``முதலிடம் பா.ஜ.க... அடுத்து தி.மு.க!”- இது கூகுள் கணக்கு | Modi leads the expenses followed stalin and YSR

வெளியிடப்பட்ட நேரம்: 12:55 (26/04/2019)

கடைசி தொடர்பு:13:02 (26/04/2019)

``முதலிடம் பா.ஜ.க... அடுத்து தி.மு.க!”- இது கூகுள் கணக்கு

பாஜக மோடி, திமுக ஸ்டாலின்

அரசியல் கட்சிகள் தேர்தல் பிரசாரங்களுக்குக் கோடிக்கணக்கில் செலவு செய்வது வழக்கம்தான். தொண்டர்கள் செலவு, சுவர் விளம்பரங்கள், தொலைக்காட்சி விளம்பரங்கள் என ஏகப்பட்ட செலவுகள் அதில் அடக்கம். கடந்த சில தேர்தல்களில் இவற்றைவிடச் சமூக ஊடகங்கள் மூலம் செய்யும் செலவு அதிகரித்து வருகிறது. இந்த நாடாளுமன்றத் தேர்தலில் அது இன்னும் அதிகரித்திருக்கிறது. ஒவ்வொரு கட்சியும் எவ்வளவு செலவு செய்திருக்கிறார்கள் என Huffington post செய்தித்தளம் வெளியிட்ட கணக்கின்படி பா.ஜ.க-வே இதில் முதலிடத்தில் இருக்கிறது.

கூகுள் நிறுவனத்தின் புராடக்ட்களில் விளம்பரம் செய்ய இந்த ஆண்டு மட்டும் 5.9 கோடி செலவு செய்திருக்கிறது பா.ஜ.க. இந்திய அளவில் இதுதான் அதிகம். அடுத்த இடத்தில் இருப்பது திராவிட முன்னேற்றக் கழகம். இவர்கள் 4.07 கோடியைச் செலவு செய்திருக்கிறார்கள். மூன்றாம் இடத்தில் இருப்பது ஆந்திராவின் YSR காங்கிரஸ். அவர்கள் செலவு செய்திருப்பது 2.3 கோடி.

இவையெல்லாம் நேரிடையாகக் கட்சிகள் செய்த செலவு. ஆனால், தெலுங்கு தேசம் கட்சி டிஜிட்டல் நிறுவனங்களுடன் கைகோத்து அவர்கள் மூலம் செலவு செய்திருக்கிறது. அதனால், அவர்கள் செலவு அதிகமாக இருந்தாலும் இந்தப் பட்டியலில் வரவில்லை எனக் குறிப்பிட்டிருக்கிறது Huffington post.

இந்த ஆண்டு ஏப்ரல் மாதத்தில் ஃபேஸ்புக் விளம்பரங்களுக்கு மட்டும் பா.ஜ.க 1.3 கோடி செலவு செய்திருக்கிறது. 

இவை விளம்பரங்களுக்காக ஆன செலவு மட்டுமே. தனி நபர்களின் தகவல்களைப் பெற்றதாகவோ அதற்குப் பணம் தந்ததாகவோ இதுவரை எந்தச் செய்தியும் வெளியாகவில்லை. கேம்பிரிட்ஜ் அனலிட்டிகா பிரச்னை போல இங்கேயும் ஏதும் நடந்திருந்தால் அந்தச் செலவு பல நூறு கோடிகளைத் தாண்டும் என்பது மட்டும் நிச்சயம். 
 

நீங்க எப்படி பீல் பண்றீங்க