இலங்கை நாடாளுமன்றத் தேர்தல் - தமிழ் வாக்குகள் சிதறுமா... திரளுமா?

ஆ கஸ்ட் 5-ம் தேதி நடக்கவிருக்கும் இலங்கை நாடாளுமன்றத் தேர்தலில் தமிழ் வாக்குகளைச் சிதறடிக்கும் ஏற்பாடுகள் அதிகரித்துள்ளன. ஏழு மாதங்களுக்கு முன்னர் நடந்த ஜனாதிபதித் தேர்தலில் தமிழ் மக்கள் திரண்டு ராஜபக்சேக்களுக்கு எதிராக வாக்களித்தனர். 80 சதவிகிதத்துக்கும் குறையாத வாக்களிப்பு. அது இனரீதியான ஒரு வாக்களிப்பு அலை! . அந்த இன அலைக்குள் வடக்கில் அரசுக்கு ஆதரவாகச் செயல்பட்ட டக்ளஸ் தேவானந்தா, அங்கஜன் போன்றோரின் வாக்கு வங்கிகளும், கிழக்கில் பிள்ளையான், வியாழேந்திரன் போன் றோரின் வாக்கு வங்கிகளும் கரைந்துபோய்விட்டன. அவை தமிழ்த் தேசியக் கூட்டமைப்பு கேட்டுக் கொண்டதற்காக சஜித் பிரேமதாஸாவுக்கு விழுந்த வாக்குகள் அல்ல. `ராஜபக்சேவைத் தோற்கடிக்க வேண்டும்’ என்பதற்காக விழுந்த வாக்குகள். இவ்வாறு ஏழு மாதங்களுக்கு முன்னர் ஓர் இனமாகத் திரண்டு நின்ற மக்களை, இந்த முறை நாடாளுமன்றத் தேர்தலில் கட்சிகளும் சுயேச்சைக் குழுக்களும் கொள்கை, சாதி, சமயம், பிரதேசவாதம் போன்ற இன்னபிற அம்சங்களின் பெயரால் பிரிக்க எத்தனிக்கின்றன.

. இந்த முறை அதிக சுயேச்சைக் குழுக்கள் போட்டியிடுகின்றன. இவற்றுள், வடக்கில் இரண்டு சுயேச்சைக் குழுக்கள் மதப் பின்னணிகளைக் கொண்டவை. ஒரு சுயேச்சைக் குழு இந்துமத குருக்களால் உருவாக்கப்பட்டது. மற்றொன்றின் பின்னணியில் சில கிறிஸ்தவ மதகுருக்கள் இருப்பதாக அவதானிக்கப்பட்டுள்ளது. இவை தவிர இரண்டு சுயேச்சைக் குழுக்கள் சாதியரீதியாக தாழ்த்தப்பட்ட மக்களை அல்லது விளிம்புநிலை மக்களை இலக்கு வைக்கின்றன. ஒன்று, யாழ்ப்பாணத்திலும் மற்றொன்று கிளிநொச்சியிலும் போட்டியிடுகின்றன.

. கிழக்கில் பிள்ளையானின், `தமிழ் மக்கள் விடுதலைப் புலிகள் கட்சி’ போட்டியிடுகிறது. வடக்கின் மேலாண்மையை நிராகரித்தும், முஸ்லிம்களுக்கு எதிராகவும் செயல்படும் இந்தக் கட்சி இறுதியில் ராஜபக்சேக்களைச் சென்றடையும் என்று எதிர்பார்க்கப்படுகிறது. அம்பாறை மாவட்டத்தில் புலிகள் இயக்கத்தின் முன்னாள் தளபதி கருணா, ராஜபக்சேக்களின் கட்சி வேட்பாளராகப் போட்டியிடுகிறார். அவரும் அங்கு தமிழ் வாக்குகளை உடைப்பார்.

. இவை மட்டுமல்ல, தமிழ்த் தேசியக் கூட்டமைப்பு, கஜேந்திரக்குமாரின் தலைமையிலான தமிழ்த் தேசிய மக்கள் முன்னணி, விக்னேஸ்வரன் தலைமையிலான தமிழ் மக்கள் தேசியக் கூட்டணி என தமிழ்த் தேசிய நிலைப்பாட்டைக்கொண்ட மூன்று கட்சிகள் வடக்கில் போட்டியிடுகின்றன. இதனால் தமிழ் வாக்குகள் அங்கேயும் மூன்றாக உடையும். தமிழ்த் தேசியக் கூட்டமைப்புக்கு மாற்றான மற்ற இரண்டு கட்சிகளும் பெருமளவு வடக்கை மையமாகக்கொண்டவை. கிழக்கில் அவற்றுக்கு பெருமளவுக்குப் பிடியில்லை. வடக்கிலும் கிழக்கிலும் பரவிக் காணப்படும் ஒரே கட்சி தமிழ்த் தேசியக் கூட்டமைப்புதான். ஆனால், கடந்த 11 ஆண்டுகளாக அந்தக் கட்சி படிப்படியாகச் சிதைந்துவருகிறது.

