Published:Updated:

தமிழ்நாட்டுக்கு மியாவாகி காடு வளர்ப்பு ஏற்றதா? வனக்கல்லூரி முதல்வரின் விளக்கம்!

மியாவாகி காடு வளர்ப்பு முறை
பிரீமியம் ஸ்டோரி
மியாவாகி காடு வளர்ப்பு முறை ( BemanHerish )

காடு

தமிழ்நாட்டுக்கு மியாவாகி காடு வளர்ப்பு ஏற்றதா? வனக்கல்லூரி முதல்வரின் விளக்கம்!

காடு

Published:Updated:
மியாவாகி காடு வளர்ப்பு முறை
பிரீமியம் ஸ்டோரி
மியாவாகி காடு வளர்ப்பு முறை ( BemanHerish )

21-ம் நூற்றாண்டு தொடங்கியதிலிருந்து காடு வளர்ப்பு என்பது வருமானம் தரக்கூடிய மரங்களை வளர்ப்பது மட்டுமன்றி, சுற்றுச் சூழல் பாதுகாப்பு, வளிமண்டலத் திலுள்ள கரிம வாயு அளவைக் குறைத்தல், நீர்வளத்தைப் பெருக்குதல் போன்ற பல்வேறு காரணங்களுக்காக மக்கள் காடு வளர்ப்பில் ஈடுபடத் தொடங்கினார்கள்.

இந்திய நகர்ப்புறங்கள் கடந்த 20 ஆண்டுகளில் முந்தையை நூற்றாண்டு களைவிட பல மடங்கு அதிக வெப்பத்தை எதிர்கொள்கின்றன. இப்படி அதிக அளவிலான வெப்பத்தை நகர்ப்புறங்கள் எதிர்கொள்வதற்குப் பசுமை இல்ல வாயுக்கள் (Green House Gas) அதிகமாக வெளியிடப்படுவது முதன்மை காரணமாகச் சொல்லப்பட்டாலும், அதைக் கட்டுக்குள் வைக்கப் போதுமான பசுமைப் போர்வை இல்லாததும் ஒரு முக்கியக் காரணம்.

இந்தப் பிரச்னையைச் சரிசெய்வதற்காக இந்தியா தன்னுடைய மொத்த நிலப்பரப்பில் 33 சதவிகிதத்துக்குக் காடுகளை உருவாக்கப் போவதாக ஐக்கிய நாடுகள் அமைப்பினுடைய காலநிலை மாற்ற உடன்படிக்கையில் உறுதியளித்தது. இந்தியாவின் சுற்றுச்சூழலைப் பாதுகாக்க வேண்டுமென்ற நோக்கத்தோடு, அரசு, தனியார் அமைப்புகள் மட்டுமன்றி, தனிநபர்களும் பெருவாரியாக இணைந்து மரம் வளர்ப்பில் ஈடுபடத் தொடங்கியுள்ளனர். இதில், நகர்ப்புறக் காடு வளர்ப்பில் சமீப காலமாகப் பிரபலமாகி வரும் ஒரு முறைதான் ‘மியாவாகி காடு வளர்ப்பு முறை.’ அகிரா மியாவாகி என்ற ஜப்பானிய தாவரவியல் ஆய்வாளர் உருவாக்கிய காடு வளர்ப்பு முறை, பின்னர், அவருடைய பெயரிலேயே மியாவாகி காடு வளர்ப்பு என்று அழைக்கப்படுகிறது.

மியாவாகி காடு வளர்ப்பு முறை
மியாவாகி காடு வளர்ப்பு முறை


ஒரு காட்டை உருவாக்க வேண்டு மெனில், அதற்குச் சராசரியாக ஐந்து முதல் பத்து ஆண்டுகளாவது ஆகும். ஆனால், இன்றுள்ள சூழலியல் நிலைமையைச் சரிசெய்வதற்கு, காடுகளின் பரப்பை விரைவாகவே அதிகப்படுத்த வேண்டிய அவசிய மாகிறது. அதைச் செய்வதற்கு, மியாவாகி காடு வளர்ப்பு முறை உதவுவதாகக் காடு வளர்ப்பில் ஈடுபடும் தன்னார்வலர்கள் கூறுகின்றனர்.

இடைவெளியற்ற அடர்நடவு முறையில் மரங்களை நட்டு வளர்க்கும் இந்த முறையைத் தாவரவியலாளர் அகிரா மியாவாகி கண்டுபிடித்தார். அவருடைய கூற்றுப்படி, குறைவான பரப்பளவில் அதிக மரங்களை நட்டு வளர்க்க முடியும். அப்படி வளரும் மரங்கள் அதிவேகமாக வளர்வதையும் அவர் நிரூபித்தார். இவருடைய இந்தக் காடு வளர்ப்பு முறை, தமிழ்நாட்டிலும் பிரபலமாகி வருகிறது.

