Published:Updated:

செல்போன் ரீசார்ஜ் ரூ.249; சாமி உண்டியலுக்கு ரூ.51 - தேர்தல் செலவுக் கணக்கு வெளியிட்ட சுயேச்சை

துரை குணா
துரை குணா

6-வது இடம் வந்த சுயேச்சை வேட்பாளர் வெளியிட்ட தேர்தல் செலவுக் கணக்கு..!

புதுக்கோட்டை தொகுதியில் சுயேச்சை வேட்பாளராகப் போட்டியிட்டு 6-வது இடம் வந்த எழுத்தாளர் துரை குணா வெளிட்டுள்ள தேர்தல் செலவுக் கணக்கு பொதுமக்களுக்கு ஆச்சர்யத்தை ஏற்படுத்தியுள்ளது.

வெளியிட்ட தேர்தல் வரவு செலவு
வெளியிட்ட தேர்தல் வரவு செலவு

புதுக்கோட்டை மாவட்டம், கரம்பக்குடி அருகே குளந்திரான்பட்டு என்ற கிராமத்தைச் சேர்ந்தவர் துரை குணா. எழுத்தாளரான இவர், அந்தப் பகுதியில் நடக்கும் சமூக விரோத செயல்களுக்கு எதிராக சட்டரீதியாகப் போராடிவருபவர்.

நீதிமன்ற உத்தரவின்படி ஆக்கிரமிப்புகளை அகற்றத் துணியாத அதிகாரிகளுக்கு உணர்த்தும் வகையில், அவர்களுக்குப் பயிற்சி அளிப்பதாக போஸ்டர் போட்டதால், வழக்கு, கைது என்று எதிர்கொண்டாலும் அதன் மூலம் மக்கள் மத்தியில் விழிப்புணர்வு ஏற்படுத்தியவர்.

துரை குணா
துரை குணா

தனி நபராகப் போராடிவரும் துரை குணா நடந்து முடிந்த சட்டமன்றத் தேர்தலில் புதுக்கோட்டை தொகுதியில் பேனா சின்னத்தில் சுயேச்சையாகப் போட்டியிட்டார்.

476 வாக்குகள் பெற்று 6வது இடதுக்கு வந்த நிலையில் தேர்தலில் போட்டியிடக் கிடைத்த நன்கொடையையும், செலவு செய்த விவரத்தையும் சமூக ஊடகங்களில் வெளியிட்டிருக்கிறார்.

பிரமாணப் பத்திரம் தயார் செய்ய வழக்கறிஞர் செலவு ரூ.2,000, வேட்பு மனு தாக்கல் செய்ய கட்டணம் ரூ.5,000, 5,000 துண்டுப்பிரசுரங்கள் அடிக்க செலவு ரூ.7,000, வேட்பாளர் மீதான வழக்கு விவரம் பற்றி நாளிதழில் விளம்பரம் செய்ய செலவு ரூ.6,000, மொபைல் ரீசார்ஜ் செய்த செலவு ரூ.249, கோயிலில் சாமி கும்பிட்டு உண்டியலில் போட்டது ரூ.51, வாக்குச் சேகரிக்க சென்றபோது பெட்ரோல் செலவு செய்தது ரூ.3,450, வாக்குச் சேகரிக்க வந்தவருக்கு முந்திரிப்பருப்பு வாங்கிக் கொடுத்த செலவு ரூ.230 என்று தெரிவித்திருப்பவர், டீ, சாப்பாடு செலவு ஏதுமில்லை. ஆங்காங்கு மக்கள் கொடுத்ததையே சாப்பிட்டோம் என்று தெரிவித்துள்ளார்.

கிடைத்த நன்கொடை ரூ.27,650, செலவு ரூ.23,980 என்று தெரிவித்து நன்கொடையாளர்களின் பெயரையும் குறிப்பிட்டுள்ளார்.

முக்கியக் கட்சிகள் பிரசார காலங்களில் தினசரி டீக்கு மட்டும் செலவு செய்யும் தொகையில் ஒரு தேர்தலையே சந்தித்திருக்கிறார் துரை குணா.

புதுக்கோட்டை: 2 பேருக்கு அமைச்சர் பதவி - 30 ஆண்டுகால ஏக்கத்திற்கு முற்றுப்புள்ளி

துரை குணாவிடம் பேசினோம். ``நண்பர்களின் உதவியால் இவ்வளவுதான் செலவு செய்தோம். அதற்கு மேல் வேறு எந்தத் தேவையும் இருக்கவில்லை. மக்களின் அடிப்படைத் தேவைகளை நிறைவேற்றித்தருவதாக பிரசாரம் செய்தேன். மொத்தம் 21 பேர் போட்டியிட்டோம். எனக்கு 476 பேர் வாக்களித்துள்ளனர். தே.மு.தி.க., அ.ம.மு.க.வு-க்கு அடுத்தபடியாக ஆறு இடங்களில் என்னை வைத்தனர். இதுவே பெரிய வெற்றிதான்.

பெரிய கட்சிகள் கோடிக்கணக்கில் செலவு செய்வது ஒருபக்கம் என்றால், சில சுயேச்சைகள்கூட பல லட்சம் ரூபாய் செலவு செய்வது அனைவருக்கும் தெரியும். அப்படிச் செலவு செய்தும் சிலர் சொற்ப வாக்குகளே பெற்றார்கள். ஆனால், மக்கள் என் மீதும் நம்பிக்கைவைத்து வாக்களித்திருப்பது மகிழ்ச்சி அளிக்கிறது. நம்பிக்கையை ஏற்படுத்துகிறது.

தவறு செய்யும் அரசு அதிகாரிகளுக்கு எதிராகக் குரல் கொடுத்துவருபவன் என்றாலும், தேர்தலில் போட்டியிடும்போது அதிகாரிகள் எந்த இடையூறும் செய்யவில்லை. மாற்று அரசியலை இப்படியும் தொடங்கலாம்" என்றார்.

அடுத்த கட்டுரைக்கு