஸ் அனலிட் டிக்ஸ், ரோபோட்டிக் அண்ட் ஆட்டோமேஷன் ஆகிய படிப்புகளைப் படித்தால், வேலைவாய்ப்பை எளிதாகப் பெறமுடியும்.

சில வித்தியாசமான படிப்புகள்...

பெரும்பாலான மாணவர் கள் தேர்ந்தெடுக்கிற பட்டப் படிப்புகளைத் தவிர்த்துவிட்டு, சில வித்தியாசமான பட்டப் படிப்புகளைத் தேர்ந்தெடுப் பதும் வேலைவாய்ப்பை எளிதாக்கும் ஒரு வழிதான்.

உதாரணமாக, பெட் ரோலியம் இன்ஜினீயரிங் அண்ட் பெட்ரோலியம் டெக்னாலஜி படித்துவிட்டு, இந்துஸ்தான் பெட்ரோலியம், ரிலையன்ஸ் பெட்ரோலியம் போன்ற ஏதோ ஒரு நிறுவனத் தில் சில வருடங்கள் வேலை பார்த்துவிட்டு, குவைத் போன்ற நாடுகளுக்கு சென்றால், கைநிறைய சம்பாதிக்கலாம்.

அதே போல, லெதர் டெக்னாலஜி. தோல் பதப் படுத்தல் தொழிலில் தமிழகம் முன்னணியில் இருப்பதால், இதைப் படித்தாலும் உடனடி யாக வேலைக்கு உத்தரவாதம் தரக்கூடிய ஒரு பட்டப்படிப்பே. இதேபோல, பிரின்ட்டிங் டெக்னாலஜியும் நல்ல எதிர் காலம் உள்ள படிப்புதான்.

கால்நடை மற்றும் மீன்வளம்...

மருத்துவப் படிப்புகள், பாராமெடிக்கல் படிப்புகளை அடுத்து கால்நடை மருத்துவப் (Bachelor of Vertinary and Animal Husbandry - BVSc and AH) படிப்புக்கு தற்போது வேலைவாய்ப்பு நல்ல நிலையில் இருக்கிறது. கால்நடை மருத்துவப் பட்டப்படிப்பிலேயே டெய்ரி டெக்னாலஜி, பவுல்ட்ரி டெக்னாலஜி, ஃபுட் டெக்னாலஜி ஆகியவையும் கைநிறைய வருமானம் தரும் வேலைவாய்ப்புகளைப் பெற்றுத் தரக்கூடிய படிப்புகள்தான். மீன்வளம் தொடர்பான பட்டப் படிப்பு படிக்க விரும்புபவர்கள் பேச்சுலர் ஆஃப் ஃபிஷரி சயின்ஸ் படிக்கலாம். இந்த படிப்புக்கான கல்லூரிகள் நாகப்பட்டினம், தூத்துக்குடி மற்றும் சென்னை பொன்னேரியில் இருக்கின்றன.

வேலைவாய்ப்பைத் தரும் வேளாண் படிப்புகள்...

வேளாண்மை தொடர்பான படிப்புகளுக்கு மவுசு கூடிக் கொண்டே இருக்கிறது. இனிவரும் காலத்தில் இன்னும் அதிகரிக்குமே தவிர, குறையாது. கோவை வேளாண் பல்கலைக் கழகத்தில் பி.எஸ்ஸி வேளாண்மை, தோட்டக்கலை, பட்டுப்பூச்சி வளர்ப்பு, வனத்துறை ஆகிய படிப்புகள் இருக்கின்றன. இதில் வனத்துறை பட்டப்படிப்பைக் கொண்டுள்ள கல்லூரி மேட்டுப் பாளையத்தில் வனத்தின் மத்தியிலேயே அமைந்திருக்கிறது. இதே பல்கலைக்கழகத்தில் பயோ டெக்னாலஜி, எனர்ஜி என்விரான்மென்ட்டல் இன்ஜினீயரிங் உள்ளிட்ட நான்கு பொறியியல் படிப்புகளும் இருக்கின்றன. இதற்கும் அண்ணா பல்கலைக்கழகத்துக்கும் தொடர்பில்லை. மேலும், வேளாண்மை தொடர்பான பட்டப்படிப்புகள் பெரும்பாலும் அரசுக் கல்லூரிகளில் இருப்பதால், கட்டணம் அதற்கேற்றாற்போல குறைவாகவே இருக்கும்.

