Election bannerElection banner
Published:Updated:

நீலகிரி: நாம் தமிழரில் படுகு மொழி வேட்பாளர் - தமிழர்க்கு வாய்ப்பில்லையா எனக் கொதிக்கும் நிர்வாகிகள்

lavanya
lavanya

'தமிழர்கள் ஆளட்டும் மற்றவர்கள் வாழட்டும்' என்ற கொள்கை கொண்ட நாம் தமிழர் கட்சி,வாக்கு வங்கியைக் கருத்தில் கொண்டு படுகர் இனத்தைச் சேர்ந்த பெண் ஒருவரை வேட்பாளராக அறிவித்திருப்பது கட்சி நிர்வாகிகளிடையே கொதிப்பை ஏற்படுத்தியுள்ளது.

மலை மாவட்டமான நீலகிரியில் குறும்பர்,தோடர்,கோத்தர், இருளர், பணியர், காட்டுநாயக்கர் என 6 வகையான பழங்குடியின மக்கள் வாழ்ந்து வருகின்றனர். எண்ணிக்கை அடிப்படையில் பழங்குடி மக்கள்த் தொகை மிகக் குறைவு என்பதால், எந்த அரசியல் கட்சியும் இந்த பூர்வக்குடி மக்களுக்கு தேர்தலில் முன்னுரிமை அளிப்பதேயில்லை.

Ooty
Ooty

வாக்கு வங்கியை கருத்தில் கொண்டே குன்னூர், ஊட்டி பகுதிகளில் அதிகம் வாழும் படுகு மொழி பேசும் பெரும்பான்மை மக்களை வேட்பாளராக அறிவிக்கின்றனர். இந்த தேர்தலிலும் தி.மு.க மற்றும் அ.தி.மு.க ஆகிய முக்கிய கட்சிகள் ஊட்டி, குன்னூர் தொகுதிகளில் படுகு மொழி பேசும் மக்களில் இருந்தே வேட்பாளர்களை தேர்வு செய்துள்ளனர்.

வாக்கு வங்கி அரசியலைப் பின்பற்றியே குன்னூர் தொகுதியில் போட்டியிட படுகு மொழி பேசும் பெண் ஒருவரை நாம் தமிழர் கட்சியின் தலைமையும் தேர்வு செய்திருப்பது அக்கட்சி தொண்டர்களிடையே சர்ச்சையை ஏற்படுத்தியுள்ளது.

நாம் தமிழர் கட்சி சார்பில் போட்டியிடும் சட்டமன்ற வேட்பாளர் அறிமுகக் கூட்டம் சென்னை ஒய்.எம்.சி.ஏ மைதானத்தில் நடைபெற்றது.
நாம் தமிழர் கட்சி சார்பில் போட்டியிடும் சட்டமன்ற வேட்பாளர் அறிமுகக் கூட்டம் சென்னை ஒய்.எம்.சி.ஏ மைதானத்தில் நடைபெற்றது.

இது குறித்து நம்மிடம் பேசிய நாம் தமிழர் கட்சியின் நீலகிரி நிர்வாகி ஒருவர்,``நாம் தமிழர் கட்சியை மாற்றத்துக்கான ஒரு களமாக கருதி வந்தோம். நீலகிரியில் மொழி உரிமையை பாதுகாக்க வேண்டிய அவசியம் உள்ளது. பெரும்பாலான உறுப்பினர்கள் தமிழர்களாகவே உள்ளனர். ஆனால் மற்ற கட்சிகளைப் போலவே நமது கட்சியும் வாக்கு அரசியலை கணித்து படுகு மொழி பேசும் ஒருவருக்கு வாய்ப்பளித்துள்ளது பலரிடமும் கொதிப்பை ஏற்படுத்தியுள்ளது" என்றார்.

படுகர் இனத்தைச் சேர்ந்த குன்னூர் நாம் தமிழர் வேட்பாளர் லாவன்யாவிடம் பேசினோம்,`` கோத்தகிரி பகுதியைச் சேர்ந்த பேரகணி கிராமத்தைச் சேர்ந்த நான் கடந்த ஓராண்டாக கட்சியில் உள்ளேன். எனது கணவர் சில ஆண்டுகளாக கட்சிப் பணியாற்றி வருகிறார்.

lavanya
lavanya

ஒரு போதும் மாற்று மொழி பேசுபவராக என்னை நான்உணர்ந்ததில்லை. படுகு மொழி பேசும் எனக்கும் இந்த கட்சியில் முழு சுதந்திரம் உள்ளது. நீலகிரி மக்களின் குடிநீர் மற்றும் கல்வி வளர்ச்சிக்கு பங்காற்றுவேன்" என்றார்.

இந்த விவகாரம் குறித்து நாம் தமிழர் கட்சியின் மாவட்ட தலைவரும், ஊட்டி தொகுதியின் வேட்பாளருமான ஜெயக்குமாரிடம் பேசினோம்,``நீலகிரி மாவட்ட நாம் தமிழர் கட்சியின் முக்கிய பொறுப்புகளில் படுகு மொழி பேசும் மக்களும் நிர்வாகிகளாக உள்ளனர். தலைமை மட்டுமே தமிழராக இருந்தால் போதும். இது தமிழர்களுக்கு மட்டுமான கட்சி அல்ல" என்றார்.

Election bannerElection banner
அடுத்த கட்டுரைக்கு