Published:Updated:

ஆன்லைன் கல்வி... ஆசிரியர்களின் பிரச்னைகளை அறியுமா சமூகம்?

ஆசிரியர்களின் பிரச்னை
பிரீமியம் ஸ்டோரி
News
ஆசிரியர்களின் பிரச்னை

வாட்ஸ்அப் குழு ஆரம்பித்து, அதன் வழியாகவும் பாடங்களை மாணவர்களுக்கு அனுப்புகிறோம்.

ஆன்லைன் வகுப்புகளால் மாணவர்கள் மற்றும் பெற்றோர்கள் சந்திக்கிற பிரச்னைகள் பற்றி அடிக்கடி உரையாடுகிற நாம், ஆசிரியர்கள் சந்திக்கும் பிரச்னைகள் பற்றி யோசிப்பதில்லை. அதற்காக சில ஆசிரியர்களிடம் உரையாடினோம்.

துர்கா தேவி, தனியார் பள்ளி ஆசிரியர்

‘`எட்டு மணி நேரம் பள்ளிக் கூடத்தில் வேலை பார்க்கிறோம் என்றால், அதற்கான முன்னேற் பாடுகளுக்கு இரண்டு அல்லது மூன்று மணி நேரம் செலவழித் தால் போதும் என்ற நிலைதான் கொரோனாவுக்கு முன்பு இருந்தது. இப்போது நான்கு மணி நேர ஆன்லைன் வகுப்பில். டெக்னிக்கல் முன்தயாரிப்புகளுக்கு குறைந்தது 8 மணி நேரம் தேவைப்படுகிறது. தவிர, மாணவர்கள் வருகைப் பதிவேடு, பாடங்களுக்கான நோட்ஸ் தயாரிப்பு, தேர்வுகள், ரேங்க் கார்டு தயாரிப்பு என்று வழக்கமான பணிகளையும் செய்து கொண்டிருக்கிறோம்.

ஆன்லைன் கல்வி... ஆசிரியர்களின் பிரச்னைகளை அறியுமா சமூகம்?

இப்போதுள்ள சூழலில் எல்லா ஆசிரியர் களுக்கும் கணினி அறிவு அவசியம் என்ற நிலை. ஆசிரியப் பணியில் மிகுந்த அனுபவம் பெற்ற மூத்த ஆசிரியர்கள்கூட இதனால் பாதிக்கப்படுகிறார்கள்.

இதே சங்கடம் சில பெற்றோர்களுக்கும் இருக்கிறது. பெற்றோர்கள் தங்களுடைய பிரச்னைகளை எங்களிடம் பகிர்ந்து கொள்ளவில்லை என்றால், சம்பந்தப்பட்ட மாணவர் படிக்கிறாரா / எழுதுகிறாரா / வகுப்பை கவனிக்கிறாரா என்பது எங்களுக்குத் தெரியவே வாய்ப்பில்லை. நேரடி வகுப்பில் யாரெல்லாம் பாடங்களைக் கவனிக்கிறார்கள், யாரெல்லாம் கவனிக்கவில்லை என்று எங்களால் பார்க்க முடியும். உடனே ‘எழுந்து நில்’, ‘நான் நடத்திக்கொண்டிருக்கிற பாடத்தை வாசி’ என்று அவர்களுடைய கவனத்தை எங்கள் பக்கம் திருப்புவோம். ஆன்லைன் வகுப்பில் இது கடினமாக இருக்கிறது.

வீட்டுச் சூழ்நிலை காரணமாகச் சில மாணவர்கள், சோர்வாகப் பள்ளிக்கூடத்துக்கு வந்தாலும், நேரடி வகுப்பறையில் ஃபிரெண்ட் ஸையும் ஆசிரியர்களையும் பார்த்தவுடன் மகிழ்ச்சியாகி விடுவார்கள். ஆன்லைன் வகுப் பில் இதற்கும் வாய்ப்பில்லாமல் இருக்கிறது. ’’

சங்கர், தமிழ்நாடு இடைநிலை ஆசிரியர்கள் சங்கத்தின் பொதுச் செயலாளர்

``ஆன்லைன் வகுப்புகளில் கலந்து கொள்வதற்கான ஸ்மார்ட்போன் இருக்கிற மாணவர்களுக்கு மட்டும்தான் பாடம் நடத்திக்கொண்டிருக் கிறோம். இதுவே எங்களுக்கு மிகப்பெரிய மன உளைச்சலைத் தருகிறது. ஸ்மார்ட்போன் வைத்திருக்கிற மாணவர்கள் மைக்கையும் கேமராவையும் அணைத்து வைத்துவிட்டு, வேறு ஏதாவது செய்துகொண்டிருந்தாலும் எங்களுக்குத் தெரியப்போவதில்லை. கல்வி தொலைக்காட்சி யில் பாடம் நடத்தினாலும் அந்த நேரத்தில் சிக்னல் பிரச்னை, மின்சாரம் தடைப்படுவது போன்ற பிரச்னைகள் இருக்கின்றன.

வாட்ஸ்அப் குழு ஆரம்பித்து, அதன் வழியாகவும் பாடங்களை மாணவர்களுக்கு அனுப்புகிறோம். அந்தக் குழுவிலிருக்கிற பெண் ஆசிரியர்களின் செல்போன் எண்களை எடுத்து அவர்களிடம் தேவையில்லாமல் பேசுவது, ‘நேத்து நீங்க நடத்தின பாடம் என் பிள்ளைக்குப் புரியலை. இப்ப நடத்த முடியுமா’ என்று இரவில் போன் செய்து கேட்பது போன்ற பிரச்னைகளையும் ஆசிரியர்கள் சந்தித்துக் கொண்டிருக்கிறார்கள். தங்கள் குழந்தைகளுக்குப் பாடம் சொல்லித் தருகிற ஆசிரியர்களுக்கு உரிய மரியாதை தர வேண்டியதும் பெற்றோர்களின் கடமைதான்.’’

ஆன்லைன் கல்வி... ஆசிரியர்களின் பிரச்னைகளை அறியுமா சமூகம்?
lakshmiprasad S

மனோகரன், முதுநிலை பட்டதாரி ஆசிரியர் சங்கத்தின் பொதுச் செயலாளர்

``அறிவியல் பாடங்களைத் தொடர்ந்து ஆன் லைனில் எடுத்தால், மாணவர்களுக்கு செய்முறை பாடங்கள் புரியாமல் போவதற்கான வாய்ப்புகளே அதிகம். புரியாத சப்ஜெக்டின் மீது மாணவர் களுக்கு விருப்பம் வராது. விளைவு மதிப்பெண் குறையும். அதனால், பதினொன்றாம் வகுப்பிலோ, கல்லூரியிலோ அறிவியல் பாடங்கள் கிடைக் காது.

ஒருவேளை மனப்பாடம் செய்து அதிக மதிப்பெண் எடுத்தாலும்கூட `புரியாத பாடம் நமக்கெதுக்கு’ என்று இயற்பியல், வேதியியல், தாவரவியல், விலங்கியல் போன்ற அறிவியல் பாடங்களைத் தவிர்த்துவிட்டு, மாணவர்களே கலை படிப்புகளைத் தேர்ந்தெடுத்து விடுவார்கள். இதனால், மேல்நிலைப்பள்ளியில் படித்த சப்ஜெக்ட் ஒன்று, கல்லூரியில் படிக்கிற சப்ஜெக்ட் வேறு என்று மாணவர்களின் படிப்புத்திறனும் குறையும். என்னைப் போன்ற அறிவியல் ஆசிரியர்களின் மிகப்பெரிய மன வருத்தம் இது.’’