 +2-க்குப்  பிறகு… கலக்கல்  வேலை...  கைநிறைய  சம்பளம்... வாய்ப்புகளை  வாரி  வழங்கும்  படிப்புகள்!

மீடியாத் துறையில் எக்கச்சக்க வாய்ப்புகள்...

நம் நாட்டில்தான் பத்திரிகைகள், சேனல்கள், டிஜிட்டல் மீடியாக்கள், எஃப்.எம்-கள் அதிகம் இருக்கின்றன. பி.எஸ்ஸி விஷுவல் கம்யூனிகேஷன் படித்தாலே மீடியாக்களில் வேலை கிடைத்துவிடும். இந்தப் படிப்புடன் சமீபத்தில் பி.எஸ்ஸி எலெக்ட்ரானிக் மீடியாவும் பட்டப்படிப்பாகக் கல்லூரிகளில் அறிமுகப்படுத்தப்பட்டுள்ளது. தவிர, ப்ளஸ் டூ முடித்தவுடன் அண்ணா பல்கலைக்கழகத்தில் 5 வருட படிப்பாக உள்ள எம்.எஸ்ஸி எலெக்ட்ரானிக் மீடியாவும் படிக்கலாம்.

மீடியா சார்ந்த படிப்புகளான பப்ளிக் ரிலேஷன், ஈவன்ட் மேனேஜ்மென்ட், விளம்பரத்துறை ஆகியவை பற்றியும் மாணவர்களுக்கு அதிகம் தெரியவில்லை. இந்தியாவில் ஒரு வருடத்துக்கு விளம்பரத்துக்காக மட்டுமே 75,000 கோடி செலவழிக்கப்படுகிறது. அப்படியானால், விளம்பரத் துறையில் எத்தனை ஆயிரம் பேருக்கு வேலைவாய்ப்பு இருக்கிறது என்று யோசித்துப் பாருங்கள். தவிர, பி.ஏ ஜர்னலிசம், பி.எஸ்ஸி அனிமேஷன் கிராபிக்ஸ், ஃபிலிம் அண்ட் டி.வி புரொடக்‌ஷன் போன்ற பட்டப்படிப்புகளை முடித்து விட்டும் மீடியாவில் நுழைந்து கலக்கலாம்.

மதிப்பெண் அவசியமில்லாத படிப்புகள்..!

அரசு கவின்கலைக் கல்லூரிகளை பெரும்பாலான மாணவர்கள் கண்டுகொள் வதில்லை அல்லது அவை பற்றி அவர்களுக்குத் தெரிவதே இல்லை. ‘பேச்சுலர் ஆஃப் ஃபைன் ஆர்ட்ஸ்’ நான்கு வருட பட்டப் படிப்புக்கு ப்ளஸ் டூ-வில் இத்தனை சதவிகித மதிப்பெண் இருக்க வேண்டும் என்கிற முக்கியமான விஷயம் இல்லை. இந்தப் பட்டப் படிப்பில் டெக்ஸ்டைல் டிசைன், சிற்பக் கலை, செராமிக் டிசைன் எனப் பல துறைகள் இருக்கின்றன. டெக்ஸ்டைல் டிசைன் படித்தால், நெசவாளர் சேவை மையத்தில் மத்திய அரசுப் பணி கிடைக்கும். ரியல் எஸ்டேட் பெருகிவிட்ட இந்தக் காலத்தில் செராமிக் டிசைன் படித்தவர்களுக்குப் போதுமான அளவு வேலை வாய்ப்புகள் இருக்கின்றன.

