Published:Updated:

நம்மாழ்வார் வழியில் ஆரோக்கிய விலாஸ்!

நம்மாழ்வார் வழியில் ஆரோக்கிய விலாஸ்!
பிரீமியம் ஸ்டோரி
News
நம்மாழ்வார் வழியில் ஆரோக்கிய விலாஸ்!

இயற்கை

இயற்கை வேளாண் விஞ்ஞானி நம்மாழ்வார் போன்றோர், இயற்கை விவசாயம், இயற்கை சார்ந்த வாழ்வியல், பாரம்பர்ய உணவுகள் குறித்து தொடர்ந்து பேசி வந்ததால்... மக்களிடம் உடல் ஆரோக்கியம், பாரம்பர்யம் ஆகியவை மீதான விழிப்பு உணர்வு அதிகரித்து வருகிறது. 

நம்மாழ்வார் வழியில் ஆரோக்கிய விலாஸ்!

அதனால், பலரும் இயற்கை உணவுகளுக்கு மாற ஆரம்பித்துள்ளனர். அதனைத் தொடர்ந்து, பாரம்பர்ய இயற்கை உணவுகளைத் தயாரித்து வழங்கும் இயற்கை உணவகங்களும் அதிகரித்துக்கொண்டே வருகின்றன. அப்படி ஆரம்பிக்கப்பட்டிருக்கும் ஓர் இயற்கை உணவகம்தான், ஆரோக்கிய விலாஸ். இந்த உணவகத்தின் உரிமையாளர் பெருமாள். திரைப்படத்துறையில் இருக்கும் இவர், கடந்த 2015-ம் ஆண்டு ‘திலகர்’ எனும் திரைப்படத்தை இயக்கியுள்ளார். நம்மாழ்வார் வாழ்க்கை குறித்த ஒரு திரைப்படத்தை எடுக்கும் முயற்சியில் ஈடுபட்டுள்ளார், பெருமாள்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
நம்மாழ்வார் வழியில் ஆரோக்கிய விலாஸ்!

அத்திரைப்படத்துக்கான விஷயங்களைச் சேகரிக்கும் முயற்சியில் ஈடுபட்ட சமயத்தில்தான் இவருக்கு இயற்கை உணவகம் தொடங்குவதற்கான யோசனை வந்துள்ளது. சென்னை, கோடம்பாக்கம் பவுர் ஹவுஸ் பகுதியில் இருக்கிறது, ‘ஆரோக்கிய விலாஸ்’. நம்மாழ்வார் சிறப்பிதழுக்காகப் பெருமாளைச் சந்தித்தோம்.

“இயற்கை விவசாயம், பாரம்பர்ய உணவு முறை ஆகியவற்றுக்காக உழைத்தவர்களில் முக்கியமானவர் நம்மாழ்வார். அவர் மேல் ஏற்பட்ட ஈர்ப்பின் காரணமாகத்தான் இந்த உணவகத்தைத் தொடங்கினோம். நாங்கள், இந்த உணவகத்துக்கு வயதானவர்கள் மட்டும்தான் வருவார்கள் என்று எண்ணினோம். ஆனால், எங்கள் வாடிக்கையாளர்களில் பெரும்பாலானோர், 18 முதல் 30 வயதுக்குட்பட்ட இளைஞர்கள்தான். 

நம்மாழ்வார் வழியில் ஆரோக்கிய விலாஸ்!

இயற்கை உணவு முறையைக் கைவிட்டுட்டு நாகரிக உணவு முறைக்கு மாறியதுதான், இன்று பெருகியிருக்கும் நோய்களுக்கு முக்கியக் காரணம். பெருநகரங்களில் இதுகுறித்த விழிப்பு உணர்வு தற்போது பெருகி வந்தாலும், அனைத்துத் தரப்பினருக்கும் விழிப்பு உணர்வு ஏற்படுத்த வேண்டியது அவசியம். அதற்கான முயற்சிதான் இது.

ஆரம்பத்தில் 12,000 ரூபாய்தான் முதலீடு செய்தோம். தொடர்ந்து வியாபாரம் பெருக ஆரம்பித்தவுடன் உபகரணங்களுக்காக தற்போது 1,00,000 ரூபாய் முதலீடு செய்துள்ளோம். இந்தப்பணமும் இந்த உணவகத்தின் மூலம் சம்பாதித்த பணம்தான். தற்போது, 30,000 ரூபாய் வரை சம்பாதிக்கிறோம். என்னுடைய தாய் தங்கம்மாளும், மனைவி ஜெயலஷ்மியும்தான் எனக்கு உறுதுணையாக இருக்கிறார்கள்” என்றார்.  தொடர்ந்து பேசிய ஜெயல‌ஷ்மி, “நாங்க பெரிய லாபத்தை எதிர்பார்த்து இந்த உணவகத்தை ஆரம்பிக்கலை. ஆனா, நாங்க எதிர்பார்த்ததைவிட அதிகமாவே வாடிக்கையாளர்கள் வர்றாங்க. அதனால, லாப நோக்கு இல்லாம தரமான உணவுகளைத் தயாரிச்சுக் கொடுத்துட்டுருக்கோம். 

நம்மாழ்வார் வழியில் ஆரோக்கிய விலாஸ்!

நவதானிய சுண்டல், கொழுக்கட்டை, சுக்கு காபினு ஆறு வகையான பொருள்களைத் தயாரிச்சு விற்பனை செய்றோம். காலையில 6 மணியில இருந்து 10 மணி வரைக்கும் வியாபாரம் இருக்கும். திரும்பச் சாயங்காலம் 4 மணியில இருந்து 9 மணி வரை வியாபாரம் இருக்கும். அடுத்து இன்னும் நிறைய பாரம்பர்ய உணவுகளைத் தயாரிக்கலாம்னு இருக்கோம்” என்றார்.

கடையில் சுக்கு காபியைப் பருகிக் கொண்டிருந்த நாகேஸ்வரன் என்பவரிடம் பேசினோம். “இங்க தரமான பொருள்கள் சாப்பிடக் கிடைக்குது. விலையும் வாங்ககூடிய அளவில் இருக்குது. கடை ஆரம்பிச்சதுல இருந்து வர்றேன். என்னை மாதிரி நிறைய ரெகுலர் வாடிக்கையாளர்கள் வர ஆரம்பிச்சுருக்காங்க” என்றார்.

பெருமாளுக்கு வாழ்த்துக்களைச் சொல்லி விடைபெற்றோம்.

மோகன்.இ - படங்கள்: ஆ.வள்ளிசௌத்திரி