Published:Updated:

பொங்கல் விழாவில் பாரம்பர்ய உடையணிந்து சித்த மருத்துவக் கல்லூரி மாணவிகள் அசத்தல் நடனம்!

பொங்கல் விழாவில் பாரம்பர்ய உடையணிந்து சித்த மருத்துவக் கல்லூரி மாணவிகள் அசத்தல் நடனம்!
பொங்கல் விழாவில் பாரம்பர்ய உடையணிந்து சித்த மருத்துவக் கல்லூரி மாணவிகள் அசத்தல் நடனம்!

நெல்லை அரசு சித்த மருத்துவக் கல்லூரியில் தமிழர் திருநாளான பொங்கல் விழா கொண்டாட்டத்தையொட்டி மாணவ- மாணவிகள் சமத்துவப் பொங்கலிட்டு உற்சாகமாக நடனமாடி பொங்கலைக் கொண்டாடி மகிழ்ந்தார்கள். 

தமிழர் திருநாளான தைத்திருநாள் வரும் 15-ம் தேதி கொண்டாடப்படுகிறது. அதையொட்டி கல்லூரிகள், பள்ளிகளில் சமத்துவப் பொங்கலிட்டு மாணவ -மாணவிகள் கொண்டாடி வருகின்றனர். இந்த நிலையில், நெல்லையில் உள்ள அரசு சித்த மருத்துவக் கல்லூரியில் பொங்கல் விழா உற்சாகமாகக் கொண்டாடப்பட்டது. இதற்காகக் கல்லூரி முழுவதும் தோரணங்கள் கட்டி வண்ணக் கோலமிட்டு சிறப்பான வகையில் அலங்காரம் செய்யப்பட்டிருந்தது. 

பொங்கல் விழாவைக் கொண்டாடும் வகையில் மாணவிகள் சேலையிலும் மாணவர்கள் வேட்டி அணிந்தும் வந்திருந்தனர். கல்லூரிப் பேராசிரியர்களும் பாரம்பர்ய உடைகளான பட்டு வேட்டி, சட்டை மற்றும் பட்டுச் சேலைகள் அணிந்தபடி விழாவில் பங்கேற்றனர். கல்லூரி வளாகத்தில் 11 புது மண்பானைகளில் புத்தரிசியிட்டு பொங்கலிடப்பட்டது. பின்னர், தமிழர்களின் வீரத்தைப் போற்றும் வகையில் சிலம்பம் உள்ளிட்ட நிகழ்ச்சிகள் நடந்தன.

கல்லூரி விழாவில், பறை இசை இசைக்கப்பட்டதுடன் அதன் தாளத்துக்கு ஏற்ப மாணவ, மாணவிகள் ஆடினார்கள். அத்துடன், பொய்க்கால் குதிரை ஆட்டம், கும்மி என கல்லூரி வளாகம் முழுவதும் களைகட்டியிருந்தது. பின்னர் ஒருவருக்கொருவர் பொங்கல் வாழ்த்துகளைத் தெரிவித்துக்கொண்டனர். இந்த விழாக் கொண்டாட்டத்தில், கல்லூரி வளாகத்தில் உள்ள சித்த மருத்துவமனை நோயாளிகளும் பங்கேற்று வாழ்த்துகளைப் பகிர்ந்து கொண்டனர்.