பி.காம் - இப்போதும் டிமாண்டான படிப்புதானா?

கலைக் கல்லூரிகளில் இப்போதும் அதிக விண்ணப் பங்கள் வருவது இந்தப் பட்டப்படிப்புக்குத்தான். இதில் வேலைவாய்ப்பை அதிகப்படுத்துவதற்காக பி.காம் பேங்கிங், அட்வர் டைசிங், மார்க்கெட்டிங், கோ ஆப்ரேட்டிவ் சயின்ஸ், டிஜிட்டல் மார்க்கெட்டிங், பிசினஸ் அக்கவுன்ட்டிங் உள்ளிட்ட 21 பட்டப் படிப்புகள் இருக்கின்றன. இவை எல்லாவற்றுக்குமே நல்ல வாய்ப்பு இருக்கிறது.

எப்போதும் வேலைவாய்ப்பைத் தரும் எவர்கிரீன் படிப்புகள்...

பி.பி.ஏ போன்ற அட்மினிஸ்ட்ரேஷன் படிப்புகள், ஹோட்டல் மேனேஜ்மென்ட் போன்றவை எப்போதும்போல எவர்கிரீன் படிப்புகளாகவே இருந்து வருகின்றன. குறிப்பாக, உணவு தொடர்பான தொழில்கள் உலகம் முழுக்க அதிகரித்துக்கொண்டே இருப்பதால், ஹோட்டல் மேனேஜ்மென்ட் படித்தவர் களுக்கு வேலைவாய்ப்புகள் உலகம் முழுக்க இருக் கின்றன.

சட்டப்படிப்பில் ஆர்வமா?

ஐந்து ஆண்டுகள் சட்டப் படிப்பைப் படித்துவிட்டு வழக்குரைஞராக வேலை செய்யலாம். அல்லது பொது மற்றும் தனியார் துறைகளில் சட்ட வல்லுநராக இருக்கலாம். அந்த வகையில் சட்டப் படிப்புக்கான வேலைவாய்ப்பு போதுமான அளவில் இருக்கிறது.

இ-வாகனங்களும் எலெக்ட்ரிக்கல் பொறியியலும்...

இந்தியாவில் 1% அளவுக்குக்கூட எலெக்ட்ரிக் கார்கள் இன்னும் வரவில்லை. அதனால், இந்தத் துறையில் ஒரு விஸ்வரூப முன்னேற்றம் அடுத்த சில ஆண்டுகளில் ஏற்பட வாய்ப்பிருக்கிறது. அதனால் பொறியியலில் எலெக்ட்ரிக்கல் இன்ஜினீயரிங் படிப் பவர்களுக்கு வேலைவாய்ப்புகள் பிரகாசமாகவே உள்ளது.

அரசு திரைப்படக் கல்லூரியும் ஆறு துறைகளும்...

சினிமா மற்றும் டிவி-யில் சாதிக்க விரும்புகிற வர்கள் தரமணியிலுள்ள அரசு திரைப்படக் கல் லூரியில் சேர்ந்து படிக்க லாம். இங்கு பேச்சுலர் ஆஃப் விஷுவல் ஆர்ட் பட்டப்படிப்பின்கீழ், சினிமாட்டோகிராபி, சவுண்ட் இன்ஜினீயரிங், டைரக்‌ஷன் அண்ட் ஸ்கிரீன்பிளே, டிஜிட்டல் இன்டர்மீடியட், ஃபிலிம் எடிட்டிங், அனிமேஷன் அண்ட் விஷூவல் எஃபெக்ட் என ஆறு துறைகள் இருக்கின்றன.

கைநிறைய சம்பளம் தரும் படிப்புகளில் நீங்கள் எதைத் தேர்வு செய்யப்போகிறீர்கள்?

