தேர்தலா… மக்களின் உயிரா? - பீகார் எழுப்பும் கேள்வி

பீ கார் மாநிலத்தில் கொரோனா பாதிப்பு அதிகரித்துவருகிறது. பெரும்பாலான மாவட்டங்களில் ஊரடங்கு அமலில் இருக்கிறது. இத்தகையச் சூழலில், ‘சட்டமன்றத் தேர்தலை நடத்த வேண்டாம்’ என்று எதிர்க்கட்சிகள் வலியுறுத்துகின்றன. ஆனால், தேர்தலை நடத்துவதில் பீகார் முதல்வர் நிதிஷ் குமார் உறுதியாக இருக்கிறார். `அதே மனநிலையில்தான் பா.ஜ.க-வும் இருக்கிறது’ என்கிறார்கள். என்ன நடக்கிறது அங்கே? . பீகாரில் வரும் அக்டோபர் மாதத்துடன் நிதிஷ் குமாரின் ஆட்சிக்காலம் நிறைவடைகிறது. நவம்பர் மாதம் சட்டமன்றத் தேர்தல் நடத்தப்பட்டு, அங்கு புதிய ஆட்சி நிறுவப்பட வேண்டும். பீகாரில் கொரோனா பாதிப்பு நாளுக்கு நாள் அதிகரித்துவருகிறது. ஜூலை 22-ம் தேதி நிலவரப்படி அங்கு 217 பேர் கொரோனா தொற்றால் மரணமடைந்துள்ளனர். இதனால், `இப்போதைக்குத் தேர்தலை நடத்தக் கூடாது’ என்று எதிர்ப்பு தெரிவிக்கின்றன எதிர்க்கட்சிகள்.

. ராஷ்ட்ரிய ஜனதா தளம் கட்சியின் தலைவரும், பீகார் சட்டமன்ற எதிர்க்கட்சித் தலைவருமான தேஜஸ்வி யாதவ், “நிதிஷ் குமார் அரசு, கொரோனாவால் மரணங்கள் தொடர்வது குறித்துக் கவலைப்படவில்லை. தேர்தல் பணிகளில் மும்முரமாக ஈடுபடுகிறது. நிதிஷ் குமார் பிணங்கள்மீது தேர்தல் நடத்த விரும்புகிறாரா அல்லது குடியரசுத் தலைவர் ஆட்சி வந்துவிடும் என்று பயப்படுகிறாரா?” என்று விளாசியிருக்கிறார்.

. ஐக்கிய ஜனதா தளம் வெற்றிபெற்று முதல்வர் நாற்காலியில் நிதிஷ் குமார் அமர்வதற்கு வியூகம் வகுத்துக்கொடுத்தவர் பிரசாந்த் கிஷோர். அதே கட்சியில் துணைத் தலைவராகவும் இருந்தவர். பிறகு கட்சியிலிருந்து வெளியேறி விட்டார். அவரும் `இப்போதைக்குத் தேர்தல் வேண்டாம்’ என்றே வலியுறுத்துகிறார். எதிர்க்கட்சிகளின் கோரிக்கையை ஆளும் கூட்டணியில் இடம்பெற்றுள்ள ராம்விலாஸ் பாஸ்வானின் லோக் ஜனசக்தி கட்சியும் ஆதரிப்பதுதான் ஆச்சர்யம். அந்தக் கட்சித் தலைவரான சிராக் பாஸ்வான், “இப்போது தேர்தல் நடத்துவது மக்களுக்கு பெரும் ஆபத்தை ஏற்படுத்தும். எனவே, நான் கட்டாயமாகத் தேர்தல் நடத்துவதை ஆதரிக்க மாட்டேன்” என்று கூறியுள்ளார்.

. காங்கிரஸ், சி.பி.ஐ., சி.பி.எம் உள்ளிட்ட கட்சிகளும் ‘தேர்தல் இப்போது வேண்டாம்’ என்றே வலியுறுத்துகின்றன. இது குறித்து, தேர்தல் ஆணையத்துக்குக் கடிதமும் எழுதியுள்ளன. ஆனால், இவை எதையும் பொருட்படுத்தவில்லை நிதிஷ் குமார்.

1990 முதல் 2005-ம் ஆண்டு வரை 15 ஆண்டுகள் லாலு பிரசாத் யாதவ் தலைமையிலான ராஷ்டிரிய ஜனதா தளத்தின் ஆட்சி பீகாரில் நடைபெற்றது. அதன் பிறகு 2005-ல் ஆட்சியைப் பிடித்த நிதிஷ் குமார், கடந்த 15 ஆண்டுகளாக பீகாரை ஆள்கிறார்.