இப்போது தமிழ்த் தேசியக் கூட்டமைப்புக்குள் உட்கட்சிப் பூசல்கள் அதிகரித்துவிட்டன. கட்சியின் தலைவரான சம்பந்தருக்கு வயதாகிவிட்டது. அவருக்கு அடுத்தபடியாக கட்சித் தலைமையை ஏற்கலாம் என்று நம்பப்படும் சுமந்திரனுக்கு எதிராகவும் கட்சிக்குள் ஒரு புதிய திரட்சி ஏற்பட்டி ருக்கிறது. மூப்பின் அடிப்படையில் கட்சித் தலைமைக்கு வர வேண்டிய மாவை சேனாதிராஜா வுக்கு தலைமைப் பண்புகள் குறைவு. இதனால் கட்சிக்குள் ஏற்பட்டிருக்கும் உள் முரண்பாடுகளை அவரால் கையாள முடியவில்லை.

. தேசியப் பட்டியலில் யாருக்கு முதன்மையை வழங்குவது என்பதிலும் முரண்பாடுகள் அதிகரித்துள்ளன. இது விடயத்தில் தனக்குத் தொழில் போட்டியாக வரக்கூடிய பிரபல சட்டத்தரணி (வழக்கறிஞர்) ஒருவரை - அவர் கட்சியின் அமைப்பாளரும்கூட - சுமந்திரன் முன்னிலைப்படுத்த விரும்பவில்லை. அவர் வேறொரு பெண் சட்டத்தரணியை முன்னிலைப் படுத்துகிறார். இதனாலும் உட்கட்சி பூசல்கள் அதிகரித்துள்ளன. கட்சி உறுப்பினர்கள் தங்களது முரண்பாடுகளைப் பகிரங்கமாக வெளிப்படுத்து கின்றனர். பகிரங்கமாகக் கூட்டு சேர்கின்றனர். பகிரங்கமாக, சமூக வலைதளங்களில் ஒருவரை யொருவர் தாக்கி எழுதுகின்றனர். கட்சித் தலைமை யால் அவர்களைக் கட்டுப்படுத்த முடியவில்லை.

. இவ்வாறு பிரதான தமிழ்க் கட்சியான கூட்டமைப்பு உட்கட்சி முரண்பாடுகளால் பலமிழந்து காணப்படும் சூழலில், அந்த முரண்பாடு களை வெற்றிகரமாகக் கையாள வேண்டிய மாற்று அணிக்குள்ளும் ஒற்றுமையில்லை. இதன் விளைவாக, இம்முறை தமிழ் வாக்காளர்கள் யாருக்கு வாக்களிப்பது என்று திகைத்துப் போயுள்ளனர்.

அதேசமயம் தென்னிலங்கையில் ராஜபக்சேக்கள் சிங்கள வாக்குகளைத் திரட்டி வருகிறார்கள். கொரோனா வைரஸுக்கு எதிராக ராணுவத்தை முன்னிறுத்தி, வைரஸ் தொற்றை குறிப்பிடத்தக்க அளவுக்குக் கட்டுப்படுத்தியிருக்கின்றனர். கொரோனா தொற்றால் இதுவரை மொத்தம் 11 பேர்தான் இறந்திருக்கின்றனர். இதனால், விடுதலைப் புலிகளை வெற்றிகொண்ட ராணுவம் இப்போது வைரஸையும் வெற்றிகரமாகக் கட்டுப்படுத்தியிருப்பதாக அவர்கள் மக்களுக்குக் காட்டுகிறார்கள். அந்த வெற்றியைத் தேர்தல் வெற்றியாக மடைமாற்ற முயல்வார்கள். நாட்டை மேலும் ராணுவமயப்படுத்துகின்றனர். எதிர்க்கட்சியான யூ.என்.பி இரண்டாக உடைந்து காணப்படுகிறது. ஏற்கெனவே அரசுத் தலைவர் (ஜனாதிபதி) தேர்தலில் ராஜபக்சேக்கள் பெற்ற வெற்றியின் அலை இப்போதும் ஓயாமல் இருக்கிறது.

எனவே, தென்னிலங்கையில் ராஜபக்சேக்கள் சிங்கள வாக்குகளைச் சவால்கள் அதிகமின்றித் திரட்டும் வேளையில், தமிழ்ப் பகுதிகளில் வாக்குகள் சிதறடிக்கப்படலாம் என்ற யூகங்கள் அதிகரித்துவருகின்றன. ஏழு மாதங்களுக்கு முன்னர் ஓர் இனமாகத் திரண்டு நின்ற மக்கள் ஆகஸ்ட் 5-ம் தேதி சாதியின் பெயரால், சமயத்தின் பெயரால், பிரதேசவாதத்தின் பெயரால் சிதறப்போகிறார்களா அல்லது ஒரே இனமாகத் திரண்டு நிற்கப்போகிறார்களா?

நிலாந்தன்

இலங்கை நாடாளுமன்றத் தேர்தல் - தமிழ் வாக்குகள் சிதறுமா... திரளுமா?

ஜூனியர் விகடன் டீம்