ஒரே ஒரு விண்ணப்பம் மூலம் 163 கல்லூரி...

அண்ணா பல்கலைக்கழகத்தில் சிங்கிள் ‘விண்டோ கவுன்சலிங்’ மூலம் மாணவர்கள் தங்களுக்கான கல்லூரி மற்றும் பட்டப்படிப்பைத் தேர்ந்தெடுப்பதுபோல, தமிழ்நாட்டில் உள்ள அரசு கலை மற்றும் அறிவியல் கல்லூரிகளிலும் ஒன்றுக்கு மேற்பட்ட கல்லூரிகளில் பல துறைகளுக்கும் விண்ணப்பிக்கலாம். tngasa.org என்ற வெப்சைட் மூலம் 163 கல்லூரிகளில் உங்களுக்குப் பிடித்த மான கல்லூரிகளில், உங்களுக்கு பிடித்தமான பட்டப் படிப்புகளுக்கு ஆன்லைன் மூலமே விண்ணப்பிக் கலாம். இதற்கான கட்டணம், எஸ்.சி, எஸ்.டி மாணவர்களுக்கு 2 ரூபாய்; மற்றவர்களுக்கு 50 ரூபாய். ஒரே ஒரு விண்ணப்பம் மூலம் 163 கல்லூரிகளுக்கு விண்ணப்பிக்க முடிந்த இந்த வசதியை அனைத்து மாணவர்களும் பயன்படுத்திக் கொள்ளலாமே..!

தரமானக் கல்லூரிகளை எப்படிக் கண்டறிவது?

பிடித்தத் துறை போலவே, தரமான கல்லூரியில் படிப்பதும் வேலைவாய்ப்பை அதிகரிக்கும். ஒருவேளை, தரமான கல்லூரியில் உங்களுக்கு மிகப் பிடித்தமான துறை கிடைக்கவில்லை என்றாலும், இரண்டாவது சாய்ஸில் நீங்கள் வைத்துள்ள பட்டப்படிப்பை படிக்கலாம்.

2022-ல் கல்லூரிக்குள் அடியெடுத்து வைக்கும்போது இருக்கிற தொழில்நுட்பமும் வேலைவாய்ப்பும் அடுத்த மூன்று அல்லது நான்கு வருடங்களில் பெருமளவில் மாறவே செய்யும். இந்த மாற்றத்துக்கு ஏற்றபடி கற்பித்தலில் பெரிய மாற்றங்களைக் கட்டமைத்துள்ள அதாவது, அட்வான்ஸ் லேர்னிங் சென்டர்ஸ் அமையப் பெற்றுள்ள கல்லூரிகளைத் தேர்ந்தெடுத்து அவற்றில் படிப்பதன் மூலம் வருங்காலத்துக்கான வேலைவாய்ப்பை உறுதி செய்துகொள்ள முடியும். இனிமேல் வேலைவாய்ப்பைப் பெறுவதில் பெரும் போட்டிகள் நடக்கும் என்பதால், போட்டித் தேர்வுகளுக்கு மாணவர்களைத் தயார்படுத்தும் கல்லூரிகளாகப் பார்த்து சேருவது நல்லது.

பல நிறுவனங்களுடன் ஒப்பந்தம் செய்து மாணவர்களை இன்டர்ன்ஷிப் அனுப்பும் கல்லூரிகளைத் தேர்ந்தெடுப்பது உங்கள் எதிர்கால வேலைவாய்ப்புக்கு நல்லது. அடுத்த மூன்று முதல் ஐந்து வருடங்களில் ஏறவிருக்கிற விலைவாசிக்கு ஏற்றபடி, சூப்பர் ட்ரீம் ஆஃபர் அதாவது, ரூ.8 லட்சத்துக்கு மேற்பட்ட ஆண்டு வருமானம் வாங்கித் தர முடிந்த அளவுக்கு பல நிறுவனங்களுடன் ‘கேம்பஸ் இன்டர்வியூ’ நடத்தி வருகிற கல்லூரிகளைத் தேர்ந்தெடுப்பதும் புத்திசாலித்தனம். எல்லாவற்றுக்கும் மேலாக, நீங்கள் தேர்வு செய்யும் கல்லூரியானது மறைமுக கட்டணங்களை விதிக்கிறதா என்பதை அங்கு படித்து வரும் சீனியர்கள் மாணவர்கள் மூலம் கேட்டுத் தெரிந்துகொள்வதும் மிக மிக அவசியம்!