தமிழ்நாட்டின் பெரும்பான்மையான பகுதிகளில் நீர்ப்பற்றாக்குறை அதிகமாக உள்ளது. அப்படியிருக்கும்போது, அங்கெல்லாம் மியாவாகி முறையில் காடு வளர்ப்பது பொருத்தமாக இருக்காது.



திண்டிமாவனம் என்ற அமைப்பினர் திண்டுக்கல் மாவட்டத்தில் மியாவாகி முறையில் காடு வளர்ப்பில் ஈடுபட்டு வருகின்றனர். அந்த அமைப்பைச் சேர்ந்த பேராசிரியர் ராஜாராமிடம் பேசியபோது, “இந்தியாவின் நிலப்பரப்பு அதிகம். இதற்கேற்றவாறு இங்கு மக்கள் தொகை அடர்த்தியும் அதிகம். அதனால் நகர்ப்புறங்களில் காடுகளை உருவாக்குவதற்குப் போதுமான இட வசதி கிடைப்பதில்லை. ஆகவே அங்கு மியாவாகி முறையைப் பின்பற்றுவது அவசியமாகிறது.

சாதாரண முறையில் வீட்டுக்கொரு மரம் வளர்ப்பதாக வைத்துக் கொள்வோம். 2,400 சதுர அடிக்கு ஒரு வீடு உள்ளது என்றால், அங்கு ஒரு மரம் இருந்தால் சரியாக இருக்கும். ஆனால், நகரங்களில் அடுக்குமாடிக் குடியிருப்புகள் தானே அதிகம். ஒரு குறிப்பிட்ட சதுர மீட்டருக்குள் பல மாடிகள் கட்டப்பட்டு, அதில் பல குடும்பங்கள் வசிக்கின்றன. அந்த வீடுகள் அனைத்திலிருந்தும் குளிர்சாதன இயந்திரங் களின் பயன்பாடு உட்பட இன்னும் பல நடவடிக்கைகள் மூலம் பசுமை இல்ல வாயுக்கள் வெளியிடப்படுவது அதிகமாகவே நடைபெறுகிறது. அப்படி வெளியாகும் பசுமை இல்ல வாயுக்களைக் கட்டுப்படுத்த, கிரகித்துக்கொள்ளப் போதுமான மரங்களை வழக்கமான முறையில் வளர்த்தால், அவ்வளவு மரங்களை வளர்க்க இடவசதி போதாது.

ராஜாராம், பார்த்திபன்
ராஜாராம், பார்த்திபன்


நகர்ப்புறங்களில் வெளியிடுகிற பசுமை இல்ல வாயுக்களின் அளவு அதிகமாகவும் அவற்றைக் கிரகித்துக்கொள்ளத் தேவையான மரங்களின் எண்ணிக்கை குறைவாகவும் இருந்தால், வளிமண்டலத்தில் கரிம வாயுவின் அளவைக் குறைக்க முடியாது. சாதாரண முறையில் மரம் வளர்த்தால், ஒரு வீதிக்கு அதிகபட்சம் 20 மரங்கள் வளர்க்கலாம். ஆனால், வேப்பமரம், புங்க மரம் போன்ற நாட்டு மரங்களை மியாவாகி முறையில் வளர்க்கும்போது, அதற்குத் தேவைப்படும் நிலம் மிகக் குறைவே. அதாவது, 120 சதுர அடியிலேயே 10 மரங்களை வளர்க்க முடியும்.

அரச மரமும் ஆலமரமும் மெதுவாகத்தான் வளரும் என்பது அனைவரும் அறிந்ததே. ஆனால், மியாவாகி முறையில் வளர்க்கும்போது, சராசரியாக இரண்டு ஆண்டுகளில் கொடுக்கும் வளர்ச்சியை, மியாவாகி முறையில் ஓராண்டில் அடைகின்றன. அந்த மரங்களின் பலன் களையும் மிகக் குறைந்த காலத்துக்குள் நம்மால் கண்கூடாகப் பார்க்க முடிகிறது” என்று கூறினார்.

தமிழ்நாட்டுக்கு மியாவாகி காடு வளர்ப்பு ஏற்றதா? 
வனக்கல்லூரி முதல்வரின் விளக்கம்!

மியாவாகி காடு வளர்ப்பு முறை இது போன்ற நன்மைகளை வழங்கினாலும், ‘தமிழ்நாட்டின் நிலப்பரப்பில் மியாவாகி முறையை அனைத்து இடங்களிலும் மேற்கொள்ள முடியாது’ என்கிறார் மேட்டுப் பாளையத்தில் உள்ள வனக்கல்லூரி முதல்வர் முனைவர் பார்த்திபன். அவரிடம் பேசியபோது, “ஒரு காடு எதற்காக வளர்க்கப் படுகிறது என்பதை நாம் முதலில் கவனிக்க வேண்டும். மியாவாகியாக இருந்தாலும் சரி வேறு முறையாக இருந்தாலும் சரி, ஒரு காடு வளர்க்கப்படுவதன் நோக்கம்தான் முதன்மையானது. ஜப்பானில் வெள்ளம், மண் அரிப்பைத் தடுக்க வேண்டும், மண் வளத்தைப் பாதுகாக்க வேண்டும் என்ற நோக்கத்தோடு மியாவாகி அந்த முறையை மேற்கொண்டார்.

