`ஆர்ப்பாட்ட வரவேற்பு வேண்டாம்; உங்கள் அன்பு ஒன்றே போதும்!' - டி.டி.வி தினகரன் வேண்டுகோள் | Avoid grand welcomes, TTV Dinakaran advice cadres

வெளியிடப்பட்ட நேரம்: 20:07 (28/03/2019)

கடைசி தொடர்பு:10:34 (30/03/2019)

`ஆர்ப்பாட்ட வரவேற்பு வேண்டாம்; உங்கள் அன்பு ஒன்றே போதும்!' - டி.டி.வி தினகரன் வேண்டுகோள்

`ஆர்ப்பாட்ட வரவேற்பு வேண்டாம், உங்கள் அன்பு ஒன்றே போதும். பொன்னாடை, பூங்கொத்து, பட்டாசுகள், சுற்றுச்சூழலுக்கு மாசு ஏற்படுத்தும் பிளாஸ்டிக் தோரணக் கொடிகளை தவிர்த்திடுங்கள்' என்று டி.டி.வி.தினகரன் தொண்டர்களுக்கு கோரிக்கைவிடுத்துள்ளார். 

அறிக்கை


இது தொடர்பாக அவர் வெளியிட்டுள்ள அறிக்கையில், ``தேர்தல் களத்தில் துரோகிகளும், எதிரிகளும் கொடுக்கும் தொல்லைகளை எல்லாம் தூள் தூளாக்கி வெற்றியைக் குவிக்கும் வகையில் நீங்கள் ஆற்றி வரும் பணிகள் நமது இயக்கத்துக்கு புது உற்சாகத்தை கொடுத்திருக்கின்றன. `நாம் மக்களோடு நிற்கிறோம்; மக்கள் நம்மோடு நிற்கிறார்கள்' என்பதை நிரூபிப்பதற்கான பொன்னான வாய்ப்பு இந்தத் தேர்தல் என்பதை நீங்கள் முழுவதுமாக புரிந்து வைத்திருப்பீர்கள். ஜனநாயக நாட்டில் மிகச் சாதாரணமானவர்களுக்கு கிடைக்கும் உரிமையைக் கூட நாம் உச்சநீதிமன்றம் சென்று பெற வேண்டிய நிலையை துரோகிகளும், தமிழ்நாட்டில் எதிரிகளும் உருவாக்கியிருக்கிறார்கள். நம்மை எப்படியாவது வீழ்த்திடவேண்டும் என கங்கணம் கட்டிக்கொண்டிருக்கிறார்கள். இதற்காக எந்த எல்லைக்குப் போவதற்கும் அவர்கள் தயாராக இருக்கிறார்கள். 

டிடிவி தினகரன்


பிரசாரத்துக்கும், நம்முடைய புதிய சின்னத்தை மக்களிடம் கொண்டுபோய் சேர்ப்பதற்கும் மிகக் குறைந்த கால அளவே இருக்கிறது. இப்போது நமக்கு ஒவ்வொரு மணித்துளிகளும் முக்கியம். நொடிப்பொழுதை வீணடிக்காமல் தேர்தல் களத்தில் மட்டுமே கவனத்தை வைக்கவேண்டிய நேரம் இது. பிரசார பயணத்தின்போது, பூங்கொத்து கொடுப்பதில், புகைப்படம் எடுப்பதில், பொன்னைவிட மேலான நம் நேரத்தை வீணாக்கிவிடக்கூடாது. ஆத்மார்த்தமான அன்பையும், நம் இயக்கத்தின் மீதும், என் மீதும் கொண்டிருக்கும் பற்றினை நன்கு அறிவேன். எத்தனையோ சந்தர்ப்பங்களில் நாம் சந்தித்துக்கொள்கிறோம். நம் தீரா அன்பு கொஞ்சமும் குறையப்போவதில்லை என்பதை நீங்கள் உணர்ந்துகொள்வீர்கள் என நம்புகிறேன். உங்களின் ஆசை முகங்களும் அதில் குடிக்கொண்டிருக்கும் தூய அன்பும், அப்பழுக்கில்லாத வாழ்த்துகள் போதும். நம் கவனத்தை சிதறவிட்டு எதிரிகளுக்கும் துரோகிகளுக்கும் இம்மியளவும் இடம் கொடுக்கக் கூடாது'' என தெரிவித்துள்ளார்.