2017-ம் ஆண்டு ராஷ்டிரிய ஜனதா தளம் மற்றும் காங்கிரஸ் கூட்டணியிலிருந்து விலகி பா.ஜ.க-வுடன் கைகோத்தார் நிதிஷ் குமார். கூட்டணியை மாற்றியபோதும், மாநிலத்தின் நலன்களிலும் அதன் வளர்ச்சியிலும் அவர் சமரசம் செய்துகொண்டதில்லை என்கிற இமேஜ் நிதிஷ் குமாருக்கு இருக்கிறது.

. மதுவிலக்கை அமல்படுத்தியது, குழந்தைகள் திருமணம் மற்றும் வரதட்சணைக்கு எதிராக மேற்கொண்ட பிரசாரங்கள் ஆகியவை பெண்கள் மத்தியில் நிதிஷ் குமாருக்கு செல்வாக்கை உயர்த்தியுள்ளன. இதனால், தற்போதைய தேர்தல் களம் தனக்குச் சாதகமாக இருப்பதாகக் கருதுகிறார் நிதிஷ் குமார். எனவே, நான்காவது முறையும் முதல்வர் பதவியைப் பிடித்துவிட வேண்டும் என்பதில் அவர் உறுதியாக இருக்கிறார். வரும் ஆகஸ்ட் 7-ம் தேதி தேர்தல் பிரசாரத்தைத் தொடங்குவதற்கு அவர் தயாராகிவிட்டார்.

. அதன்படி விர்ச்சுவல் கான்ஃபிரன்ஸ் பிரசாரக் கூட்டங்களை நடத்துவதற்கான ஏற்பாடுகள் மும்முரமாக நடக்கின்றன. `கட்சித் தலைவர்கள் ஓர் இடத்திலிருந்து பேச... மாநிலம் முழுக்க ஆங்காங்கே மண்டபங்கள் உள்ளிட்ட இடங்களில் சமூக இடைவெளியுடன் மக்களும் தொண்டர்களும் இந்தக் கூட்டங்களில் பங்கேற்பார்கள்’ என்று கூறப்படுகிறது. இதையும் குறிப்பிடும் எதிர்க்கட்சிகள், “ஆனால், ஓட்டுப் போடுவதற்கு மக்கள் நேரில்தானே கூட வேண்டும், வாக்குப்பதிவின்போது சமூக இடைவெளி எந்த அளவுக்குச் சாத்தியமாகும்?” என்று கேள்வி எழுப்புகின்றன.

பிரதமர் மோடியும் பீகாரில் தேர்தலை நடத்திவிட வேண்டும் என்கிற மனநிலையில் இருப்பதுபோலத்தான் தெரிகிறது. மூன்று வாரங்களுக்கு முன்பாக தொலைக்காட்சியில் உரையாற்றிய மோடி குரு பூர்ணிமா, துர்கா பூஜா, தீபாவளி, சாத் பூஜா, விநாயகர் சதுர்த்தி உள்ளிட்ட வரவிருக்கும் இந்துப் பண்டிகைகள் குறித்து குறிப்பிட்டார். இதில் சாத் பூஜா என்பது பீகாரின் பிரபலமான பண்டிகை. பீகார் சட்டமன்றத் தேர்தலை மனதில்வைத்தே பிரதமர் இவ்வாறு பேசியதாக அரசியல் பார்வையாளர்கள் கூறுகிறார்கள்.

அதற்கு முன்னதாக ஜூன் மாதம் பீகாரில் நடைபெற்ற ‘விர்ச்சுவல்’ பொதுக்கூட்டம் ஒன்றில், டெல்லியில் இருந்தபடி பேசிய மோடி, பீகார் மாநிலத்தின் ராணுவ வீரர்களின் வீரத்தைப் பாராட்டினார். இதுவும் சட்டமன்றத் தேர்தலுக்கான பா.ஜ.க-வின் முன்னோட்டம் என்கிறார்கள் அரசியல் பார்வையாளர்கள்.

மூன்று மாதங்கள் இருக்கின்றன... எதுவும் நடக்கலாம், பார்ப்போம்!

தேர்தலா… மக்களின் உயிரா? - பீகார் எழுப்பும் கேள்வி

ஆ.பழனியப்பன்Follow