அதையே தமிழ்நாட்டிலும் நம்மால் செய்ய முடியாது. ஒரு நிலத்துக்கு ஏற்றவாறு, அந்த நிலத்தின் அமைப்புக்கு ஏற்றவாறு காடு வளர்க்க வேண்டும். இங்கு, வெள்ளம், மண் அரிப்பைக் கட்டுப்படுத்துவது மட்டுமே ஒரு காடு வளர்க்கப்படுவதன் நோக்கமாக இருப்பதில்லை. சுற்றுச்சூழலைப் பாதுகாப்பது, மண் வளத்தை மேம்படுத்துவது, வருமானத்துக்கு வழி செய்வது என்று பல்வேறு நோக்கங்கள் உள்ளன. அவை அனைத்துக்கும் மியாவாகி முறையை அப்படியே கடைப்பிடிக்க முடியாது. அடர் காடுகளைப் பொறுத்தவரை, எங்கு மரங்கள் அதிகமாக இருக்கிறதோ அங்கு நீரின் தேவையும் அதிகமாக இருக்கும். தமிழ்நாட்டின் பெரும்பான்மை பகுதிகளில் நீர்ப்பற்றாக்குறை அதிகமாக உள்ளது. அப்படியிருக்கும்போது, அங்கெல்லாம் மியாவாகி முறையில் காடு வளர்ப்பது பொருத்தமாக இருக்காது.

மியாவாகி காடு வளர்ப்பு முறை
மியாவாகி காடு வளர்ப்பு முறை


நகர்ப்புறக் காடு வளர்ப்பு (Urban Forestry) என்பதைக் கடந்த நூறாண்டுகளாகக் கடைப்பிடித்து வருகிறோம். பூக்கும் மரங்கள், அதிக கிளைகள் மற்றும் இலைகளைக் கொண்ட மரங்கள், வேகமாக வளரக்கூடிய மரங்கள் போன்றவற்றை நகர்ப்புறங்களில் இந்த முறையில் வளர்க்கலாம். நகரங்களின் இடவசதிக்கு ஏற்றவாறு இந்த முறை மேற்கொள்ளப்படுகிறது. அடர் நடவு முறையையே அனைத்து நிலங்களிலும் மேற்கொள்ள முடியாது. தண்ணீரே இல்லாத நிலப்பகுதிகளிலும் அடர் நடவு முறையில் காடு வளர்ப்பது, நீர்ப் பற்றாக்குறையைத்தான் அதிகப்படுத்தும்.

ஜப்பானில், வெள்ளம், மண் அரிப்பு போன்ற பிரச்னைகள் அதிகமாக இருந்த பகுதிகளில், அதைத் தடுப்பதற்காகக் குட்டை மரம், நெட்டை மரம், செடிகள் என்ற பல்வேறு வகையான தாவரங்களை, மியாவாகி அடர்நடவு முறையில் நட்டு வளர்த்தார். அதன்மூலம் அந்த மண் வளமும் நீர் வளமும் பாதுகாக்கப்பட்டது. அதையே கொண்டு வந்து, திறந்தவெளிக் காடுகளைக் கொண்ட நிலப்பகுதிகளிலும் மேற்கொண்டால் எந்தப் பயனும் கிடைக்காது. மியாவாகி காடு வளர்ப்பு என்பது நல்ல நடவு முறைதான். ஆனால், அதை எந்த நிலத்தில் மேற்கொள்கிறோம் என்பது முக்கியம்” என்று கூறினார்.

பொதுவாக, மரம் வளர்த்தல் என்று வந்துவிட்டால், எந்த மரத்தை எங்கு வளர்க்க வேண்டும் என்பதைச் சரியாகப் புரிந்து கொண்டு, நிலத்துக்கேற்ற மரங்களை வளர்ப்பதுதான் சரியான பலன்களைத் தரும் என்று விஞ்ஞானிகள் வலியுறுத்தி வருகின்றனர். அதேபோல், மியாவாகி முறையையும் அனைத்து நிலப்பகுதிகளிலும் அப்படியே மேற்கொள்ளாமல், நிலத்துக்கு ஏற்ற காடு வளர்ப்பு முறையில் ஈடுபட வேண்டும். அப்போதுதான் நாம் என்ன நோக்கத்தோடு காடு வளர்க்கிறோமோ அதற்கான பலன்களையும் அடையமுடியும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism