உங்களுக்கு ஒன்று தெரியுமா? கரிச்சான் குருவி, வல்லூறு உட்பட கிட்டத்தட்ட பத்துக்கும் மேற்பட்ட பறவைகளின் சத்தத்தை அப்படியே தன் குரலில் மிமிக்ரி செய்யும். கரிச்சான் குருவிக்கு யாரும் பேச சொல்லிக் கொடுப்பதில்லையே...'' என்றவர், இன்னும் சில பறவைகள் குறித்த இன்ட்ரஸ்டிங்கான தகவல்களையும் பகிர்ந்துகொண்டார்.

``நம் ஊரில் ஆள்காட்டி குருவி என்றொரு பறவை இருக்கிறது. அது இருக்கும் பகுதியில் பறவைகளை வேட்டையாடும் எதிரிகளோ அல்லது மனிதர்களோ நுழைந்துவிட்டால், உடனே ஒலியெழுப்பி மற்ற பறவைகளுக்குத் தகவல் சொல்லிவிடும். அதனாலேயே அதை ஆள்காட்டிப் பறவை என்று அழைக்கிறோம். பிரிட்டிஷ்காரர்கள் இந்தியாவில் இருக்கும்போது இந்தப் பறவையை 'did u do it bird' என்று அழைத்திருக்கிறார்கள்.

காரணம் என்ன தெரியுமா? அதனுடைய கி... கி கீ க்... குரல் did u do it என்பது போலவே கேட்கும் என்பதால்தான். கூகுளில் ஆள்காட்டிக் குருவியின் குரலைக் கேட்டீர்களென்றால், `அட... ஆமாம்' என்போம். இதேபோல அக்கா குருவியையும் 'brain fever bird' என்று அழைப்பார்கள். காரணம், இந்தக் குருவியின் சத்தம் பிரெய்ன் ஃபீவர்... பிரெய்ன் ஃபீவர்... என்று சொல்வதுபோலவே நமக்குக் கேட்கும். கடவுளை நாம் பார்த்ததில்லை. ஆனால், கடவுளுக்கு மனித முகம்தானே கொடுத்திருக்கிறோம். அப்படி எல்லாவற்றையும் மனித கண்ணோட்டத்தில் பார்க்கப் பழகிவிட்டதால், பறவைகள் எழுப்பும் ஒலிகளும் நாம் பேசும் வார்த்தைகள் போலவே நமக்குக் கேட்கின்றன'' என்று சொல்லி முடித்தார் முருகவேள்.