வேலைவாய்ப்பு தரும் படிப்பு... சில யோசனைகள்!

ஒரு பட்டப்படிப்பை படித்துவிட்டு அதற்கேற்ற வேலைக்குச் செல்வதும், அதில் அடுத்தடுத்த கட்டங்களுக்கு நகர்ந்து கைநிறைய சம்பாதிப்பதும் இந்தக் காலத்தில் இயலாது. அதனால்தான் பல்கலைக்கழகங்களும் கல்லூரிகளும் பட்டப்படிப்புகளுடன் தொழில்நுட்பம் சார்ந்த இணை படிப்புகளையும் அறிமுகப்படுத்திக்கொண்டே இருக்கின்றன. கம்ப்யூட்டர் சயின்ஸ் மற்றும் பி.காம் ஆகிய படிப்புகள் இதற்கு மிகச் சிறந்த உதாரணங்கள். மாணவர்களும் இதைப் புரிந்துகொண்டு தாங்கள் எந்தத் துறைக்கு வேலைக்குச் செல்ல விரும்புகிறார்களோ, அதனுடன் தொடர்புடைய தொழில்நுட்பங்களை உள்ளடக்கிய பட்டப்படிப்புகளைத் தேர்ந்தெடுத்து படிக்கலாம். அல்லது அந்தத் தொழில்நுட்பங்களை டிப்ளோமா கோர்ஸ் போல தனியாகவும் படித்து தங்கள் திறனை மேம்படுத்திக்கொள்ளலாம்.

உதாரணமாக, டேலி (tally), பைத்தான், கோடிங் போன்ற தொழில்நுட்ப படிப்புகளைக் குறிப்பிடலாம். பொறியியல் படிக்க விரும்பும் மாணவர்களில் பலரும், கோவிட் நேரத்திலும் வீட்டுக்கு அனுப்பாத, சம்பளத்தைக் குறைக்காத ஐ.டி துறையை முதல் சாய்ஸாகத் தேர்ந்தெடுக் கிறார்கள். பொறியியலில் நீங்கள் எந்தத் துறையைத் தேர்ந்தெடுத்தாலும் ஐ.டி-யில் அதற்கான வேலைவாய்ப்பு இருக்கிறது என்பதால், அனைவரும் ஒரே துறையைத் தேர்ந்தெடுத்து வேலை வாய்ப்பில் சிக்கலை ஏற்படுத்திக்கொள்ளத் தேவை இல்லை. இனிமேல் பட்டப்படிப்பையும் மதிப்பெண்ணையும் வைத்து வேலை கிடையாது. உங்கள் தொழில்நுட்பத் திறமைகளும் கூடுதல் திறன்களும்தான் வேலைவாய்ப்புகளின் கதவுகளைத் திறக்கும். எலெக்ட்ரானிக்ஸ் படித்த மாணவர்கள், தங்கள் துறைக்குத் தேவையான கம்ப்யூட்டர் தொழில்நுட்பக் கல்வியைக் கற்று வைத்திருக்க வேண்டும். கம்ப்யூட்டர் படித்த மாணவர்கள் தங்கள் துறைக்குத் தேவையான எலெக்ட்ரானிக் தொழில்நுட்பத்தைக் கற்றுவைத்திருக்க வேண்டும்.